لاهور شێخ جەنگی بۆ لێپرسراوی مەڵبەندەكان: نابێت هیچ بەربەستێك لەنێوان جەماوەر و بەرپرساندا هەبێت

  2020-03-11 19:29      313 جار بینراوە        کۆمێنت
كۆبونەوەی مەڵبەندەكانی ڕێكخستنی یەكێتیی نیشتیمانیی كوردستان.. ١١-٣-٢٠٢٠

بەسەرپەرشتی لاهور شێخ جەنگی هاوسەرۆكی یەكێتیی نیشتیمانیی كوردستان و ئامادەبوونی شاڵاو عەلی عەسكەری لێپرسراوی مەكتەبی ڕێكخستن، دوا نیوەڕۆی ئەمڕۆ چوارشەممە ۲٠۲٠/۳/۱۱ یەكەمین كۆبونەوەی مەڵبەندەكانی ڕێكخستنی یەكێتیی نیشتیمانیی كوردستان بەڕێوەچوو.
دەستپێكی كۆبوونەوەكە بەچەند ساتێك وەستان بۆگیانی پاكی شەهیدانی ڕێگای ڕزگاری كوردستان دەستی پێكرد، پاشان لاهور شێخ جەنگی بەناوی سەرۆكایەتی یەكێتیی نیشتیمانیی كوردستان پیرۆزباییەكی گەرمی ئاڕاستەی بەرپرسی مەكتەبی ڕێكخستن و هەڤاڵانی لێپرسراوی مەڵبەندەكان كرد، دواتر هاوسەرۆك تیشكی خستە سەر ئەوەی كە هەڤاڵانی لێپرسراوی مەڵبەندەكان ڕوگەی سیاسەتەكانی یەكێتیی نیشتیمانیی كوردستان دەكەن لەناوچەكانی خۆیاندا بۆیە ئەركێكی گەورە و قورس و گران دەكەوێتە سەرشانیان، بۆیە دەبێت هەمیشە دەرگای مەڵبەند و كۆمیتەكان بەڕووی هاوڵاتیان و كادر و كەسوكاری شەهیدان دا كراوەبێت.
 لاهور شێخ جەنگی جەختی كردەوە بەهیچ جۆرێك ڕێگا دەستەگەری نادرێت و چونكە یەكێتیی موڵكی هەموانە، هاوسەرۆك باسی لەوەكرد كە دەبێت بچنە ناو جەماوەر و نابێت هیچ بەربەستێك لەنێوان جەماوەر و بەرپرسان دا هەبێت، چونكە یەكێتیی نیشتیمانیی كوردستان هەڵقوڵاوی نێوخەڵكی كوردستانە و دەبێت بەبێ هیچ جیاوازییەك بەدەنگ گرفت وكێشەكانی هاوڵاتیانەوە بچن، هاوسەرۆك باسی لەچۆنیەتی كاری حیزبی و جەماوەری كرد كە دەبێت جیاوازبن لەكاركردنتان و پەیامی نوێبونەوەی یەكێتیی بگەیەنە چین وتوێژەكانی خەڵكی كوردستان. 
تەوەرێكی تری كۆبونەوەكە گفتوگۆی چڕی نێوان هەڤاڵانی كۆبونەوەكەبوو كەتیایدا لێپرسراوی مەكتەبی ڕێكخستن باسی لەوەكرد كەبەشێوازێكی گەرم وگوڕ كارەكانی مەكتەب ڕێكخستن ڕێك دەخەنەوە دواتر لێپرسراوی مەڵبەندەكان باسیان لەوەكرد كە شەو وڕۆژ دەخەنە سەریەك بۆ ئەوەی سیاسەتی نوێ و بەرنامەی نوێی یەكێتیی نیشتیمانیی كوردستان بڵاوبكەنەوە، دواتر جەخت كرایەوە كە لەدوای كۆنگرەی چوار دەبێت هەموو لایەك هەست بەگۆڕانكاری ونوێبونەوە بكات.

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو