مەلا بەختیار

هەڵسەنگاندنی کتێبی (من عالم ثالث الی الاول)

  2020-03-16 19:52      61 جار بینراوە        کۆمێنت

بەشی بیستەم
(هەڵگەڕانەوەی شۆڕشگێڕان بۆ گەندەڵی)
سەنگاپورە جگە لەپرۆژەی ستراتیژی و ژێرخانی ئابووری هاوچەرخ، هەروا پرۆگرامی خوێندن و فەلسەفەی پەروەردەی زانستی؛ جگە لەسیستەمی دیموکراسی و گرتنەبەری رێبازی ناڤینی سیاسی و دژایەتی توندڕەوایەتی چەپ و راست، جگە لەهەموو ئەمانە، خۆپاراستنیش لەگەندەڵی و سزادانی گەندەڵکارانیش پەرژینی پاراستنی دەسەڵاتەکەیان بوو. لەمبارەوە نەک باسی سەنگاپورە، بەڵکو باسی رابەرانی ئازادیخوازی ئاسیاش، کە تێوەگلاونەتە گەندەڵی بەم شێوە جوانە لەلایەن سەرۆکی وڵاتەکەوە باس دەکرێ:
کاتێک پارتی کاری میللی ساڵی ١٩٥٩ هاتە سەرکار، کارەکانمان بەچەشنێک رێکخست کە ئیدارەیەکی خاوێنمان هەبێ. چاوچنۆکی و گەندەڵی و لێکترازانی زۆرێک لەسەرکردەکانی ئاسیا، ئازاری داین.
(ل:٢٠٩)
جەنگاوەرە تێکۆشەرەکانی پێناوی ئازادی و رزگاری گەلانی ستەمدیدە، هەڵگەڕانەوە بۆ تاقمێکی گەندەڵی تەخشان و پەخشانکەری سامانی وڵاتەکانایان.
بەڕاستی ئەو قسانە، هەر دەڵێی نەخشی هەڵکۆڵدراوی سەر تابلۆی راستیەکانن. سەیرە، رووداوەکانی شۆڕشگێڕانی مێژوو، بەشێکیان مێژووی خۆیان شێواندووە. لەقۆناغی خەباتدا سەربەرزو قارەمان، لەبونیاتنانی سیستەمی دیموکراسی و دادپەروەریدا سەرشۆڕن.
خوێندنەوەی من وایە، کێشەیەکی گەورە لەنێوان ئایدیۆلۆژیەت و بونیاتی دەسەڵاتدا هەیە. دەرکەوت، بەپێوەری ئایدیۆلۆژی، سیستەمی دیموکراسی و دادپەروەری بونیات نانرێت. باشترین سیستەمی دیموکراسی و چاکترین حکومەتی دادپەروەری خۆشگوزەران، بەبێ سەروەری یاساو سەربەخۆیی راستەقینەی دادوەری، مەحاڵە.
با دیقەت بدەین، سەرۆکی دوژمنی گەندەڵی کە شۆڕشگێڕو جەنگاوەریش نەبووە، لافی مارکسیەت و سۆسیالیستی و دیکتاتۆریەتی پرۆلیتاریاشی لێ نەداوە، چی بەو شۆڕشگێڕانە دەڵێ لاف لێدانیان لە کاتی شۆڕشدا زۆر بووەو لەکاتی بونیاتنانی حکومەتیشدا، گەندەڵ بوون. پێیان دەڵێ:
کۆمەڵەکانیان دواکەوتوو گوزەرانیان نالەبار بوو، شەپۆلی شۆڕش لەئاسیادا، دایگرتین، سووربووین کە لەکۆڵۆنیالیزم رزگارمان بێ، وەلێ، هەستمان بەنائومێدی و شەرمەزاری لەو سەرکردە نیشتمانپەروەرە ئاسیاویانە دەکرد کە لەجێبەجێکردنی نموونەی بەرزدا شکستیان خواردو نەیانتوانی ئەو گومڕاییەی بەرچاومان بڕەوێننەوە. بڕوانە لاپەڕەی (٢٠٩)
مەبەستی گومڕایی لە لاف لێدانی شۆڕشگێڕانەیە، کە لەبونیاتنانی دەسەڵاتدا چۆن شکستیان خواردووە.
بۆ کوردستان و لەولاشەوە فەلەستین، کە دوو نیشتمانی هاوئازارو هاوپێناوین، پێویستمان بەلێکدانەوە نییە. چونکە بۆچوونی سەرۆکی سەنگاپورە، بەداخەوە، هەردوولامان دەگرێتەوە.

وتاری زیاتر







كاریگەریەكانی پۆست كۆرۆنا‬ مەلا بەختیار
2020-03-28 14:13      47 جار بینراوە






گەلۆ.. كوردان! نەورۆزتان پیرۆز‬ مەلا بەختیار
2020-03-20 19:18      46 جار بینراوە


















نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو