دەستەی كارگێڕی مەكتەبی سیاسی، لەگەڵ مەڵبەندی خانەقین كۆدەبێتەوە
دەستەی كارگێڕی: دەبێ كەركوك خاڵی وەرچەرخان‌و میحوەری بێ بۆ رووبەڕووبونەوەی تەعریبی نوێی تائیفی

  2018-01-11 18:59      337 جار بینراوە        کۆمێنت
کۆبوونەوەی دەستەی کارگێڕی لەگەڵ مەڵبەندی خانەقین

دەستەی كارگێڕی مەكتەبی سیاسی، لەگەڵ ئەنجومەنی مەڵبەندی خانەقین كۆدەبێتەوەو تیایدا جەختدەكەنەوە، كە: دەبێ كەركوك خاڵی وەرچەخان‌و میحوەری بێ بۆ رووبەڕووبونەوەی تەعریبی نوێی تائیفی‌و مافی سیاسی‌و دیموكراسی میللەتەكەمان.
 
ئێوارەی ئەمڕۆ (2018/1/11) مەلا بەختیار، لێپرسراو و عومەر فەتاح و حاكم قادر، ئەندامانی دەستەی كارگێڕی، لەكۆبوونەوەكەیاندا بەئامادەبوونی شێركۆ میروەیس، ئەندامی سەركردایەتی، لەگەڵ ئەنجومەنی مەڵبەندی خانەقین، دۆخی كوردستان، عیراق، ناوچەكە‌و ئەومەترسیانەشیان رونكردەوە، كە بەهۆی كاریگەری هاوكێشە و ئاڵوگۆڕە نوێیەكان لەناوچەكە، دۆخی ناوخۆی عیراق بەگشتی‌و كوردستان بەتایبەتی بەدۆخێكی ناجێگریدا تێدەپەڕێ‌و تیایدا تەئكیدیشیان كردەوە، كە: دەبێ هەمووان پێكەوە رووبەڕووی تەعریبی نوێی تائیفی لەناوچە كێشە لەسەرەكان ببینەوە.

مەلا بەختیار، لێپرسراوی دەستەی كارگێڕی، پاشئەوەی سەردانەكەی ئەنجومەنی مەڵبەندی خانەقینی بۆ سەر گڵۆكۆی سەرۆك مام جەلال‌و بەخێرهێنانەوەو لەنزیكەوە هەواڵپرسینی هەڤاڵ كۆسرەت رەسوڵ عەلی، جێگری سكرتێری گشتی بەبایەخەوە ناوبرد، ئاماژەی بۆ ئەوەكرد، كە: دەبێ ئێوەی خانەقینییەكان، هەمیشە بەعەقڵی مەدەنیانە ئەركەكانتان رابپەڕێن، بەشێك بن لەچارەسەرو برای برایەتی ناو یەكێتیی بن.
لێپرسراوی دەستەی كارگێڕی، وێڕای ئەوەی مەترسییەكانی سەردۆخی كەركوك‌و خانەقینی بەوردی رونكردەوەو ئاماژەی بەو پلانە مەترسیدارانە كرد، كە بۆ ناوچەكە داڕێژرابوو، دۆخی ئارام‌و ئاسایشی خانەقین‌و گەرمەسێری بەگرنگ ناوبردو وتی: خانەقین بەتەحەدا نا، بەڵكو بە بەرنامەرێژی‌و بەعەقڵی ورد پارێزرا، كە بووە هۆی ئەوەی بەر بە مەترسییەكان بگیرێت‌و ئاسایش‌و ئارامی پارێزراو بێت.
وتی: ئێستاش كە خانەقین پارێزراوە، مانای ئەوە نییە، پەیوەندییەكی ئۆرگانیكی بەناوچە كێشە لەسەرەكان‌و مادەی (140)‌و هەرێمی كوردستانەوە نییە. چونكە هەبون دوو ساڵە دەیانویست دۆخی خانەقین تێكبدەن‌و ئاسایش‌و ئارامییەكەی بشێوێنن‌و تەئكیدیشی كردەوە: ئێستاش پرسیار ئەوەیە چی بكەین؟‌و  رایگەیاند: خانەقین بەقەد خۆی كاریگەری بەسەر رووداوەكانەوە هەیە، بەڵام ئەوەی دەتوانێ هاوكێشەی باشوری كوردستان بگۆڕێت كەركوكە، هەروەك چۆن ئەوەی دۆخەكەی لەهەڵدێر نزیكخستەوە، هەر كەركوك بوو. وتیشی: 
دروستكردنی لیستی هاوبەش لەناوچە كێشە لەسەرەكان‌و مادەی (140)، پێشنیازی یەكێتییەو لەو بارەیەشەوە، بەرچاو روونی زیاتری خستەڕوو. رایگەیاند: 
دەبێ بەئاگابین و نەهێڵین، تەعریبی نوێی تائیفی لەكەركوك بنكە دابنێت‌و جومگە جیاوازەكان كۆنتڕۆڵ بكات، چونكە بە لەدەستدانی كەركوك، دەبێ دڵنیابین، كە خانەقینیش لەدەستدەدەین. بەڵام ئەگەر هاوكێشەكان بگۆڕین، بەهەر رێگایەكی دیالۆگ، رێككەوتن‌و بەرگری بێ، ئەوا دەتوانین لەزۆرێك لەناوچە كێشە لەسەرەكان دڵنیابین‌و ناشكرێ، ئەو پەیوەندییە ئۆرگانیكییە نەبینین كە لەنێوان ناوچە كێشە لەسەرەكان هەیە.
لەبەشێكی تری وتەكانیدا، مەلا بەختیار، ئاماژەی بە هەلومەرجی ناوچەكەو رۆژهەڵاتی ناوەڕاست كردو بەهەلومەرجێكی شێواوی ناوبردو وتی: غروری عەسكەری بۆ هیچ كەسێك ناچێتە سەرو لەمێژووشدا روونە، هەر وڵاتێك تووشی غروری عەسكەری بوبێت، هەرەسی هێناوە.
هاوكات، رونكردنەوەی زیاتری لەسەر شێواوی سیاسی، ئابوری و ئاسایش لەرۆژهەڵاتی ناوەڕاست خستەڕوو، كە ئەو شێواوییانەش كاریگەری لەسەر ئۆرۆپاش هەیەو هێمای بۆ ئەوەشكرد، كە: نە كوردستان بەتایبەتی و نەعیراقیش بەگشتی ناتوانێ لەكاریگەرییەكانی ئەو شێواوییەو هاتنە ئارای ئاڵوگۆڕە نوێیەكان بەدەر بێت.
لەو دیدەشەوە، دۆخی شێواوی عیراق‌و ئەگەرەكانی بەردەم تێكچوونی دۆخی حوكمڕانی‌و رێككەوتنی نێوان هێزو لایەنە سیاسییەكان تاوتوێكردو ئاماژەی بۆ ئەوەكرد، كە: هەر هاوكێشەو ئاڵوگۆڕێك كاریگەری لەسەر كوردستان دەبێت‌و وتی: 
بەشێكیش لەدۆخی ئێستای هەرێم، پەیوەندی بەشێواوی دۆخی هەرێمایەتی‌و ناوچەكەوە هەیەو بەشەكەی تریشی پەیوەندی بەسیستەمی حوكمڕانی‌و هەڵەكانی رابردووەوە هەیەو رایگەیاند: ئیتر دەبێ تێبگەین كە چیتر بەعەقڵی عەنتەریات سیاسەت ناكرێت.
وتیشی: ئەوەی لەم دۆخەدا ئیتر باوی نەماوە، هەموو ئەو لێپرسراوە بازرگان‌و ترسنۆكانەن كە لەبری خەمی خەڵك، خەمی بەرژەوەندییە ئابوریی‌و بازرگانییەكانیانە‌و جەختیشیكردەوە:
ئێمەو مانان كە قسە ناكەین، نامانەوێ ویژدانی برینداری خەڵكی ماندوو زیاتر ئازاربدەین‌و ئازارەكان زیاتر بكەین‌و ئەوەش لەشەرمی یەكێتییە كە هیچ ناڵێین.
لەكۆتایی وتەكانیشیدا لەبارەی جیابوونەوەی بەرهەم ساڵحەوە، لێپرسراوی دەستەی كارگێڕی، وتی:
هەتا دوێنێ كە قسەمان دەكردو رەخنەمان دەگرت، هەوڵدەدرا ئەمە روونەدات، چونكە كاك بەرهەم سووربوو لەسەر باوەڕی خۆیی‌و دوێنێ كۆنگرەی بەست، بەڵام لەمەودوا، قبوڵ ناكەم بەرامبەر ئەو هەڤاڵانە كە لەیەكێتیی چوونەتە دەرەوەو حزبی خۆیان دروست كردووە، هەموو یان ئازادن‌و ئەگەر كەسێكیش هەبێ بیر لەوە بكاتەوە ئیهانەیان بكات، بەشبەحاڵی خۆم بەرگریان لێدەكەم. چونكە ئەوان رێگەی خۆیان‌و ئێمەش رێگەی خۆمان گرتۆتەبەر.

لەبەشێكی تری كۆبوونەوەكەدا، عومەر فەتاح ئەندامی دەستەی كارگێڕی، لەلایەن خۆیەوە، رۆڵی خانەقین‌و خانەقینییەكانی لەخەباتی میللەتەكەماندا بەرزنرخاند‌و ئاماژەی بۆ ئەوەكرد: هەمیشە خانەقین لەخەباتی نەتەوایەتیدا ئامادەیی هەیەو خەڵكەكەشی ئازان‌و كوردپەروەرن‌و وتی:
هەمیشە وا دەڕوانم كە ئێوە لەكارەكانتانداو راپەڕاندنی ئەركەكانتاندا بەیەكەوەن‌و سەركەوتوون، چونكە كوردیەدایەتی پێكەوە كۆی كردوونەتەوە. بۆیە لەهاتنە پێشەوەی سەردەمی ناخۆشدا، قوربانی زۆر دەبەخشن‌و ئازاری زۆر دەچێژن‌و دەربەدەر دەبن. لەسەردەمی خۆشی‌و سەركەوتنیشدا، زۆرینەتان بەشداری سەركەوتنەكان‌و خۆشییەكانی میللەتەكەمان دەكەن. 
عومەر فەتاح، راشیگەیاند: هەردەم وام بینیوە كە خەڵكی ئێوە، لەخەڵكە هەرە تێكۆشەرەكانی ناوچەكەتانن‌و هیچ كاتێكیش لەكوردایەتی كۆڵنادەن‌و كۆڵیشن نادەن هەتا كورد بەئامانجەكانی دەگات‌و سەردەكەوێت.
هەر لەدرێژەی كۆبوونەوەكەدا، حاكم قادر حەمە جان، ئەندامی دەستەی كارگێڕی، لەلایەن خۆیەوە وتی: خانەقین هەم لەبزوتنەوەی رزگاریخوازی گەلەكەمان بەشدارییەكی كاریگەرتان هەبووە، هەم لەئەدەب‌و كەلتوری كوردیشدا، نوسەری گەورەو هەڵكەوتووتان هەیە.
وێڕای ئەوەشی جەختی لەپێویستی كۆبوونەوەكە كردەوە، حاكم قادر حەمەجان، وتی: بەتایبەت ئەم قۆناغەی ئێستای یەكێتیی زۆر جیاوازە، لەقۆناغەكانی رابردووی و باوەڕی خۆیشی نیشاندا كە سەردەمی موجامەلە بەسەرچووەو پێویستە بەئاشكراو بەراشكاوی پەنجە بخەینە سەر برینەكانمان ‌و ململانێكان‌و ئەوەی هەقەو ئەو ناهەقیشە بەراشكاوی قسەی لەسەر بكەین.
حاكم قادر حەمە جان، جەختیشیكردەوە، كە: دەبێ بوێرانەتر بێینە مەیدان بۆ ئەوەی چارەسەری كێشەكانی خۆمان بكەین، چونكە لەم قۆناغەو لەئێستاشدا یەكێتیی رۆڵی میحوەری لەكوردستاندا ‌و لەپرسی نەتەوەیماندا دەگێڕێ‌و ئەمەش پێویستی بەیەكگرتوویی زیاترە لەناوخۆماندا‌و تەئكیدیشیكردەوە:
پێویستە بەهەڵەكانماندا بچینەوەو دەشبێت بزانین كەركوك خاڵی سەرەكی‌و میحوەری هەڵسانەوەی بڕوای میللەتەكەمانەو ئەركی یەكێتیش بەتایبەتی، لەئەركی هەموو لایەنەكانی تر قورسترە.    

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو