ئەكرەم ئەمین

نانت خواردووە؟

  2020-05-04 17:56      73 جار بینراوە        کۆمێنت

كاتێك دوو كەس بەیەك دەگەن یان تەلەفۆن بۆ یەكتری دەكەن بۆ هەواڵپرسین دەڵێن: چۆنی چاكی یان دەڵێن: تەندروستیت چۆنە؟ بەڵام كەلتووری هەواڵپرسین و چۆنی و چاكی لەلای هاووڵاتیانی چینی ئەوەیە كاتێك كە بەیەكتریی دەگەن دەڵێن: نانت خواردووە؟
ئەگەر شیكاری بۆ ئەو دوو شێوە كەلتووری هەواڵپرسینە بكەین، ئەوا لە كۆتاییدا هەر دەگەینەوە بە نانت خواردووە؟ چۆن وای لێدێت؟ لەسەرەتای سەرهەڵدانی بڵاوبوونەوەی ڤایرۆسی كۆرۆنادا، زۆربەی حكومەت و هاووڵاتیان زیاتر لایەنی تەندروستییان بەگرنگ دەزانی، بۆیە دروشمی لەماڵەوە دەمێنینەوەیان هەڵبژارد، بەڵام لەگەڵ درێژەكێشانی مانەوە لەماڵەوەو نەمانی كارو بەتاڵبوونی گیرفانەكان، وایكرد چینی هەژار لەتوانایاندا نەمێنێت و هاواری ئەوە بكەن كە ئەگەر كۆرۆناش نەمانكوژێت برسێتی دەمانكوژێت.
هەندێك لەوڵاتان لەترسی ئەوەی كە ئابوورییەكەیان زۆر تووشی ئیفلیجبوون نەبێت، هەرزوو كەوتنە دانانی بودجەی زەبەلاح و هاوكاریی هاووڵاتیان و هەڵگرتنی ئاستەنگی هاتوچۆ، بەتایبەتی وڵاتێكی وەك سویدو چەند وڵاتێكی دیكە، چونكە دەیانزانی شكستخواردنی ئابووریی، دەبێتە هۆی مردنێكی درێژخایەنی وڵات و هاووڵاتیان.
ئێستا لەسەر ئاستی جیهان پاشەكشەیەكی زۆر لەئابووریی بەدی دەكرێت و سندوقی نەختینەی نێودەوڵەتی نیوەی دووەمی ساڵی 2020 ، پێشبینی گەورەترین پاشەكشەی ئابووریی دەكات، كە لەدوای پاشەكشێی ئابووریی دوای یەكەمین جەنگی جیهانییەوە ئەوە تۆمارنەكراوە.
لەم روانگەیەوە ئەوەمان بۆ دەردەكەوێت كە بۆچی هاووڵاتیانی چین هێندە خواردنیان بەلاوە گرنگە؟ چونكە چەندین جار تووشی گرانی و برسێتی بوونەتەوە، ئەو رۆژە رەشانەیان لەبیر ناچێتەوە.
گەلی كورد زۆر نەهامەتی بینیووە، دیارترینیان كۆڕەوی ملیۆنیی 1991 كە زۆربەی خەڵكەكە بێ نان و ئاو بوون، گوێیان بەتەندروستی و پاكو خاوێنی نەدەدا، بەڵكو تەنیا دەستكەوتنی خواردن و زیندوومانەوەیان بەلاوە گرنگ بوو.
ئێستاش گەلی كورد لەبارگرانیی ڤایرۆسی كۆرۆنا و داتەپینی ئابووریی هەرێمدا گیریانخواردووەو بەشی هەرەزۆری مووچەخۆران و كاسبكاران بێكار و بێ پارەن، كە ئەمەش دەبێتە ئاستەنگی ئابووریی و نەمانی پارەی نەختینەو پاشەكشەی ئابووریی و كاریگەریی سەلبیی دوورمەودا.
لەزمانی كوردیدا: كاسەی پڕ ئاشتیی ماڵە یان تێر ئاگای لەبرسی نییە، دەوترێتەوە.
ئەگەر ئەم دۆخە درێژە بكێشێت، رەنگە ئێمەش وەك چینییەكان لەبری ئەوەی بڵێن تەندروستیت چۆنە؟ بڵێن نانت خواردووە؟

وتاری زیاتر

بەهۆشهاتنەوەی نه‌وت‬ ئەكرەم ئەمین
2020-05-09 19:09      42 جار بینراوە

خواردن و پلانی ئابوورییانە‬ ئەكرەم ئەمین
2020-04-27 21:04      52 جار بینراوە



نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو