ئەكرەم میهرداد

زۆرداری و نەزانیی

  2020-07-11 17:07      105 جار بینراوە        کۆمێنت

ئەلبێر کامۆ لەڕۆمانی تاعوندا ئەڵێ زۆردارییش جۆرێکە لەنەزانی، بەڵام ئەگەر نەزانەکان لەدەسەڵات و زۆردارییدابن، ئەوا دوو جار نەزانیی و زۆردارییە، یەکەمیان ئەوەیە نەزانی زۆردارو دەسەڵاتدار سنوورێک نابینێ و ناناسێ بۆ پیادەکردنی دەسەڵاتە نەزان و زۆردارەکەی. دووەمیان ئەوەیە کە مافی ئەو زانایانە پێشێل دەکەن کە پێویستە لەهەموو بوارەکاندا بڕیاردەرو بەدەسەڵات بن .
دیموکراسی لانیکەم، دیموکراسیی دیفاکتۆ، یان دیموکراسی بەهێزەکان ئەو زاراوانەن کە بیرمەندانی سیاسی و کۆمەڵناسی بۆ ئەو دیوکراتییانە دایانناون کە دەسەڵاتەکەیان جگە لە هەڵبژاردن و فرەیی سیاسی، هیچی دیکەیان نییە، کە عیراق و هەرێمی کوردستان بەرچاوترین شێوازی ئەو کەمترین دیموکراسییەیە.
لەم دەسەڵاتانەداو لەهەموو کایەکانی ژیان و حکومەت و راگەیاندن و سیاسەتدا کەسە بەهێزە بڕیاردەرەکان کەسانی پاشکۆو نەزان و بودەڵە دەکەنە وەزیرو کاربەدەست و بڕیادەرو جێبەجێکەرو قسەکەر، ئەوانیش هەموو نەزانی و درۆو پاشکۆیەتی خۆیان ئەکەنە دەسەڵات و حوکمداری و بەڕێوەبردن و سەرئەنجام جگە لەتوڕەهات و درۆو نەزانین شتێکی دیکە بەرهەمناهێنن .
لەم دەسەڵات و حزب و راگەیاندن و رێکخراوی مەدەنی و فەرمانگەو هتد، تەنیا ئەو کەسانە دەبنە بەرپرس کە لەبڕیادەرە بەهێزەکانەوە نزیکن و کۆمەڵێک فس فس پاڵەوان و درۆزن و ماستاوچی ئەبنە قسەکەر، بڕیاردەرو جێبەجێکەرو سەرئەنجام بەزوڵم و بەنەزانی وڵات وێران دەکەن و بەمەش ناوەستن بەردەوام تەسریحی نەزانانەو پووچ و پڕ لاف و گەزاف ئەدەن .
لەم دەسەڵاتانەدا بەناوی چاکسازییەوە مووچەی خەڵک دەبڕن، بەناوی پارلەمانەوە دیوەخانی نەزانەکان پڕئەکەن لەمووچەی قەبەو زەبەلاح و بەناوی وەزارەتەوە کەسانی نەزان و نەشارەزا دەبنە وەزیرو قسەی پووچ و بێبایەخ دەکەن و خەڵکیش گاڵتەیان پێئەکەن و تۆڕە کۆمەڵایەتیەکانیان لێ پڕئەکەن لەڕەخنە و گاڵتەو نەیاری .
دەسەڵاتی ناوەندە بەهێزەکان هەر حکومەت و بەڕێوەبەرایەتییەکانی دەسەڵات و حزبەکان ناکەنە کاریکاتۆرو گاڵتەجاری، بەڵکو بوارەکانی ژیانی رۆژانەو ئاسایی خەڵکیش ئەشێوێنن و سەدان و هەزاران بەناو رێکخراوی مەدەنی و سایت و رۆژنامەو پەیج و ئەکاونتیان بۆ ئەو پاشکۆ نەزانانە دروستکردووەو هەتا توانیویانە وڵاتیان پڕکردووە لەو درۆزنە نەزان و بوودەڵانەی کە رۆژانە زانیاری ناڕاست و چەواشەکارو بێ بایەخیان کردۆتە وێردی نووسین و میدیاو کەناڵەکانیان. سەرئەنجام دەسەڵات و سیاسەت و حزبی نەزان هەموو وڵاتی کردۆتە پاشکۆ نەزانەکانی خۆی !

وتاری زیاتر



نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو