لەتیف نێروەیی

دوژمنمان کەمە نۆرەی لیبیایە!

  2020-04-18 16:46      75 جار بینراوە        کۆمێنت

بڵاوبوونەوەی وێنەو ناسنامەی هەندێک “پێشمەرگەی رۆژ” لەلایەن سەرچاوە فەرمییەکانی دەوڵەتی لیبیاوە، کە لەگەڵ هەندێک میلیشیای دیکەدا هەزاران کیلۆمەتریان بڕیووە بەمەبەستی شەڕکردن چوونەتە ئەو وڵاتە و بەدیل گیراون، ئەم رووداوە بۆتە هەواڵێکی سەرەکیی و سەرنجڕاکێش و جێگای پرسیاری ناوەندە میدیایی و سیاسیی و سەربازییەکانی ناوچەکە بەتایبەتی و جیهان بەگشتی.
لێرەدا بۆ ئێمەی خەڵکی کوردستان پێویست بەناساندنی ئەو هێزە ناکات کە بزانین ئەوان کێن و ئەرکیان چییە؟ بەڵام ئەوەی کە بۆتە جێگەی پرسیارێکی بێ وەڵام لەلایەن هەموو تاکێکی ئەم وڵاتەوە ئەوەیە کە بۆچی ئەم هێزە کوردییە کە ناوی پیرۆزی پێشمەرگەی کوردستانی لەسەرە، لەگەڵ هەندێک میلیشیا هەزاران کیلۆمەتر دەبڕێت و دەچێتە وڵاتیکی عەرەبی و شەڕ لەدژی ئەو وڵاتە دەکات؟ ئەو وڵاتەی کە خۆی بەدۆستی گەلی کورد زانیوەو لەهەردوو شۆڕشی ئەیلول و شۆڕشی نوێی گەلەکەماندا وەکو تاکە وڵاتی عەرەبی بەبێ مەرج و بەبێ داواکاریی، پشتگیریی لەمافە رەواکانی گەلی کوردستان کردووەو سەرۆکی ئەوسای ئەو وڵاتە بەنووسراوو بەدەق هەروەها لەکۆبوونەوە فەرمییەکانی ناوەندە عەرەبی و جیهانییەکاندا بەڕاشکاوی رایگەیاندووە (گەلی کورد مافی رزگاریی و دەوڵەتی سەربەخۆی هەیە).
لەدوای رووخانی رژێمی سەدامیش بەهەمان شێوە لیبیا نەک دژایەتیی خۆی بۆ سیستمی فیدرالی دەرنەبڕی، بەڵکو جارێکی دیکە پشتگیریی خۆی بۆ مافی چارەی خۆنووسینی گەلی کوردستان دەربڕی.
دوای بەهاری عەرەبی و گۆڕینی رژێمی سیاسی لەو وڵاتەش، دیسانەوە حکومەتی ئەو وڵاتە هیچ زیانێکی نەبووە بۆ هەرێم و گەلی کوردستان بەگشتی، بۆیە ئەم کردەوە ناچاوەڕوانکراوانەی ئەو کەسانەی کە بەناوی پیرۆزی پێشمەرگەوە چوونەتە لیبیا، ئەم سێ پرسیارە دەورووژێنێت:
١-ئایا پاداشتی پشتگیریی و هەڵوێستەکانی ئەو وڵاتە عەرەبییە بەرامبەر بەشۆڕشەکانی گەلی کوردستان و مافە رەواکانی خەڵکی کوردستان بەوە دەدەینەوە کە لەگەڵ هەندێک میلیشیای دژبە کورد بچین و شەڕ لەدژی ئەو وڵاتە بکەین؟
٢-ناوی پیرۆزی پێشمەرگە کە لەسەر ئاستی جیهاندا ناوبانگی پەیداکردووە، کێ ئەو دەسەڵات و مافەی بەو چەکدارانە داوە، کە بەناوو ناسنامەی پێشمەرگەوە شانبەشانی هەندێک میلیشیا بچنە ئەو وڵاتەو ناوبانگی هێزی پێشمەرگەی کوردستان بخەنە ژێر پرسیارەوە؟.
لەوانەیە لەسەر ئاستی عیراق و سوریاو کۆمکاری عەرەبی و جیهانی عەرەبی بەگشتیش ئەم بابەتە گرفتێک بۆ هەرێمی کوردستان دروستبکات و رووبەڕووی هەندێک پرسیاری ئیحراجی بکاتەوە.
٣-ئایا ئێمە وەکو گەلی کوردستان دوژمنمان کەمە تا خۆمان دوژمنی نوێ بۆ خۆمان هەڵبژێرین و بڵین ئەمجارە نۆرەی لیبیایە؟

وتاری زیاتر



نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو