‎ كۆسرەت ڕەسول عەلی لەساڵیادی ئازادكردنی شاری هەولێردا: هەركاتێك كورد یەكگرتوو بێ بەئامانجەكانی دەگات

  2020-03-10 19:04      90 جار بینراوە        کۆمێنت
‎كۆسرەت ڕەسول عەلی

 كۆسرەت ڕەسول عەلی ‎سەرۆكی ئەنجومەنی باڵای سیاسی و بەرژەوەندی ‎یەكێتیی نیشتمانیی كوردستان لەیادی 29 ساڵەی ئازادكردنی شاری هەولێردا، پیرۆزبایی لەخەڵكی هەولێر دەكات و دەڵێت هیوادارم هەموومان لە ئاست گەورەیی و پیرۆزی هەولێردا بین و خزمەتی بكەین.

دەقی پەیامەكە:
‎لە ساڵیادی ڕاپەڕین و ئازادكردنی شاری هەولێری قەڵاو منارە، هەولێری خۆڕاگرو بەعس بەزێن، هەولێری شێرەكوڕان و قارەمانانی خەبات، گەرمترین پیرۆزبایی خۆمتان ئاراستە دەكەم و هیوادارم هەموومان لە ئاست گەورەیی و پیرۆزی هەولێردا بین و خزمەتی بكەین.
‎٢٩ ساڵ پێش ئێستا، لەدوای بڵاوبوونەوەی بروسكەی (لە باوكی ڕێناسەوە بۆ شانەچەكدارەكانی بروسك، لێتانەوە نزیكین دەستبەكاربن) لە ئێزگەی دەنگی گەلی كوردستان، خەڵكی تێكۆشەرو قارەمانی هەولێر، ڕێكخستنەكانی ناو شار، شانە چەكدارەكانی بروسك و شاڵاو، لەگەڵ گزنگی بەیان بە پشتیوانی هێزی پێشمەرگەی كوردستان لە بەرەی كوردستانی ڕاپەڕین و لە ماوەیەكی كورتدا سەرجەم شارەكەیان لە بەعس پاككردەوە و یەكەم هەناسەی ئازادیان كردە دیاری و نێرگزی بەهارو دایان لە یەخەی دایكانی شەهیدو مژدەی سەركەوتنیان پێدان، شانازییەكی گەورەش بوو بۆ من كە بەرەی كوردستانی سەرپەرشتی ئازادكردنی هەولێریان بەمن بەخشی.
‎ئەوێ ڕۆژێ ئازادكردنی هەولێر گرنگییەكی زۆری هەبوو بۆ كوردو سەركەوتنی یەكجارەكی ڕاپەڕین، لەلایەك هەولێر مۆڵگەی سەرەكی دام و دەزگا داپڵۆسێنەرەكانی بەعس بوو، لە لایەكی تریشەوە بۆ هێزی پێشمەرگەی كوردستان سەركەوتن لە هەولێردا بناغەی سەركەوتن بوو بۆ سەرجەم كوردستان و لە هەولێرەوە توانرا هەنگاوەكانی تری ڕزگاركردن دابڕێژرێ و سەركەوتنی یەكجارەكی ڕابگەیەنرێ.
‎ئەمڕۆ كە بیست و نۆ ساڵ تێپەڕ دەبێ بەسەر ڕاپەڕینی هەولێرو ڕزگاركردنی شارەكە، بەداخەوە سەرجەم ئامانجەكانی ڕاپەڕین  بەدینەهاتوون، پێویستە لەسەرمان هەوڵی بەدیهێنانیان بدەین و لە بەرامبەر خوێنی شەهیدان و خەباتی تێكۆشەرە قارەمانەكانمان لێپرسراوانە مامەڵە بكەین و خەبات بكەین بۆ گەیشتن بە ئاواتەكانمان، ئەم هەنگاوەش تەنهاو تەنها بە یەكڕیزی نێوان لایەنە سیاسییەكان بەدی دێت و ئەركە لەسەرمان وەك ڕۆژانی ڕاپەرین بە ڕۆحێكی كوردانەی نیشتمانیەوە لەپێناو گەلەكەمان خەبات بكەین و خاوەنی یەكگوتاری یەكگرتووی نیشتمانی بین و هەوڵی بەدیهێنانی بدەین. 
‎ڕاپەڕین و دەستكەوتەكانی سەلماندی هەركاتێك كورد یەكگرتوو بێ بە ئامانجەكانی دەگات و شكست بە پیلانی دوژمنان دێنێ، ئەمڕۆش لەهەموو كات زیاتر پێویستمان بەم یەكڕیزییەیە.
‎جارێكی تر پیرۆزبایی ساڵیادی ڕاپەڕین لە هەموو خەڵكی كوردستان بەگشتی و هەولێر بە تایبەتی دەكەم.

‎كۆسرەت ڕەسول عەلی
‎سەرۆكی ئەنجومەنی باڵای سیاسی و بەرژەوەندی
‎یەكێتیی نیشتمانیی كوردستان

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو