ژیاننامه‌ی سه‌رۆک مام جه‌لال...

  2017-10-03 17:34      583 جار بینراوە        کۆمێنت

مام جه‌لال کوڕ‌ی شێخ حیسامه‌دین کوڕ‌ی شێخ نوری کوڕ‌ی شێخ غه‌ فوور. هاوینی ساڵی 1933 له‌ گوندی (که‌لکان)ی قه‌تپاڵی چیای کۆسره‌ت له‌دایکبووه‌، که‌ ده‌ڕ‌وانێته‌ ده‌ریاچه‌ی دوکان، چه‌ند ساڵێک ته‌مه‌نی منداڵی له‌و گونده‌ به‌سه‌ر بردووه‌و دواتر باوکی بووه‌ به‌رێبه‌ری ته‌کیه‌ی تاڵه‌بانی له‌ کۆیه‌. له‌وێ چۆته‌ قوتابخانه‌ی سه‌ره‌تایی و به‌ سه‌رکه‌وتوویی خوێندنی ته‌واو کردووه‌، خوێندکارێکی زیره‌ک لێهاتوو بووه‌، هه‌ر له‌ ته‌مه‌نی منداڵییه‌وه‌ نیشانه‌کانی سه‌رکردایه‌تی به‌ جۆرێ‌ لێده‌رکه‌وتووه‌ که‌ پێش هاوڕ‌ێکانی ده‌که‌وت بۆ کۆڕ‌ی پرسه‌و ئه‌و بۆنانه‌ی له‌و سه‌رده‌مه‌دا به‌ڕ‌ێوه‌ ده‌چوون، به‌یانیان له‌ کاتی ریزبوونی قوتابیاندا، مامۆستاکان پێش هه‌مووان ئه‌ویان هه‌ڵده‌بژارد بۆ خوێندنه‌وه‌ی شیعری نیشتمانیی و نه‌ته‌وه‌یی.

له‌وێوه‌ بیرۆکه‌ی نه‌ته‌وایه‌تی لای ئه‌و چه‌که‌ره‌ی کرد تا وای لێهات ورده‌ ورده‌ به‌سه‌ریدا زاڵ بوو، که‌ گه‌یشته‌ پۆلی چواره‌می سه‌ره‌تایی یه‌کێکبوو له‌ پێشه‌نگه‌کانی خوێندکاران که‌ به‌ په‌رۆشه‌وه‌ به‌شداری له‌ چالاکیه‌کانی قوتابخانه‌ ده‌کردو به‌شداری له‌ وتار خوێندنه‌وه‌و شانۆدا ده‌کرد.

ئه‌گه‌رچی جه‌ژنی نه‌ورۆز له‌لایه‌ن حکومه‌ته‌ یه‌ک له‌دوای یه‌که‌کانی عیراقه‌وه‌ یاساخ بوو، به‌ڵام له‌گه‌‌ڵ ئه‌وه‌شدا گه‌لی کوردستان له‌ 21/ی ئاداری هه‌موو ساڵێک به‌ ئاهه‌نگ یادیان ده‌کرده‌ووه‌، ئه‌ویش به‌هۆی پیرۆزیی ئه‌م جه‌ژنه‌ لای کورد که‌ به‌ رۆژی سه‌رکه‌وتنی گه‌لی کورد داده‌نێن به‌سه‌ر ئه‌و زاڵمانه‌ی ده‌یچه‌وساندنه‌وه‌.

* ساڵی 1945: ئاهه‌نگێکی میللـی له‌ کۆیه‌ بۆ نه‌ورۆز سازکرا، سه‌رۆک تاڵه‌بانی که‌ له‌ ته‌مه‌نی سیانزه‌ ساڵیدا بوو به‌شداری تێدا کردو وته‌ی حه‌ماس ئامێزی خوێنده‌وه‌، بووه‌ مایه‌ی سه‌رسۆڕ‌مانی مامۆستاو به‌شداربووان.

* له‌ ساڵی 1946 دا له‌گه‌‌ڵ چه‌ند هاوڕ‌ێیه‌کی خوێندکارو به‌ ئامۆژگاری یه‌کێک له‌ مامۆستاکانی کۆمه‌ڵه‌یه‌کی فێرکاری نهێنی دامه‌زراندبه‌ ناوی کۆمه‌ڵه‌ی پێشخستنی خوێندنه‌وه‌  (k.p.x) و مام جه‌لال به‌ سکرتێری هه‌ڵبژاردرا، ئامانجێکی کۆمه‌ڵه‌که‌ هاندانی خوێندکاران بوو بۆ خوێندنه‌وه‌ی ده‌ره‌کی.

* له‌هه‌مان ساڵداو دوای دامه‌زراندنی پارتی دیموکراتی کورد له‌ 16/ی ئابی 1946 که‌وته‌ ژێر کاریگه‌ری به‌رنامه‌ی پارتی و له‌ چوارچێوه‌ی رێکخستنه‌کانیدا که‌وته‌ چالاکی خوێندکارانه‌.

* دوای چوونه‌ ناو کاری سیاسییه‌وه‌، رۆژنامه‌ی (رزگاری) که‌ پارتی دیموکراتی کورد به‌نهێنی ده‌ریده‌کرد، کورته‌ وتاری له‌ژێر نازناوی (ئاگر)دا بۆ بڵاو ده‌کرده‌وه‌.

* ساڵی 1947 بوو به‌ ئه‌ندام له‌ پارتی دیموکراتی کوردو چالاک و لێهاتوو بوو له‌و ئه‌رک و فه‌رمانه‌ حزبیانه‌ی پێی ده‌سپێردران.

* ساڵی 1948 خوێندنی سه‌ره‌تایی ته‌واو کردو له‌ ناوه‌ندی کۆیه‌ بوو به‌ خوێندکار، ئه‌و ساڵه‌ به‌ ساڵی (وه‌سبه‌) (راپه‌ڕ‌ین) ناسرابوو، که‌ گه‌لی عیراق توانی په‌یماننامه‌ی (پۆرتسماوس) هه‌ڵبووه‌شێنێته‌وه‌و حکومه‌تی ساڵح جه‌بر بڕ‌وخێنێ و حکومه‌تی محه‌مه‌د سه‌در دابمه‌زرێنێت و له‌و که‌شوهه‌وا ئازادیه‌دا که‌ له‌ سایه‌ی ئه‌م (راپه‌ڕ‌ینه‌) هاته‌کایه‌وه‌، هه‌ڵبژاردنێکی گشتی خوێندکاران ئه‌نجامدرا بۆ هه‌ڵبژادنی نوێنه‌رانی کۆنگره‌ی گشتی.

ئه‌وه‌ بوو سه‌رۆم مام جه‌لال تاڵه‌بانی به‌ نوێنه‌ری خوێندکارانی کۆیه‌ هه‌ڵبژێردراو به‌شداری له‌ یه‌که‌مین کۆنگره‌ی خوێندکارانی عیراقدا کرد که‌ له‌ نیسانی 1948 له‌ گۆڕ‌ه‌پانی (السباع) ی شاری به‌غدا به‌سترا.

* له‌م کۆنگره‌یه‌دا بۆ یه‌که‌مینجار گوێی له‌ شاعیری مه‌زن (محه‌مه‌د مه‌هدی جه‌واهیری) بوو، که‌ شیعره‌ به‌ناوبانگه‌که‌ی (رۆژی شه‌هید)ی خوێنده‌وه‌، که‌ بۆ جه‌ع فه‌ری برای و بۆ شه‌هیدانی وه‌سبه‌ وتبووی. ئه‌و ساتانه‌ له‌ ژیانی سه‌رۆک تاڵه‌بانیدا مێژوویی بوون و وایکرد ببێته‌ یه‌کێک له‌ مریده‌کانی شیعری ئه‌و و دواتریش بوو به‌ ئازیزترین دۆستی و ئه‌و دۆستایه‌تیه‌ تا دواساته‌کانی ژیانی شاعیر به‌رده‌وام بوو.

* ساڵی 1949 و له‌ سایه‌ی حوکمی عور فی و تۆقاندن که‌ کوردستان و عیراقی گرته‌وه‌، سه‌رۆک تاڵه‌بانی له‌ حزبدا سه‌رکه‌وت و بووه‌ ئه‌ندامی لیژنه‌ی ناوچه‌ی کۆیه‌.

* له‌ شوباتی 1951 دا و له‌ کۆنگره‌ی دووه‌می پارتی دیموکراتی کورد، به‌ ئه‌ندامی لیژنه‌ی ناوه‌ندی هه‌ڵبژێردرا، به‌ڵام له‌به‌ر پاراستنی ریزه‌کانی پارتی پله‌که‌ی خۆی به‌ هه‌ڤاڵێکی خۆی به‌خشی که‌ دوای ده‌رچوونی له‌ زیندانی به‌شداری له‌ کۆنگره‌دا کردبوو.

* له‌ ساڵی 1951 دا له‌گه‌‌ڵ چه‌ند هه‌ڤاڵێکدا گیراو بۆ شاری موسڵ دوورخرایه‌وه‌، له‌وێش له‌ خه‌باتی سیاسیدا به‌رده‌وامبوو و دواتر چووه‌ که‌رکوک بۆ ته‌واوکردنی خوێندن و سه‌رله‌نوێ دامه‌زراندنه‌وه‌ی رێکخستنه‌کانی حزب و بووه‌ به‌رپرسی رێکخستنه‌کانی که‌رکوک. له‌هه‌مان ساڵیشدا ئه‌رکی چاپ و بڵاوکردنه‌وه‌ی بڵاوکراوه‌کانی به‌ شێوه‌یه‌کی نهێنی گرته‌ ئه‌ستۆ تا ئه‌و رۆژه‌ی گیرایه‌وه‌.

* ساڵی 1952 چووه‌ کۆلیژی ماف (حقوق) له‌ به‌غدا که‌ ئه‌و ده‌مه‌ رێکخستنه‌کانی پارتی دیموکراتی کورد په‌رته‌وازه‌ بوو، به‌ڵام مام جه‌لال توانیی رێکخستنه‌کانی حزب تۆکمه‌ بکاته‌وه‌.

* له‌ کانوونی دووه‌می 1953 دا به‌شداریی کۆنگره‌ی سێیه‌می پارتی دیموکراتی کوردستانی کردو به‌ ئه‌ندامی کۆمیته‌ی ناوه‌ندی هه‌ڵبژێردراو له‌ مانگی شوباتدا سه‌رپه‌رشتی یه‌که‌مین کۆنگره‌ی یه‌کێتی قوتابیانی کوردستانی کرد و له‌ کۆنگره‌یه‌دا به‌ سکرتێری گشتی قوتابیانی کوردستان هه‌ڵبژێردراو له‌هه‌مان ساڵیشدا یه‌کێکبوو له‌ دامه‌زرێنه‌رانی (یه‌کێتی لاوانی دیموکراتی کوردستان)، هه‌ر له‌و کاتانه‌دا نوێنه‌ری پارتی بوو لای زۆربه‌ی حزبه‌ نهێنێ و ئاشکراکانی عیراقی.

* ساڵی 1954 به‌ ئه‌ندامی مه‌کته‌بی سیاسی هه‌ڵبژێردرا.

* ساڵی 1955 سه‌ فه‌ری ده‌ره‌وه‌ی عیراقی کردو له‌ فێستیڤاڵی لاوان و قوتابیانی جیهانی له‌ وارشۆ به‌شداری کردو له‌وێوه‌ سه‌ردانی یه‌کێتی شووره‌وی ئه‌وساو چینی کرد.

* ساڵی 1956 له‌به‌رچاوان ونبوو، که‌وته‌ خه‌باتی ژێرزه‌مینی و ناچاربوو له‌ قۆناغی چواره‌می مافدا خوێندن به‌جێبهێڵێت.

* ساڵی 1957 سه‌فه‌ری سوریاو مۆسکۆی کردو له‌ فێستیڤاڵی لاوان و قوتابیانی مۆسکۆ به‌شداری کردو هاتنی بۆ سوریا به‌ فرسه‌ت زانی بۆ په‌یوه‌ندی به‌ کورده‌کانی ئه‌وێوه‌و په‌یوه‌ندیه‌کی سیاسی دروستبوو. له‌هه‌مان ساڵیشدا گه‌ڕ‌ایه‌وه‌ عیراق و به‌شداری له‌ کاره‌کانی مه‌کته‌بی سیاسی پارتی دیموکراتی کوردستانی یه‌کگرتوو کردو بوو به‌ به‌رپرسی رۆژنامه‌ی (خه‌باتی کوردستان) که‌ له‌ سلێمانی به‌نهێنی ده‌ریان ده‌کرد.

* له‌ یه‌که‌مین رۆژی سه‌رکه‌وتنی شۆڕ‌شی 14/ی گه‌لاوێژی ساڵی 1958، سه‌رپه‌رشتی رێکخستنی خۆپێشاندانی جه‌ماوه‌ری سلێمانی کردو به‌ هاوکاری هه‌ڤاڵانی حزب له‌نێو شاردا، پاشان چووه‌ به‌غداو به‌شداری له‌ کاروباری مه‌کته‌بی سیاسی و ده‌رکردنی گۆڤاری (رزگاری) (التحریر)دا کرد، هه‌روه‌ها ئه‌رکی ئه‌و خه‌باته‌ی له‌ئه‌ستۆ گرت که‌ له‌نێو ریزه‌کانی حزبدا فراوان ده‌بوو، وه‌ک پێویستییه‌کی بوونی حزبێکی پێشڕ‌ه‌وی کوردستانی و رێکخراوه‌ پێشه‌ییه‌کان به‌رهه‌ڵستکاری کردنی ئه‌و هه‌وڵانه‌ی که‌ ده‌یانویست پارتی دیموکراتی کوردستان بکه‌نه‌ پاشکۆی حزبێکی عیراقی.

* ساڵی 1959 جارێکیتر به‌ ئه‌ندامی کۆمیته‌ی ناوه‌ندی پارتی دیموکراتی کوردستان و مه‌کته‌بی سیاسی هه‌ڵبژێردرا و له‌هه‌مانکاتدا ئه‌فسه‌ری یه‌ده‌کی که‌تیبه‌ی چواره‌می تانک بوو، هه‌روه‌ها به‌شداری له‌ ده‌رکردنی رۆژنامه‌ی (خه‌بات)دا ده‌کرد که‌ به‌ زمانی عه‌ره‌بی ده‌رده‌چوو و به‌ ناوی (پیرۆت)ه‌وه‌ وتاری تێدا بڵاوده‌کرده‌وه‌.

* ساڵی 1960 به‌رپرسی لقی سلێمانی و ئه‌ندامی مه‌کته‌بی سیاسی بوو که‌ خولێکی هۆشیاری بۆ کادێره‌کان کرده‌وه‌.

* ساڵی 1961 بووه‌ سه‌رنووسه‌ری رۆژنامه‌ی (کوردستان) و دوای داخستنی رۆژنامه‌ی خه‌بات دووچاری راونان بوو له‌ به‌غدا، به‌ڵام له‌ شه‌وی نه‌ورۆزی هه‌مان ساڵدا وتارێکی دژی دیکتاتۆریه‌ت خوێنده‌وه‌و به‌رگری له‌ بارزانی خوالێخۆشبوو کرد که‌ ئه‌و سه‌رده‌مه‌ قاسم کۆمه‌ڵێک تاوانی دابۆوه‌ پاڵ له‌ ئه‌نجامی ئه‌وه‌دا فه‌رمانی گرتنی ده‌رچوو و به‌نهێنی گه‌ڕ‌ایه‌وه‌ سلێمانی و خۆی شارده‌وه‌و به‌شداری له‌ رێکخستنی مانگرتنی گشتیدا کرد که‌ له‌ شه‌شه‌ی ئه‌یلولدا کرا.

* له‌ ئه‌یلولی 1961 دا که‌ شۆڕ‌ش هه‌ڵگیرسا، به‌رپرسی ناوچه‌ی سلێمانی بوو، یه‌که‌مین بنکه‌ی شۆڕ‌شی له‌ چه‌می رێزان کرده‌وه‌و سه‌رپه‌رشتی کردو فه‌رمانده‌یی هێزی پێشمه‌رگه‌ی لیوای سلێمانی کرد تا وای لێهات زۆر فراوان بوو و بووه‌ هێزێکی گه‌وره‌، ئه‌وه‌ بوو کرا به‌ لێپرسراوی هێزی پێشمه‌رگه‌ی کوردستان.

* له‌ نه‌ورۆزی 1962 دا، سه‌رکردایه‌تی ئه‌و هێڕ‌شه‌ به‌رفراوانه‌ی کرد بۆسه‌ر ناوچه‌ی شارباژێڕ‌و له‌ ماوه‌ی چه‌ند رۆژێکدا ده‌ست به‌سه‌ر هه‌موو بنکه‌ی پۆلیسی ناحیه‌ی بناوه‌سووته‌و چوارتادا گیراو هێزه‌کانی به‌ره‌و‌ قه‌زای پێنجوێن بردو ته‌واو ناوچه‌که‌یان ئازاد کرد.

به‌مشێوه‌یه‌ هه‌ردوو ناوچه‌ی شارباژێڕ‌و پێنجوێن بوونه‌ دوو ناوه‌ندی شۆڕ‌ش و سه‌رکردایه‌تی. له‌ 1962 ـ 1963 زۆربه‌ی ناوچه‌کانی قه‌ره‌داغ و قه‌ڵاسێوکه‌و گه‌رمیان و سه‌نگاو ئازادکران. ئه‌و ده‌مه‌ مام جه‌لال فه‌رمانده‌ی هێزی رزگاری بوو، له‌هه‌مانکاتیشدا سه‌رپه‌رشتی دامه‌زراندنی ناوه‌نده‌کانی به‌مۆ و هه‌ڵه‌بجه‌و ته‌وێڵه‌و بیاره‌ی ده‌کرد.

* ساڵی 1963 و دوای کوده‌تا ره‌شه‌که‌ی شوبات، مام جه‌لال به‌ سه‌رۆکی وه‌ فدی کوردی ده‌ستنیشان کرا بۆ گفتوگۆ له‌گه‌‌ڵ حکومه‌تی تازه‌دا که‌ له‌ سه‌رتادا ره‌زامه‌ندیان له‌سه‌ر گفتوگۆو چاره‌سه‌ری ئاشتیانه‌ی کێشه‌ی ره‌وای کورد نیشاندا، هه‌روه‌ها سه‌ردانی کۆماری میسری و جه‌زائیری کردو چاوی به‌ عه‌بدولناسرو بن بێلا که‌وت و له‌هه‌مان ساڵیشدا سه‌ردانی ئه‌وروپای کردو نوێنه‌رایه‌تی شۆڕ‌شی کوردستانی کردو سه‌رکه‌وتوو بوو بۆ ناساندنی کێشه‌ی کوردو ئاشکراکردنی بارودۆخی کوردستان و کۆکردنه‌وه‌ی یارمه‌تی و هاوکاری بۆ شۆڕ‌ش له‌ وڵاتانی فه‌ره‌نسا، ئه‌ڵمانیا، روسیا، چیکسلۆ فاکیا و نه‌مسا.

* ساڵی 1964 گه‌ڕ‌ایه‌وه‌ کوردستان و ئه‌رکی خۆی له‌ فه‌رمانده‌یی کردنی هێزی رزگاری گرته‌وه‌ ئه‌ستۆ.

* ساڵی 1967 به‌شداری له‌ کۆڕ‌ی (ئیشتراکیه‌کانی عه‌ره‌ب) کرد له‌ جه‌زائیرو لێکۆڵینه‌وه‌یه‌کی زۆر به‌پێزی ده‌رباره‌ی کێشه‌ی کوردو شه‌رعیه‌تی بزووتنه‌وه‌ی رزگاریخوازی گه‌لی کوردو دۆستایه‌تی نێوان کورد و عه‌ره‌ب پێشکه‌شکرد.

* ساڵی 1970 رۆڵی کاریگه‌ری خۆی بینی له‌ یه‌کگرتنه‌وه‌ی هه‌ردوو باڵی پارتی دیموکراتی کوردستان که‌ پێشتر ببوونه‌ دوو باڵ و ناکۆکیه‌کی تاڵ و خوێناوی له‌ نێوانیاندا هه‌بوو.

* ساڵی 1972 سه‌فه‌ری ده‌ره‌وه‌ی عیراقی کردو ماوه‌یه‌ک له‌ لوبنان و میسرو سوریا مایه‌وه‌و دوای رووخاندنی شۆڕ‌شی کورد که‌ له‌ ئه‌نجامی رێکه‌وتننامه‌ی نێوان سه‌دام و شای ئێران له‌ ئاداری 1975 له‌ جه‌زائیر ئیمزاکرا، سه‌رۆک تاڵه‌بانی هه‌ر له‌و ناوچانه‌دا مایه‌وه‌.

* له‌ 1-6-1975 له‌ دیمه‌شق له‌گه‌‌ڵ ده‌سته‌یه‌ک له‌ هه‌ڤاڵانیدا یه‌کێتیی نیشتمانیی کوردستانیی دامه‌زراندو نه‌خشه‌ی بۆ هه‌ڵگیرسانه‌وه‌ی شۆڕ‌شی نوێ دانا که‌ له‌ 01/ی حوزه‌یرانی 1976 راگه‌یه‌نراو بووه‌ سکرتێری گشتی یه‌کێتی.

* له‌ ساڵانی دوای دامه‌زراندنی یه‌کێتی له‌سه‌ر چالاکی سیاسی و سه‌رکردایه‌تی حزب و شۆڕ‌ش به‌رده‌وام بوو له‌گه‌‌ڵ هه‌ڤاڵه‌کانی له‌ چیاو ئه‌شکه‌وته‌کانی کوردستاندا ده‌ژیا.

* به‌ گه‌واهی زۆر له‌ چاودێره‌ سیاسیه‌کان یه‌کێک بووه‌ له‌ بزوێنه‌ری سه‌ره‌کی بۆ لێک نزیککردنه‌وه‌ی بۆچوونه‌کان له‌نێو ریزی ئۆپۆزسیۆنی عیراقی له‌ کۆنگره‌کانی نیویۆرک و له‌نده‌ن و سه‌ڵاحه‌دین و هه‌موو دانیشتنه‌کانی دوای ئه‌وانه‌ش که‌ په‌یوه‌ندی به‌ رێکخستن و نزیکبوونه‌وه‌ی ماڵی عیراقییه‌وه‌ هه‌بوو، میوانداری زۆربه‌ی زۆری هێزه‌ عیراقیه‌کانی کرده‌وه‌ له‌ کوردستان و پشتگیری هه‌مه‌ جۆره‌ی کردوون.

* له‌سه‌ر گۆڕ‌ه‌پانی نێوده‌وڵه‌تیش، سه‌رۆک تاڵه‌بانی به‌شداری چه‌ندین کۆنگره‌و کۆبوونه‌وه‌ی ئیشتراکی نێوده‌وڵه‌تی کرده‌وه‌و چاوی به‌ سه‌رکرده‌ سیاسییه‌ نێوده‌وڵه‌‌تیه‌کانی زۆر وڵاتانی جیهانی که‌وتووه‌.

* جگه‌له‌وه‌ی که‌ که‌سایه‌تیه‌کی سیاسییه‌ خه‌باتگێرێکی هۆشمه‌ندو نووسه‌رو یاساناسه‌، وه‌ک رۆژنامه‌نووسێکیش له‌ رۆژنامه‌ی نهێنی و ئاشکرادا نووسیویه‌تی و له‌ ساڵی 1959 به‌ ئه‌ندامی ئه‌نجومه‌نی سه‌ندیکای رۆژنامه‌نووسانی عیراقی هه‌ڵبژێردرا که‌ شاعیری مه‌زن محه‌مه‌د مه‌هدی جه‌واهیری نه‌قیبی بوو.

* سه‌رۆک تاڵه‌بانی جگه‌له‌وه‌ی یه‌کێکه‌ له‌ سیاسی و دیپلۆماسی و رۆژنامه‌نووسه‌ره‌ دیاره‌کان، نووسه‌رێکی ناوداریشه‌و به‌ شێوه‌یه‌کی کاریگه‌ر به‌شداری له‌ تیشک خسته‌سه‌ر تێکڕ‌ای بزووتنه‌وه‌ی سیاسی عیراق و ناوچه‌که‌و بزووتنه‌وه‌ی سیاسی کوردی کرده‌وه‌، له‌م بواره‌شدا چه‌ندین کتێبی له‌ سه‌رده‌می جیاجیادا نووسیوه‌ که‌ کتێبخانه‌ی عه‌ره‌بی و کوردی ده‌وڵه‌مه‌ند کرده‌وه‌و بوونه‌ته‌ سه‌رچاوه‌یه‌کی گرنگ بۆ لێکۆڵینه‌وه‌ له‌ بواری مێژووی جوڵانه‌وه‌ی سیاسی کوردی و عیراقیدا.

* دوای ئازادکردنی عیراق به‌ ئه‌ندامی ئه‌نجوومه‌نی حوکم هه‌ڵبژێردراو له‌ مانگی نۆڤه‌مبه‌ری 2003 دا سه‌رۆکایه‌تی ئه‌نجوومه‌نی کردو له‌م ماوه‌یه‌دا کارامه‌یی خۆی له‌ هه‌ڵسوڕ‌اندنی کاروباری حوکم نیشاندا.

* له‌ 06/ نیسانی 2005 مام جه‌لال 227 ده‌نگی له‌ کۆی 248 ده‌نگی ئه‌ندامانی کۆمه‌ڵه‌ی نیشتمانی عیراقی به‌ده‌ستهێناو به‌ هه‌ڵبژاردنێکی راسته‌وخۆ به‌ یه‌که‌مین سه‌رۆکی هه‌ڵبژێراوی عیراق هه‌ڵبژێردرا، به‌مجۆره‌ سه‌رۆک تاڵه‌بانی له‌ فراوانترین ده‌روازه‌کانه‌وه‌ چووه‌ ناو مێژووی کوردو هه‌روه‌ها له‌ جوانترین ده‌روازه‌شه‌وه‌ چووه‌ ناو مێژووی عیراق و له‌ ناودارترین ده‌روازه‌شه‌وه‌ چووه‌ نێو مێژووی سیاسی و دیموکراسی جیهانه‌وه‌.

*له‌ساڵی 2005  تا ساڵی 2014 بۆ دوو خول وه‌ک سه‌رۆک کۆماری عیراق هه‌ڵبژێردراوه‌.

*له‌ 17-12-2012 له‌ به‌غدا توشی جه‌ڵده‌ی مێشک بوو، پاشان بۆ چاره‌سه‌ر گه‌یه‌نرایه‌ نه‌خۆشخانه‌یه‌ک له‌ وڵاتی ئه‌ڵمانیا و پاش ماوه‌یه‌ک به‌ ته‌ندروستیه‌کی باشه‌وه‌ گه‌ڕایه‌وه‌ شاری سلێمانی.

*له‌و کاته‌شه‌وه‌ تا کۆچی دوایی کرد، چه‌ند جارێک بۆ مه‌به‌ستی چاره‌سه‌ر سه‌ردانی وڵاتی ئه‌ڵمانیای کردو له‌ رۆژی 3-10-2017  دڵه‌ گه‌روه‌که‌ی له‌ لێدان و که‌وتوو و کۆچی دوایی کرد.

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو