لوقمان غەفوور

مردن لەئەمریكا جیاوازە لەكوردستان

  2020-03-24 20:49      69 جار بینراوە        کۆمێنت

تەلەفۆنم بۆ (كان ئێركسن)ی هاورێم كرد پێموت سەرقاڵی چین، وتی: من كتێبەكەی كلاف سمیس (تیمێك لەمارەكان) ئەخوێنمەوەو میشێل-ی خێزانیشم كتێبی (چۆن لە 48 سەعاتدا هەموو شت فێر ئەبیت) لەنووسینی تانسێل ئەلی". دواتر وتم ئەی رادەی ترس چۆنە لەكۆرۆنا ڤایرۆس؟... بەپێكەنینەوە وتی: "ئێمە باشین.. لەماڵەوەین، كۆرۆنا ڤایرۆس-یش قاچی نییە بێتە ژوورەوە". دوای چارەكێ قسەكردن كۆتاییمان هێنا بەگفتوگۆكەو تێگەیشتم دەروونیان ئارامە. لەبەرامبەردا تەلەفۆنم بۆ هاورێیەكم كرد لەكوردستان، باسی دڵەڕاوكێ و نائارامی ئەكرد. كورد باش هەڵسوكەوت ناكات لەگەڵ كۆرۆنا ڤایرۆس-دا. هەندێك ترسی و دڵەراوكێیان گەیشتۆتە ئەوپەڕی، كە ئۆباڵی ئەم ترسە ئەخەمە ئەستۆی تەلەفزیۆنەكان. هەندێكی تر كارەكەی كردووە بەگاڵتەو بۆتە مایەی سەرئێشە بۆ هەموو كۆمەڵگە. بەشێكی تریش لەبۆسەدان بۆ تووشبوونی كۆرۆنا ڤایرۆس تا دامودەزگاكانی حكومەتی پێ تۆمەتبار بكەن. خەریكە وامان لێدێت لەبری رێنمایی بۆ خۆپارستن لەسەر كۆرۆنا ڤایرۆس (COVID-19) ئیتر باسی رەواندنەوەی ترس و دڵەڕاوكێی خەڵك بكەین، كە ئەمە ئەركی گەورەی ئەم قۆناغە نییە. ئەركی گەورەی قۆناغەكە بڵاوكردنەوەی رێنماییە. ئەوەی كە من ئەیبیستم لەخەڵك ئەو شریتە سورانەی تەلەفیزیۆنەكانە كە لەڕێگەیەوە ئاماری ترسناكی مردنی وڵاتانی تێدا بڵاودەكرێتەوە، بۆتە هۆی ترساندنی خەڵك. من لە سی ئێن ئێن و ئەی بی سی نیوز و ئێم بی سی لەئەمریكا نابینم شریتی سور لێبدا، بڵێ لەعیراق مردن گەیشتە 45 كەس، لەتوركیا گەیشتە 20 كەس.... لەكۆێ و كوێ. بەڵام بڵاوكردنەوەی ئاماری مردنی وڵاتان لە تیڤییە كوردییەكانەوە بووە بەداهێنان و لەئەنجامی هەڵبژاردنی كوردستان ئەچێت. كەواتە كە ئەزانن ئەمانە بوونەتە هۆی دڵەڕاوكێ، سەرجەمتان لایبەرن و لەگەڕی هەواڵەكاندا بەشێوەیەكی تر بڵاویكەنەوە. دەبوو لەبری ئەو شریتە سوورە بێكەڵكانە، شریتی رێنمایی و خۆپاراستن دابنرێت. لەبەرنامە تەلەفیزیۆنییەكاندا چیرۆكی ئەو شوێنانە بڵاوكرێتەوە لەكاتی بەربەستی تەندروستی و داخستنی شارەكانیان سەلامەت تر بوون لەو شارو وڵاتانەی كە دەرگایان بەرەڵا كردبوو. 
خەڵكی كوردستان نابێت وا بزانێت كە خەڵك لەئەمریكاو چین و ئیتالیاو فەرنساو ئێران مرد، ئیتر لەكوردستانیش هەر ئەبێت خەڵك بمرێت. كۆرۆنا ڤایرۆس قاچی نییە بێتە ناو ژوورەكانەوە. تۆ لەماڵەوە بسرەوەو ئارام بگرە بیانوو مەهێنەوە فلان لەگەشتوگوزارە، دڵنیابە پارێزراو دەبیت. بەهاووڵاتی كوردستان ئەڵێم لەماڵەوە دانیشە پارێزراو ئەبیت، كەچی ئەڵێ ئاخر پارێزراو نابم سیستمی تەندروستی هەرێم خراپە. نازانم سیستمی تەندروستی چ پەیوەندی بەدانیشتنی خەڵكەوە هەیە كە لەماڵەوە دانیشین. ئەركی تۆ لەهەرێمی كوردستان، لەم قۆناغە ئەركێكی ئاسانە، دانیشتنە لەماڵەوە! كاتێك دەوامی خوێندنگاو قوتابخانەو زانكۆو بەرێوەبەرێتی و شوێنە گشتییەكان نەبێت، ئیتر ئەركێكی تر چییە كە جێبەجێی بكەیت بۆ كۆمەڵگە. 
پێم سەیرە شەقام كۆڵانەكان پڕ بوون لەپۆلیس و ئاسایش و غەرامەی شۆفێر دەكەن كە بچێتە دەرەوە. لەم ئەمریكایە 75 ملیۆن كەس لەژوورەوە دانیشتوون، لەكاتێكدا دانیشتن لەماڵەوە بۆ ئەمریكی كارەساتە. ئەوان ئەزانن چوونە دەرەوە باش نییە. ئاپۆرەو وەستان پێكەوە باش نییە. ئەنفلۆنزای ئاسایی، كەسێك ئەتوانێ یەك كەس تووش بكات، بەڵام كۆرۆنا ڤایرۆس كەسێك، سێ كەس لەچواردەوەری تووشی دەكات. ئەمە زانستییە، ئەمە پێماندەڵێت تا ئەتوانن پێكەوە مەبن. تۆ ئەركی خۆپاراستنی خۆت جێبەجێبكە لەماڵەوە، تەنیا هەفتەی جارێك بۆ كڕینی كەلوپەلی پێویستی خواردن وەرە دەرەوە، نە بترسەو دڵنیاشبە نەتووشی كۆرۆنا ڤایرۆس-یش ئەبیت. بەڵام بەپێچەوانەوە هەموو رۆژێ بچینە لای هاوڕێ و كەسوكارو سەردانیان بكەیت. دڵنیات ئەكەم سەلامەت دەرناچیت.

وتاری زیاتر

بۆچی نرخی نه‌وت سفره‌؟‬ لوقمان غەفوور
2020-04-21 01:16      82 جار بینراوە

بۆ WHO شكستی هێناوه‌!‬ لوقمان غەفوور
2020-04-12 15:14      65 جار بینراوە






نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو