بەبیانووی بەشدارنەبوون، مافی پەرلەمانتاری لە لەیلا زانا وەرگیرایەوە

  2018-01-12 15:34      97 جار بینراوە        کۆمێنت
لەیلا زانا.. پەرلەمانتاری هەدەپە لەتورکیا

بەبیانووی دەوامنەكردنی، پەرلەمانی توركیا بڕیاریدا مافی پەرلەمانتاری لە پەرلەمانتاری كورد لەیلا زانا وەربگرێتەوە.
میدیاكانی توركیا رایانگەیاند: ئەندامانی لیژنەكانی دەستوور و داد لە پەرلەمانی توركیا بە بیانوی دەوامنەكردنی وەك پێویست بڕیاریانداوە بە لێسەندنەوەی ئەركی پەرلەمانتاری لە لەیلا زانا نوێنەری بازنەی ئاگری پارتی دیموكراتی گەلان ( هەدەپە ).
نور باخچەكەپلی بریكاری سەرۆكی پەرلەمانی توركیا، لە دانیشتنی دوێنێی پەرلەمانی توركیادا ڕایگەیاند لەیلا زانا لە ١ی تشرینی یەكەمی ٢٠١٦ تا ٣٠ی نیسانی ٢٠١٧ بەشداری لە ٢١٢ دانیشتنی پەرلەمانی نەكردووە و بەو هۆیەشەوە و بەپێی ماددەی ٨٤ی دەستووری توركیا، دەنگدان لەسەر ڕاپۆرتی هاوبەشی هەردوو لیژنەی دادپەروەری و دەستوور و بڕیاری سەرۆكایەتی دیوان لەمبارەیەوە ئەنجام درا.
هەر لە دانیشتنەكەی پەرلەماندا لە كۆی ٣٢٤ پەرلەمانتار، ٣٠٢  پەرلەمانتار دەنگیاندا بەلێسەندنەوەی متمانە و ٢٢ پەرلەمانتاریش ڕەتیانكردەوە.
لەوباریەوە مستەفا شەنتۆپ پەرلەمانتاری  پارتی دادو گەشەپێدان رایگەیاندووە، بڕیارەكە پەیوەست نەبووە بە سوێندخواردنی یاسایی بەڵكو تەنیا پەیوەستە بە دەوام نەكردنییەوە.
لای خۆشیانەوە پارتی دیموكراتی گەلان (هەدەپە) لەتویتێكدا رایانگەیاندووە كە لێسەندنەوەی مافی پەرلەمانتاری لەلەیلا زانا بەبۆچوونی ئێمە هیچ بەهایەكی نییە، چونكە دەنگی ئەو پەرلەمانتارە دەنگی ئاشتی و ئیرادەی گەل و نوێنەری ئێمەیە لەپەرلەمان.
ئەمە دووەم جارە مافی پەرلەمانتاری لە لەیلا زانا پەرلەمانتاری كورد دەسەنرێتەوە، یەكەمجار و لەساڵی ١٩٩١ دا بەهۆكاری سوێند خواردنی پەرلەمانتاریی بە زمانی كوردی ئەو مافەی لێسەندرایەوە. لە ساڵی ٢٠١٥شدا كە بووەوە پەرلەمانتار جارێكی تر بە زمانی كوردی سوێندی خوارد.

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو