ئاوات كۆكه‌یی

لەیادی 17 ساڵەی شەهیدی سەركردە شەوكەتی حاجی مشیرو هاوڕێكانیدا

  2020-02-08 17:03      71 جار بینراوە        کۆمێنت

ئاوات كۆكەیی
قەدەری یەكێتیی نیشتمانیی كوردستان ئاوا بووە كە لە كاروانی تێكۆشاندا هەم بۆ رزگاریی و سەرفرازیی خاك و هەمیش بۆ ئاشتی و ئارامی خەڵك، دەبێ نرخێكی گرانی خوێن بدات و لە رۆڵە دەستەبژێرەكانی خۆی بكاتە قوربانیی بەدیهاتنی ئەو ئامانجە.
لەسەرەتای دامەزراندنیدا، یەكێتی كەوتە خۆ بۆ بەرگرتن لە راگواستنی زیاتری گوندەكانی سەرسنوور، بەعسی فەرمانڕەوای ئەوسای عیراق لە دوای شكستی شۆڕشی ئەیلول، وەك بەرنامەیەكی دوژمنكارانە بەرامبەر خەڵكی كوردستان بۆ ئەوەی جارێكی دیكە شۆڕشی كوردستان سەر هەڵنەداتەوە، كەوتە پیادەكردنی بەرنامەی راگواستنی تەواوی گوندەكان، لە سەرەتاشدا خەڵكی ناوچە شاخاوییەكان و سەرسنوورەكانی راگواست و لە ئۆردوگا زۆرەملێكاندا گرمۆڵەی كردن.
ئیدی یەكێتیی نیشتمانیی كوردستان هەر كە بووە خاوەنی چەند مەفرەزەیەكی پێشمەرگە، بەریان بەو شاڵاوی راگواستنە گرت و بەرامبەری سوپای دوژمن بوونەوە، بۆ ئەوەش قوربانی زۆری داو لە باشترین رۆڵەكانی خۆی لەو پێناوەدا شەهیدكران.
بۆ بەرپەرچدانەوەی شاڵاوی تەعریبكردنی خاكی كوردستان و بە بەعسیكردنی خەڵكەكەی، دیسان یەكێتی گورج هاتەوە مەیدان و نەیهشێت ئەوەی بەعس دەیخوازێ، بەتەواوی بێتە دی.
خەبات و خوێنی تێكۆشەرانی یەكێتی
ساڵانی خەباتی چەكداریی، لە بەرامبەر هەر نیەتێكی رژێمی داگیركەردا، یەكێتی باسكێكی بەهێزی بەر پەرچدانەوە بووە و لەهەر هێرشێكی دوژمندا رۆڵەكانی یەكێتی بەرگرییەكی قارەمانەی مان و نەمانیان كردووە و دەریایەك خوێنی بەخشیوە، بەكورتی لە هەر قۆناغ و بارودۆخێكدا پێویستی كردبێت، هێزی بە پێزی یەكێتی و شۆڕشی نوێ، سەری باشترین و ئازاترین لە رۆڵەكانی خۆی داناوە و نەیهشێتووە مەرامی دوژمنان بێتە دی.
هەروەك چۆن لە زەمانی خەباتی شاخدا پێشمەرگەو سەركردەو فەرماندەی یەكێتی لە شەڕی دژی رژێمی بەعس شەهید كراوە، ئاوا لە دوای راپەڕینیش پێشمەرگەو فەرماندەو سەركردەكاتی كردۆتە قوربانی بۆ پاراستنی دەستكەوتەكانی راپەڕین، بۆ سەقامگیركردنی ئاسایش و ئارامی خەڵك.
شەهیدبوونی كاك شەوكەتی حاجی مشیر نموونەی زیندووی ئەو ئامادەییەی یەكێتیی نیشتمانیی كوردستان دەردەخات لە خۆبەختكردن و دەستپێوەگرتنی ئەوەی بەدەستهاتووە.
كاك شەوكەت لە پێناو كوژانەوەی فیتنە و ئاشووب و سەقامگیربوونی ئارامی خەڵكی كوردستان و گەڕاندنەوەی چەند سەرلێشێواوێك و هەڵخەڵەتێنراوێك بۆ ژیانێكی ئارام و ئاسایی، شەهیدكرا.
كاك شەوكەت خۆ سوور دەیزانی ئەو ئەركەی ئەو پێی هەڵدەستێت چەند مەترسیدارە و ئەگەری تیاچوونی خۆی چەند بەهێزە، دەیزانی لایەنی بەرامبەر خاوەنی چ ئایدیایەكی وێرانكاری و دژە كرانەوە و پێشكەوتنخوازییە، بەڵام هەستكردن بە ئەركی سەرشانی و خۆ بە خاوەنزانینی خاك و وڵات و بەتایبەت ئەو ناوچەیەی كە تیرۆر بڕستی ژیانی لێبڕیبوو، وای كرد پێ بنێتە چاڵی ئاگرەوەو چش لە سووتانی خۆی بكات.
كاك شەوكەت
پیاوی تەنگانەی سەرەتای شۆڕشی نوێ، پێشمەرگەی یەكەمین مەفرەزە و یەكەم سەنگەر، سەركردەی دەیان داستان و نەبەردیی، لە دوای رزگاربوونی كوردستان و لە ئازادیدا، لە سەر هەمان رێبازی سەردەمی شاخ و بە هەمان باوەڕی ساڵی 1976ەوە، بۆ پوچەڵكردنەوەی پیلانێكی ناحەزان و دوژمنانی كوردستان، چووەوە مەیدان و سەرەنجامیش گیانی خۆی بەختكرد.
بەڵێ، 17 ساڵ بەر لە ئێستا و لە شەوی 7\8/2/2003، كاك شەوكەتی حاجی موشیر، لەگەڵ هەردوو فەرماندە سەردار غەفوورو حیكمەت حاجی عوسمان و چەند هاووڵاتییەك، بەدەستی تیرۆریستان شەهیدكران.
شەهیدبوونی ئەو جوامێرانە لە شەڕدا نەبوو، بەڵكوو لە كاتی وتووێژی نێوان كاك شەوكەت و چەند تیرۆریستێكی سەر لێشێواودا بوو كە ماوەیەك بوو ناوچەكانی هەڵەبجەو شارەزووریان كردبووە ناوەندێك بۆ هەڕەشەو ئاشووب بۆ سەركوردستان، ئەوە دەرفەتێك بوو بۆ ئەو سەر لێشێواوانە بێنەوە سەر ژیانی ئاسایی خۆیان و چیتر و لە پێناو هیچدا نە خۆیان و نەئەڵقە لەگوێ هەڵخەڵەتێنراوەكانی خۆیان بە كوشتن نەدەن و كوڕی دڵسۆزی ئەم نیشتمانەش بەخۆڕایی شەهید نەكەن.
زۆر داواكرا تیرۆریستان رێگەی شەڕ وەلا بنێن و هەموو دەرفەتێكی ئاشتیان پێدرا، تەنانەت هەوڵی زۆردرا كە ئەو كوردە گومڕایانەی دوای گروپە تیرۆریستییەكان و پیلانی دوژمنانی كورد كەوتون، بگەڕێنەوە ناو خێزانەكانیان، لەو رووەوە كاك شەوكەت وەك سەركردەیەكی ی.ن.ك و هەم وەك كەسایەتییەكی كۆمەڵایەتی ئەو سنورەش كە خەریكبوو تۆڕەكانی تیرۆریستیان تیایدا گەشەبكات، بەئەركی خۆی زانی كە بچێتە گۆڕەپانی مەرگ تا بتوانێ تروسكاییەك بخاتە هەناوی ئەو تاقمە دڵڕەشانەو هەلێكی دیكەی گەڕانەوەی ژیانیان پێ ببەخشێت، چەند جارێك لەگەڵ ئەو تیرۆریستانەدا گفتوگۆیكردبوو و دانیشتن ئەنجامدرابوو، بەڵام ئەوان ئەو نیەتە پاك و دەرفەتە باشەیان كردە هەلێك بۆ وەشاندنی گورزێكی دیكەی ناپاكی، لە ئەنجامدا و لە دوا كۆبوونەوەیاندا لەگوندی (گامێشتەپە)ی شارەزوور، كاك شەوكەت و هەردوو فەرماندەی ئازا (سەردار غەفوور و حیكمەتی حاجی عوسمان) و تەنانەت خانەخوێ و خاوەن ئەو ماڵەشیان شەهید كرد كە میواندارییان كردبوون و شوێنی كۆبوونەوەكانی بۆ دابینكردبوون، هاوكات چەند هاووڵاتییەك و بەشێك لە كەسوكاری خاوەن ماڵەكەشیان، هەر شەهیدكرد و چەند كەسێكیشیان برینداركرد.
تیرۆریستان لە بری پێكهاتن و رێزگرتن لە عورفی دیبلۆماسی و كۆمەڵایەتی و ئاینی و ئەخلاقی، تاوانێكی رەشتر لەوانەی پێشوویان، ئەنجامدا.
هاووڵاتییە شەهیدەكان
سیامەند ساڵح حەسەن، فاتمە محەمەد تۆفیق، دەروون فازیل ساڵح، حەسەن محەمەد فەتاح.
هاووڵاتییە بریندارەكان
ساڵح حەسەن موسا، سامان ساڵح حەسەن، هێمن حەسەن قادر، هێرش حسێن قادر.
كورتەی ژیاننامەی شەهید شەوكەت
ساڵی 1947 لەگوندی (تەپی سەفا)ی شارەزوور لەدایكبووە، ساڵی 1967 قۆناغی ئامادەیی تەواوكردووە.
رۆژی 26/6/1976 بووە پێشمەرگەو یەكێكبووە لەپێشمەرگەكانی یەكەمین مەفرەزەی شۆڕشی نوێ.
لەسەردەمی پێشمەرگایەتی زۆر ئازایەتی و دلێری نواندووە، سەرپەرشتیی و فەرماندەیی چەندین داستان و نەبەردی كردووە.
دوژمن زۆر هەوڵیدا بەتایبەت لەساڵانی 1988-1989-1990 كەئەو سەركردەیە لەناوبەرن، خێزان و كەسوكاری زیندانیكراون و ئازارو چەرمەسەری زۆریان توش هاتووە، كوڕێكی لەزینداندا لەدایك بووە.
هەروەها شەهید شەوكەت یەكێك بووە لەسەركردەكانی راپەڕینی ساڵی 1991ی خەڵكی كوردستان، لەقۆناغی دوای راپەڕینیش چەندین ئەركی پێسپێردراوە لەوانە: ساڵی 1992 بۆتە ئەندامی یەكەم پەرلەمانی كوردستان لەسەر لیستی سەوز، ساڵی 2001 لەدووەم كۆنگرەی ی.ن.ك بەئەندامی ئیحتیات-ی سەركردایەتی هەڵبژێردراو دواتر كرایە ئەندامی سەركردایەتی ی.ن.ك.
دوا پلەشی ئەندامی سەركردایەتی و لێپرسراوی مەكتەبی كۆمەڵایەتی یەكێتیی نیشتمانیی كوردستان بووە.
شەوی 7\8/2/2003 لەماڵێكی گوندی (گامێشتەپە)ی شارەزوور، لەكاتی گفتوگۆدا، بەدەستی تیرۆریستان و بە پیلان، لەگەڵ هەردوو یاوەرەكەی و چەند هاووڵاتییەك شەهیدكرا.

وتاری زیاتر





نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو