مەلا بەختیار

كورتە خوێندنەوەی بیرەوەرییەكانی هاوسەری ئۆباما (میشێل)

  2020-02-03 19:31      83 جار بینراوە        کۆمێنت

ئەوەتەی سیاسەت دەكەم، خوێندنەوە بۆتە خوی پەروەردەی هزرم. كە كتێبێكم بەدڵ بێ‌ سەدان لاپەڕەش بێ‌، هەتا لەبەرگەوە بۆ بەرگ، تەواوی نەكەم، وازی لـێ‌ ناهێنم، تەنانەت لەسەفەریشدا.
17/1/2020  بۆ هەفتەیەك سەفەری (دوبەی)م كرد. كتێبێكم بەناوی (أساسیات علم السیاسە) چاپی یەكەم (2016) لەنووسینی (ستیڤن. د. كانسی-نایجل جاكسون) كە بەشێوەیەكی جوان (أ.د. محی الدین حمیدی) وەریگێڕاوە، لەگەڵ خۆمدا برد (32) لاپەڕەم لەفڕۆكەكەدا تەواو كرد. كە گەیشتم، لەمۆڵ (دوبەی)دا، سەردانی كتێبخانە نایابەكەیم كرد (5) كتێبم كڕی. لەسەر: سەنگاپورا، نامەكانی نێوان گۆرگی و شیخۆف، هەروا كتێبی (وأصبحت میشیل أوباما) هاوسەری ئۆبامام كڕی. كە پەرەگرافی بەرگی پشتەوەیم خوێندەوە، چومە كۆفیەك و سەرنجم لێداو ئەم سەرنجەم لەسەر بەرگی دوەمدا نووسی: ( لەمۆڵی دوبەی كڕیم. دەستبەجێ‌ لەكۆفییەك بۆی دانیشتم و پێڕست و نووسراوی سەر بەرگەكەیم خوێندەوە. بڕیارمدا هەمووی بخوێنمەوە. لەوە دەچێ‌ ژنێكی سەنگین هاتبێتە ناو سیاسەت و لوتكەی هاوسەرێتی).
گەڕامەوە ئوتێل بەشەوقەوە كەوتمە خوێندنەوەی ئەم كتێبە (440) لاپەڕە نیو فلوسكابە. خوێندنەوەشم گەیاندە لاپەڕە (42) ئەم تێكستەم لەسەر نووسی:
 داڕشتنەكەی ئەدەبییە. بیرەوەرییەكە سوودبەخشە، وردكاری تیایە. تەنانەت ژیانی قۆناغێكی گرنگی ئەمریكاو رەشپێستەكان و روانگەی سپی پێستەكان بەرامبەریان، بەرجەستە دەكات. بەهیوای تەواوی كتێبەكە وابێ‌!).
لەلاپەڕە (53)دا، هەستم كرد رەگەزپەرستی چ رۆڵێكی هەبووە لەتێكۆشان، ئەمەم نووسی: (پاشەوەی جیاوازی رەگەزایەتی، تا ئەو كاتەش، لەناخی رەشپێستەكاندا هەبووە. ئەم كولتوورو سیاسەتە، تاوانی مرۆڤایەتی لێكەوتۆتەوە. بەڵام وەكوتر، لەم بیروەرییەدا دیارە، كە هاندەریش هەبووە رەشەكان تێبكۆشن، پێبگەن. كۆڵ نەدەن)!.
كە دەگەمە لاپەڕە (173) ئۆباما سەردانی نەنكی لە كینیا دەكات و رەسەنایەتی لای ئۆباما ئاوها دەبینم: (ئۆباما بەم هاتنەی لەگەرمەی مارەبڕین و دەزگیرانیا، دەیسەلمێنێ‌ كە چۆن پیاوێكی جوامێرەو رەسەنایەتی خۆی پاراستووە. سەرەڕای ئەوەی كەمترین ماوە ژیاوە لە كینیا!).
لەكاتی سەركەوتنی ئۆبامادا، لەلاپەڕٍە (263)دا دەڵێم: (دیمەنێكی پڕ لەجۆشە. سەركەوتن، هەستەكانی شانازی دەوروژێنن. دەرگای پرۆسەی نوێی ژیان و سیاسەت و كەسایەتی دەكاتەوە. ئۆباما .. بەراستی، كەسایەتیەكی گەورە بوو. بەرنامەی هەبووە. سەركەوت) لەدرێژەیدا دەڵێم: (تا ئێستا، بیرەوەرییەكە، تانوپۆی جوان چێنراوە. سیاسەت وردە وردە كاری سۆسیۆلۆژیاو رەوشت و پرەنسیپ و، وەفا، بەجوانی ئاوێتە كراون.
ئەم ژنە، هەر لەمنداڵییەوە، وەكو خۆی دەیگێڕێتەوە، بەرنامەی هەبووە. سور بووە لەسەر پرنسیپەكانی. جیاوازی خۆی پاراستووە. بۆیە گەیشتۆتە ئامانجەكانی. ژیانی پڕن لەوردە ئەزموونی بەهادار. شایەنی خانمی یەكەم بووە).
كتێبەكە لەكۆتایی سەرۆكایەتیدا، كۆتایی دێت و لەلاپەڕە (430)دا دەڵێم: (ئاوابوونی خۆری لوتكەی دەسەڵات، گاڵتە نییە. بەڵام وڵاتانی دیموكراسی، توانیویانە جێگۆڕكێی دەسەڵات بكەنە كولتوری سیاسی و نەریتی كۆمەڵایەتی. ئەمە یەكێكە لەدەستكەوتە جوانەكانی رۆژئاوا.. كە هێشتا، مەخابن، پەنجەرەیەكیش لەم كولتورە، لەسەر وڵاتانی ئێمە نەكراوەتەوە تازە تازە شەڕی تایفەگەری و كێشەی قوڵی سیاسی دەسەڵات-خەڵك، قوڵبونەتەوە. رواڵەتی دیموكراسی بەسەر دیمەنی سیاسیماندا زاڵە. هێشتا، پرۆسەیەكی مێژوویی درێژی دیموكراسی، لەبەردەمماندا ماوە).
كۆتا كۆمێنتیشم لەلاپەڕە (435)دا ئەمەی خوارەوەیە: بەشێكی هەرە نایابی بیرەوەرییەكە، ئەم چەند لاپەڕەیەی كۆتاییەكەیەتی.
جوانە.. بەراستی جوانە، بڕێ‌ لەمانا هەرە جوانەكانی ناخی مرۆڤ كاتێك، هەستی شانازی ئاوێتەی دڵتەنگی دەبێ‌. شانازی و دڵتەنگیش، دەبەسترێتەوە بە بەرپرسیارێتیی. دەست و هزرت خۆشبێ‌، ئەی خانمە یەكەمەكەی سەردەمی سەرۆك ئۆباما).
ئەو پەرەگرافانەم لەسەر ئەو لاپەڕانە نووسیون كە ئاماژەم پێكردوون. ئەمە جگە لەوەی لەپەراوێزی كەم لاپەڕەدا هەیە، تێبینیم نەنووسیبێ‌ ( لەهەموو كتێبێكدا كە دەی خوێنمەوە وادەكەم). ئومێدەوارم، هەموو خوێنەرێكی وشیار ئەم كتێبە بخوێنێتەوە. بەتایبەتی خانمان!

وتاری زیاتر







كاریگەریەكانی پۆست كۆرۆنا‬ مەلا بەختیار
2020-03-28 14:13      48 جار بینراوە






گەلۆ.. كوردان! نەورۆزتان پیرۆز‬ مەلا بەختیار
2020-03-20 19:18      47 جار بینراوە


















نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو