ئاوات كۆكه‌یی

لەیادی 41 ساڵەی لەسێدارەدانی مامۆستا یوسف و هاوڕێكانیدا

  2020-07-04 21:48      50 جار بینراوە        کۆمێنت

ورەی داگیرساوی ژووری سێدارە
كەم رۆژهەیە لەمێژوودا رۆڵەیەكی ئەم گەلە گیانی خۆی نەكردبێتە قوربانی ئازادی و رزگاری نیشتمانەكەی، زۆرجاریش پۆلێك لەلاوانانی نیشتمان بەخەندەو هوتافەوە چوونەتە بەر پەتی سێدارەو پەیامی سەربەزیی گەل و كۆڵنەدانیان داوەتەوە دوژمن.
رۆژی (4/7/1979)، واتا 41 ساڵ بەر لە ئەمڕۆ چوار لاوی خوێندەوارو ژیر دڵسۆزو خۆنەویست بۆ خاك و نیشتمان ئازایانە چوونە بەر پەتی قەنارەی دوژمن و بە شەهیدبوونی خۆیان، مژدەی ئازادییان دا بەگەلی كوردستان، ئەوانیش شەهیدان (مامۆستا یوسف- ئاری و مەجید كەریم ئەحمەد- غاندی و مامۆستا یونس محەمەد عەلی فەیلی و سیروان حەسەن وەیس) بوون.
شەهید یوسف حسێن قولی حەیدەر ناسراو بە ئاری، دەرچووی زانكۆ و مامۆستا، قارەمانی خەبانی نهێنی و كادرێكی پێشكەوتووی كۆمەڵەی رەنجدەرانی كوردستان و ی.ن.ك بوو.
ساڵی 1953 لە خانەقین لەدایكبووە، قۆناغەكانی خوێندنی سەرەتایی تا ئامادەیی لە خانەقین تەواو كردووە، ساڵی 1971 بۆ درێژەدان بەخوێندن چۆتە سلێمانی و لە كۆلێژی كشتوكاڵی زانكۆی سلێمانی وەرگیراوە، ساڵی 1974 كاتێك لە قۆناغی سێیەمی كۆلێژ بوو لە تێكچوونەوەی گفتوگۆی دەوڵەتی ئەوسای عیراق و شۆڕشی ئەیلول، پەیوەندی بەشۆڕشەوە كردووە، كاتێك زانكۆی سلێمانی لەلایەن شۆڕشەوە لە قەڵادزێ دامەزرایەوە، چۆتەوە كۆلێژەكەی خۆی و درێژەی بەخوێندن داوە، رۆژی 24/ 4/ 1974 شاری قەڵادزێ و زانكۆی سلێمانی بەهۆی بۆردوومانی فڕۆكەكانی رژێمی بەعسەوە وێرانكران، بەو هۆیەوە شەهید ئاری لە خوێندن دابڕایەوە و بوو بەپێشمەرگە.
ساڵی 1975 و دوای شكستی شۆڕش، شەهید ئاری گەڕایەوە بۆ سلێمانی و لە ساڵی 1976دا خوێندنی زانكۆی تەواوكرد و بەكالۆریۆسی لە كشتوكاڵدا بەدەستهێنا، رۆژی 26/9/1977 بە وەك مامۆستا لەئامادەیی كشتوكاڵی بەكرەجۆ، دامەزرا.
ناوەندی كۆمەڵەی رەنجدەرانی كوردستان بە بۆنەی شەهیدبوونی مامۆستا یوسفەوە لەوكاتەدا، پرسەنامەیەك رادەگەیەنێ و تێیدا هاتووە: (هەر لە دوای شكستەكەی شۆڕش لە ساڵی 1975دا پەیوەندی كردووە بەرێكخستنەكانی كۆمەڵەی رەنجدەرانی كوردستانەوە، لەوماوەیەی كاری رێكخراوەیی تا گیران شەهیدكرنی، چەندان ئەركی گران و گرنگی رێكخستنی بەئەنجام گەیاندووە و چەند لێپرسراوێتی پێ سپێردراوە، وەك: ئەندامی لیژنەی باڵای كۆمەڵە بووە لە سلێمانی، لێپرسراوی رێكخراوی كۆمەڵەی رەنجدەران بووە لە سلێمانی، لێپرسراوی هێڵەكانی رێكخستنی كۆمەڵە بووە لە بەغداو خانەقین و كفری، پاڵێوراوی ئەندامی سەركردایەتی كۆمەڵەش بوو).
شەهید مامۆستا ئاری گەنجێكی ئازا و چاونەترسی كۆمەڵە بوو، لێپرسراوێكی هۆشیاو دڵسۆزی رێكخستنەكەی و پێشمەرگەیەكی نهێنی بەجەرگی گەلەكەی بوو، رۆڵێكی باڵای هەبووە لە چالاكییەكانی ناوشاردا.
دوای بەئەنجام گەیاندنی دەیان ئەركی گران و پڕ مەترسی لە خەباتی رێكخراوەییدا، ئاشكرا دەبێت و لە ئەمنی عامەی بەغداوە فەرمانی گرتنی بۆ دەرئەچێت، رۆژی 23/1/1979 لە كاتێكدا مامۆستا ئاری سەرقاڵی تاقیكردنەوەی خوێندكاران دەبێت لە ئامادەیی كشتوكاڵی بەكرەجۆی سلێمانی، هێزەكانی ئەمنی بەغدا بەهاوكاری ئەمنی سلێمانی، لەناو هۆڵی تاقیكردنەوە دەستگیری دەكەن، راستەوخۆش رەوانەی ئەمنی بەغدا دەكرێت و بەهیچ جۆرێك شوێنی زیندانی كردنی نەزانراوە، تا چەند رۆژێك پێش لە سێدارەدانی.
لە زینداندا دەخرێتە ژێر ئەشكەنجەی سەختەوە، جۆرەها ئەشكەنجە و ئازاری جەستەیی و دەروونی دەدرێت، بەڵام وەك كێوی سەربڵند بەرامبەر جەللادەكان دەوەستێتەوەو بەزامەكانی جەستەی توانی هێڵەكانی رێكخست و هەڤاڵەكانی رێكخستنی بپارێزێت.
رۆژی 4/7/1979 لەگەڵ سێ هەڤاڵیدا لە زیندانی ئەبوغرێب لە سێدارەدران و گەیشتنە كاروانی نەمرانی كوردو كوردستان، ئەوانیش شەهیدان: مامۆستا مەجید كەریم ئەحمەد ناسراو بەغاندی- هەڵگری بڕوانامەی بەكالۆریۆس لە زمانی ئینگلزی لە زانكۆی بەغدا.
مامۆستا یونس محەمەد عەلی فەیلی، هەڵگری بڕوانامەی بەكالۆریۆس لەزمانی ئینگلیزی زانكۆی بەغدا.
سیروان حەسەن وەیس هەڵگری بڕوانامەی ئامادەیی كشتوكاڵی خاڵس- دیالە بوو.
سڵاو بۆ گیانی پاكی ئەم شەهیدانە و گشت شەهیدانی كوردستان.

وتاری زیاتر








نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو