90%ی تووشبووانی ڤایرۆسی كۆرۆنا لە چین چاكبوونەتەوە

  2020-03-23 11:01      155 جار بینراوە        کۆمێنت

دەسەڵاتدارانی چین رایانگەیاند، 90%ی تووشبووانی ڤایرۆسی كۆرۆنا لە وڵاتەكەیان چاكبوونەتەوە، ئەوانەشی كە تائێستا گیرۆدەی نەخۆشییەكەن ژمارەیان لەچەند هەزارێك تێپەڕ ناكات.
بەگوێرەی دواین ئاماری دەستەی كاروباری تەندروستی وڵاتی چین، 90%ی تووشبووانی ڤایرۆسی كۆرۆنا لەو وڵاتە چاكبوونەتەوە، ئەوانەشی كە تائێستا لە نەخۆشخانەكان ماونەتەوەو چارەسەر وەردەگرن، ژمارەیان تەنها پێنج هەزارو 120 كەسن.
دەستەی كاروباری تەندروستی وڵاتی چین رونیكردووەتەوە، ئامارەكانیان ئاماژە بەوە دەكەن كە هەموو رۆژێك ژمارەی تووشبووان بەو ڤایرۆسە لە چین كەمدەكات بە جۆرێك لە كۆی زیاتر لە 81 هەزار كەس كە تووشبووی ڤایرۆسەكە بوون زیاتر لە72 هەزاركەسیان چاكبوونەتەوەو نەخۆشخانەكانیان بەجێهێشتووە گەڕاونەتەوە ماڵەكانی خۆیان.
لە ئامارەكەدا ئەوەشی خستۆتەڕوو كە ژمارەی تووشبووان بە ڤایرۆسی كۆرۆنا لە دەرەوی هەرێمی هوبی و شاری ووهان لە ناوچەكانی دیكەی وڵاتی چین تۆماركراوە كە ژمارەیان 13 هەزارو 293 كەس بووە لە كۆی ئەو ژمارەیەش 117 كەسیان گیانیان لەدەستداوە، بەوەش رێژەی مردن بە ڤایرۆسەكە لە دەرەوەی شاری ووهان تەنها 0.88%. بووە.
ئاماژە بەوەشكراوە، لە شاری ووهان نزیكەی 68 هەزار كەس تووشی ڤایرۆسەكە بوون، لە كۆی ئەو ژمارەیەش سێ هەزارو 135 كەس گیانیان لەدەستداوە كە ڕێژەكەی دەگاتە تەنها 4.65%.
ماوەی چەند رۆژێكە حكومەتی چین هیچ تووشبوویەكی نوێی بە ڤایرۆسی كۆرۆنا لەو وڵاتە تۆمار نەكردووە.

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو