د.عیزەدین مستەفا رەسوڵ

دیسان بۆ كەركوك

  2018-02-08 18:17      226 جار بینراوە        کۆمێنت

چەند بۆ كەركووك‌و لەبارەی كەركووكەوە بنووسم. چونكە هیچ كوردێك نی یە (بە دڵ‌و زمانەوە) نەڵێ: كەركووك دڵ‌و قوردسی كوردستانە‌و چەندین لەقەبی تری بۆ دروست نەكات. تەنانەت ئەوانەش كە هەڵوێستیان لەگەڵ بۆ هەرێم بوونی كەركووكدا نەبووە (بەداخەوە) بەڵام دڵ‌و زمانیان لەگەڵ ئێمەیە.
ئێستا دێمەوە سەر ئەو دوو شتەی كەركووكیان كردەوە بەهۆی جارێكی تر كونج لەبارەی كەركووكەوە نووسین: دیارە ئەوە نی یە كە سەرنووسەری ئەم رۆژنامە بەڕێزە كە دەرفەتم بۆ دروست دەكات، برایەكی كەركووكیی ڕەسەنە. بەڵكو ئەوەیە كە لە یەكێك لە كەناڵەكانی تەلەفزیۆندا- د. مستەفای عانی (مصگفی العانی)م دی كە سكرتێری رێكخراوێكە بەناوی (mbc) ەوە‌و گوایە بەرگری لەبیر‌و سەربەستی دەكات. ئاشكرا بە عەرەبیی (زمانی قورئان) ووتی: كەركووك شاری كورد نی یە.
سەیرە كابرا (عانی یە)- واتە سوننی یە‌و لە شیعەكانی سەر بە ئێران‌و عەببادی نی یە، تا لەبەر ئەوان ڕای لەگەڵ ئەواندا بێت. بەڵام كابرا لە كوێ یە‌و رێكخراوەكەی لە كوێ یە. رەفیق چالاكی رەحمەتی دەیووت: (ئینگلیز، ئای ئینگلیز، سەدان نۆكەری هەیە هێشتا لە قوتوو دان، دەری نەهێناون) دیارە هەڵوێستی ئاغای (العانی) ش هەر هەڵوێستی ئینگلیزە وا ئەمیش لە (قوتوو، دەرهێنرا).
بۆ هەڵوێستی ئینگلیز‌و نەوتی كەركووك، ئەوەش دیارە- كە چ مەلیك مەحموودی نەمر،چ بەرزانیی نەمر- قۆچی قوربانی كەركووكن، چونكە كەركووكیان بە كوردستان دەزانی‌و دیارە نەوتی كوردستانیشیان بە موڵكی كوردستان دەزانی. بەڵام ئینگلیز كەركووك‌و نەوتی كەركووك بە موڵك‌و ماڵی خۆیان دەزانن.
ڕەنگە لە تاپۆی ناودەوڵەتیدا بە موڵكی شكسپیر دانرابێ. ئینگلیز نەوتی كەركووك بە موڵكی خۆیان دەزانن ئیتر چۆن بدرێت بە شێخی نەمر‌و بەرزانیی نەمر.
من سەركردە نیم‌و ئەندامی سەركردایەتیی هیچ حیزبێكی كوردستان نیم. بە شانازیمەوە زۆربەی سەركردەكانی كورد دەناسم. لەبەرئەوە مافی ئەوە بەخۆم ئەدەم بڵێم: با نەوتی كەركووك بۆ ئینگلیز بێت.(بە قوزەقورتیان بێت). جاران ئێمە هەر لە كەركووكدا نەوتمان هەبوو. لەبەرئەوە نەماندەویست دەست لەكەركووك هەڵگرین. بەڵام ئێستا لە كوردستاندا لەزۆر شوێندا نەوتمان هەیە، غازمان هەیە. شوكور بۆ خوا كوردستان‌و (هەرێم) دەوڵەمەندن. جا هەقی ئەوەم هەیە-كە هاووڵاتی یەكی كوردم-بڵێم: با نەوتەكە بۆ ئینگلیز بێت، بەڵام (بە خاك‌و بەرد‌و دار‌و بە ئاوی خاسەوە) نا. بەڵكو دەكرێ خاكی كەركووك بەشێك بێت لە (حكوومەتی كوردستان-ئەگەر هەرێم بێت، یا سەربەخۆ) بەڵام نەوتەكە بۆ ئینگلیز.(دنیا‌و مێژووش) زۆری ماوە‌و هەر وەك ئێستا نابێ‌و نموونەی بەرزی یەكێتیی كورد لەبارەی (عفرین)ەوە‌و ئەم پشتگیری یەی جیهان-دیارە (ئاسۆی كورد ڕووناكە)‌و ئەم هەڵوێستە جیایە بۆ ئینگلیز‌و عەببادی تۆمار بكەین‌و رۆژان رۆژی لەدووایە‌و كورد هەر ماوە‌و هەر سەر ئەكەوێ.

وتاری زیاتر


زەمین لەرزە‬ د.عیزەدین مستەفا رەسوڵ
2018-01-03 10:22      169 جار بینراوە

بۆ (قودس)‬ د.عیزەدین مستەفا رەسوڵ
2017-12-23 11:57      218 جار بینراوە

شۆڕشی ئوكتۆبه‌ر ‌‬ د.عیزەدین مستەفا رەسوڵ
2017-10-12 13:49      222 جار بینراوە

مام جەلال‬ د.عیزەدین مستەفا رەسوڵ
2017-10-07 16:08      215 جار بینراوە


نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو