ماوەی شەش ساڵە تیمێكی زانكۆی كامبرێج-ی بەریتانی توێژینەوە لەئەشكەوتی شانەدەر دەكات و دەیەوێ لەڕێگەی ئێسكوپروسكە دۆزراوەكان هۆكاری لەنێوچوونی نیاندەرتاڵەكان روونبكاتەوە.
ئیما ببموروین یەكێك لە توێژەرە تایبەتمەندەكان لەئێسكوپروسكی زانكۆی كامبریدج، بە تۆڕی میدیایی رووداوی راگەیاند: تا ئێستا هیچ ئامرازێكی نوێمان لەبەردەستدا نییە بۆ دڵنیابوون لەوەی ئایا ئەو ئێسكوپروسكانە هی مرۆڤن نێژراون یان نا، بەڵام ئێستا هەلێكمان لەبەردەستدایە بۆ لێكۆڵینەوە لەو پێگە شوێنەوارییە گرنگە.
پرۆڤیسۆر گرەیم باركەر، سەرۆكی تیمەكەی كامبرێج وتی: پێموایە ئەشكەوتی شانەدەر هاوكار دەبێت لەدۆزینەوەی ئەو پرسیارە كە بۆچی نیاندەرتاڵەكان لەنێوچوون؟ ئەوەش وەڵامێكی سادەو ئاسان نابێت، وەڵامە باوەكە ئەوەیە كە نیاندەرتاڵەكان، وەك ئێمەی مرۆڤ سەركەوتوو نەبوون.
ساڵی 1960ی سەدەی رابردوو نۆ ئێسكوپروسك لە ئەشكەوتی شانەدەر دۆزرانەوەو ساڵی رابردووش دەیەمین ئێسكوپروسكی مرۆڤی نیاندەرتاڵ لە هەمان ئەشكەوت دۆزرانەوە. پشكنین و دۆزینەوەی ئەمجارەش رەنگە ببێتە هۆی ئەنجامی تازە كە هۆكاری لەناوچوونی نیاندرتاڵ روونبكاتەوە.
سێ هەزارو 125 ناوچەی شوێنەواری لەباشووری كوردستان تۆماركراون، ساڵانە تیمە بیانییەكان دەیان پارچەی شوێنەواریان دەستدەكەوێت.
بەپێی یاسا و رێككەوتنەكانی حكومەتی هەرێمی كوردستان ئەو پارچە شوێنەوارانەی تیمە بیانییەكان دەیدۆزنەوە دوای لێكۆڵینەوەكان و پشكنینەكانیان دەبێ بیگەڕێننەوە‌و موڵكی هەرێمی كوردستانن.