ئەڵمانیا داوای پەنابەر دەكات

  2019-12-14 19:20      1203 جار بینراوە        کۆمێنت

بەمەبەستی پڕکردنەوەو چارەسەری کێشەی کەمیی دەستی کارو کرێکاری پسپۆرو دەستڕەنگین حکومەتی ئەلمانیا بەنیازە لەئاداری ساڵی داهاتووەوە یاسای نوێی کۆچبەری بخاتە بواری جێبەجێکردنەوەو دەستی کرێکار بۆ ئەڵمانیا پەلکێش بکات.
بڕیاریشە بەسەرپەرشتی ڕاستەوخۆی ئەنگێلا مێرکلی راوێژکاری ئەڵمانیا رۆژی دووشەممەی داهاتوو لوتکەیەکی پسپۆری توێژینەوە بەمەبەستی ڕاکێشانی دەستی کرێکار بۆ ئەڵمانیا بەڕێوەبچێت.
بەپێی ئەم یاسایە دەرگا لەبەردەم هاتنی دەستی کرێکاری بیانیدا دەکرێتەوەو حکومەتیش کارئاسانی ڤیزای کاریان بۆ دەکات.
بەپێی راگەیاندراوێکی تایبەت بەو کۆبونەوەیە کە ئەمڕۆ 14 كانونی یەکەمی 2019 وێنەیەکی بەتۆڕی میدیایی ئەڵمانی گەیشتووە، بڕیارە لەو کۆبونەوەیەی رۆژی دووشەممەی داهاتوودا کە لەدیوانی راوێژکاری ئەڵمانیا  دەبەسترێ جگە لەڕاوێژکاری ئەڵمانیا هەریەک لە پیتەر ئەتلمایەر وەزیری ئابووری فیدرالی و نوێنەری هەرێمە فیدرالیەکان و لایەنە بەرپرس و پسپۆڕییەکان و سەندیکاکانی کرێکاری بەشداری تیا دەکەن..
لەڕاگەیاندنەکەدا ئەوەش هاتووە: ئەڵمانیا لەسەر ئاستی جیهان رووبەڕووی کێبڕکێی گەورەی تایبەت بەدابینکردنی دەستی کرێکاری بەتوانا لەدەرەوەی ولاتەکەی دەبێتەوە، بۆیە ئەڵمانیا بەنیازە بوارێکی باش بۆ کارکردن و زەمینەی رازیکردنی گونجاو بۆ کارو ژیانی کریکارو پێداویستییەکانی دابینبکات و کرێکاری بەتوانا لەدەرەوەی وڵات هانبدات بەسوودوەرگرتن لەهەلی کاری ئەڵمانیا.
یاساکە لەئاداری 2020ەوە کاری پێدەکرێت و کارئاسانی بۆ راکێشانی دەستی کرێکاری بەتوانا لەدەرەوەی یەکێتی ئەوروپا دەکات و بۆ ئەم مەبەستە کارمەندانی باڵیۆزخانەو کونسوڵییەتە گشتییەکانی ئەڵمانیا لەدەرەوە بەمەبەستی راییکردنی خێرای مامەڵەو کارئاسانی پێدانی فیزەو راییکردنی کارەکانیان زیاددەکرێت.
 لەهەر یەکیک لەو باڵوێزخانەو کونسولیاناتەدا بەشی تایبەت بۆ ئەو مەبەستە دەکرێتەوەو لەڕێگەی پۆستی ئەلکترۆنیەوە فۆڕمی تایبەت پڕدەکرێتەوە.
بەپێی زانییاریەکانی ئاژانسی هەواڵی ئەڵمانی کەئەمڕۆ شەممە 14ی کانونی یەکەمی  2019 بڵاویکردەوە، حکومەت هانی هاتنی کرێکاری بیانی ئەدات و نموونەی بەدەستی کرێکاری مەکسیک و بەرازیل و ڤیەتنام و هتد هێناوەتەوە.
باس لەوەشدەکات حکومەت بواری فێرکردنی زمانی ئەڵمانی لەڕێگەی پەیمانگای گوتەوە لەدەرەوەی ولات دەڕەخسێنێ و حکومەت پێشنیاری ئەوەشی کردووە کارگەو کۆمپانیاو دامەزراوە پیشەسازییەکان کەبایەخ بەدەستی کرێکار دەدەن خەرجیی تێچووی خولەکانی فێربوونی زمان لەکاتی پیویستدا بگرنەئەستۆ.
ئەڵمانیا: شیهاب عوسمان

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو