فەتحوڵڵا حسێنی

پڕۆژەیەك بۆ چارەسەری قەیرانەكانی سوریا نییە

  2020-07-12 22:10      39 جار بینراوە        کۆمێنت

حكومەتەكەی بەشار ئەسەد پێیوایە دەست بەسەرداگرتنی یارمەتییە مرۆییەكان ‌و خاڵە سنوورییەكان دەسەڵاتی سیاسی زیاتر دەكات ‌و جەخت كردنەوەشە لەسەر بوونی سەروەریی ‌و دەسەڵاتی بەسەر هەموو وڵاتەكەدا دوای جەنگێكی ناوخۆیی درێژخایەن كە هێشتا كۆتایی نەهاتووە، ئەمەش قەیرانە مرۆییەكەی هێندەی دی قووڵكردووەتەوە ‌و لای حكومەتی سوریاش پرۆسەی سیاسیی هێندەی تر ئاڵۆز بووە.
لەگەرمەی جەنگی خوێناویی تایفی لەشارەكانی ناوەڕاستی سوریا‌و لەگەرمەی هێرشەكانی توركیاو میلیشیاكانی بۆ سەر باكوور‌و خۆرهەڵاتی سوریا، لەهەرا‌و هەڵپەی دەست بەسەراگرتنی چەك ‌و پەلاماری دڕندانەی میلیشیاكان بۆسەر شار‌و شارۆچكەكانی سوریا، ئێستا چارەنووسی ئەو وڵاتە كە زیاتر لەیەك لەسەر سێی ژێرخانەكەی وێران كراوە، نادیارە. توركیاش پێنج شاری داگیركردووە ‌و شارێكیش هێشتا لەبندەستی بەرەی نوسرەی تیرۆریستدایە، لەگەڵ هەموو ئەمانەشدا بەشار ئەسەد تائێستاش هیچ پڕۆژەیەكی سیاسی یان نیشتمانیی پێ نییە بۆ چارەسەری قەیرانەكانی وڵاتەكەی، تەنانەت دوای سەپاندنی یاسای قەیسەریش لەلایەن ئەمریكاوە بەسەر بەشێك لەجوگرافیای وڵاتەكەدا، هێشتاش سوورە لەسەر ئەوەی هەموو یارمەتییە مرۆییەكان دەبێت لەدەروازەی دیمەشقەوە بهێنرێتە ناو وڵاتەكەیەوە.
ئەسەد كە هێشتا جڵەوی دەستپێشخەریی ئەوەی لەدەستدایە كە هەردوو هێزە بنەڕەتییەكەی سوریا لێك نزیك بخاتەوە، واتە سوپای سوریاو هێزەكانی سوریای دیموكرات، كە پانتایی فراوانی وڵاتەكەیان بەدەستەوەیە، بەڵام هێشتا خەون بەوەوە دەبینێت بگەڕێتەوە بۆ چوارگۆشەی یەكەم ‌و دۆخی پێش 2011، بەبێ ئەوەی هیچ بەرپرسیارێتییەكی ئەخلاقی هەڵگرێت بەرامبەر بەو هەموو رووداوەی وڵاتەكەی لەڕاگواستنی زۆرەملێ ‌و گۆڕینی دیمۆگرافی ‌و شێواندنی نەخشەی وڵاتەكە، بەڵام ئەسەد هێشتا سەرقاڵی خەیاڵ پڵاوییەو دەخوازێت وەك سەركردەیەكی سەركەوتوو خۆی دەربخات، دوای ئەو هەموو وێرانكاریی ‌و جەنگە خوێناوییە‌و گوێ بەهیچ چارەسەرێكی سیاسی نادات ‌و تەنیا لەڕێگەی تاكە سەركردەییەوە نەبێت كە ئەویش دەبێت خۆی بێت.
هەرچەندە ناوچەكانی باكوور‌و خۆهەڵاتی سوریا لەدۆخێكی باشتردا دەژین وەك لەناوچەكانی ژێر دەسەڵاتی ئەسەدو ئۆپۆزسیۆنیش، بەڵام پەكخستنی پڕۆژە بڕیاری كردنەوەی دەروازەی تەل كۆچەر لەنێوان عیراق ‌و سوریادا لەلایەن مۆسكۆو پەكینەوە وەك دووپاتكردنەوەی هاوپەیمانی بۆ ئەسەد، قەیرانی ناوچەكانی باكوور‌و خۆرهەڵاتی سوریا قووڵتر دەكاتەوە، بەتایبەتیش لەسایەی هێرشە دوژمنكارانە‌و بەردەوامەكانی توركیادا، تەنانەت هەندێك جار بەكارهێنانی ڤیتۆ لەلایەن روسیا بەكردەوەیەكی ناجوامێرانە‌و مەترسیدار لەقەڵەم دەدرێت، كاتێك مافی ڤیتۆی لەئەنجومەنی ئاسایش بەكارهێنا بۆ پەكخستنی پڕۆژە بڕیارێك كە دەرگای بۆ یارمەتییە مرۆییەكان دەكردەوە تا بگات بەخەڵكی مەدەنی سوریا.
بەگوێرەی رۆژنامەی گاردیان، بەكارهێنانی ڤیتۆ لەدوای چەندین مانگ دانوستان هات لەنێوان ئەندامانی ئەنجومەنی ئاسایشدا سەبارەت بەكردنەوەی چەند خاڵێكی سنووریی بەرووی یارمەتییە مرۆییەكاندا، بەڵام ئەوە خواستی رژێمی سوریایە كە دەیەوێ دەست بەسەر یارمەتییە مرۆییەكاندا بگرێت.
لەنێوان كۆتوبەندی توندی بەندەكانی یاسای قەیسەر‌و ڤیتۆی روسیا‌و چین دژی گەیاندنی یارمەتیی مرۆیی بە باكوورو خۆرهەڵاتی سوریا‌و فەرمانڕەوایەكدا كە هیچ پڕۆژەیەكی بۆ چارەسەری سیاسی پێ نییە، توركیاش هێرش ‌و پەلامار‌و پێشێلكارییەكانی بۆسەر ناوچەی عەین عیسا لەنزیك كۆبانی زیادكرد، ئەمەش وادەكات هەمیشە بەئاگا‌و ئامادە بۆ بەرپەرچدانەوەی هەر هێرشێكی توركیا بۆسەر ناوچەكە، بەتایبەتیش كە ئێستا توركیا بەردەوام هەڕەشە دەكات ‌و هێزەكانی سوریای دیموكرات تۆمەتبار دەكات بەوەی رێكەوتنەكانی تشرینی یەكەمی 2019 پێشێل دەكات، ئەوەش دەكاتە پاساو بۆ تەواوكردنی پرۆسە سەربازییە نوێكانی ‌و پێشێلكارییەكانی لە ناوچەكەدا.
هەموو ئەمانەش بەبەرچاوی حكومەتەكەی بەشار ئەسەدەوە روو دەدەن ‌و بەئاشكرا بێدەنگەی لێ كردووە‌و هەڵوێستی نییە، وادیارە تەنیا شارەكانی دیمەشق ‌و لازقیەی بەلاوە گرنگە‌و ناوچەكانی دیكە هیچ، ئەمەش فراوانخوازییەكانی زیاتر دەكات، بەتایبەتی كە خۆی بەخاوەنی بڕیار دەزانێت لەمەیدانی جەنگداو هەر كاتێك بیەوێت لەخاكی سوریادا جەنگ بەرپا بكات.

وتاری زیاتر




نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو