ناجی ئەفراسیاو

دەرچەکەی دەسەڵات بۆ خەڵک

  2020-02-05 08:31      47 جار بینراوە        کۆمێنت

هەرگیز دەسەڵات هەموو دەرچەكان لەسەر خەڵك داناخات، بەڵكو پەنجەرەیەك دەهێڵێتەوە تاكو لێوەی هەناسە بدەن. كەناڵەكانی ئۆپۆزسیۆن ڕۆڵی ئەو هەواكێشە دەبینن كە ناهێڵێت هەناسە پەنگخواردووەكان پەستان دروستبكەن و بتەقنەوە. دە ساڵ زیاترە خەڵكی عێراق و كوردستان لەڕێگەی "مایكی ئازاد"، و "سەكۆی ئازاد"ەوە دەردەدڵ دەكەن و خۆیان خاڵی دەكەنەوە. دواتر تووڕەیی و ناڕەزایەتییەكانی خەڵك، بەشێكی دەبێتە مادەی میدیایی بۆ كەناڵەكانی ئۆپۆزسیۆن، و بەشێكیشی دەبێتە گرتەی گاڵتەوگەپ و لە سۆشیال میدیا لایك و كۆمێنتی پێ كۆدەكرێتەوە. ژیژەك پێیوایە ئەم سەگباوەڕییەی ئەمڕۆ لەئارادایە ڕۆحی سەردەمەكەیە، هەر لە تویتەكانی ترامپەوە تاكو دەگات "دادگاییەكەی مەلا مەزهەر"، هەموو كەرەستە و ئامرازی بێهۆشكردنی كۆمەڵگان. كۆمەڵگای باڵادەستی ئەمڕۆ لەڕێگەی هەڵبژاردن و ئۆپۆزسیۆنی پەرلەمانییەوە، دووبارە خۆی بەرهەمدەهێنێتەوە، و هەیمەنەی خۆی بەسەر هێزە نەیارەكاندا دەسەپێنێت. هەرئەوەشە بۆتە هۆكاری ڕەشبینی و نائومێدیی بەشێكی زۆری خەڵك، كە لەبری كردنەوەی دەرگای خەبات، و بەرەنگاری و تەحەداكردنی تەڵەكانی سیستەم، ڕوودەكەنە لێوارەكانی مەرگ. ئەمڕۆ بەشێكی زۆری ئەوانەی سەركێشیی بە ژیانیانەوە دەكەن و ڕوو لە دەریا و زەریاكان دەكەن، هیچ هیوایەكیان بە باشبوونی دۆخەكە نەماوە، و تەسلیم بەو دۆگمە بوون كە هیچ قودرەتێك ناتوانێت ژیانێكی باشتر فەراهەم بكات..
* ئەو زنجیرە ڕاپۆرتانەی لەڕێگەی كەناڵەكان و سایتەكان و پەڕەكانی فەیسبوكەوە دەربارەی گەندەڵی، دووئیدارەیی، دابەشكردنی پزیشكی دادوەری و سامانی سرووشتی و هتد.. بڵاودەبنەوە. كەچی هیچ لە تێڕوانین و هەڵوێستی كۆمەڵگا ناگۆڕێت و پێمانوایە، ئەمە بەشێكە لە سونەتەكانی ژیان و دەبێت قبوڵی بكەین!

 

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو