هەفتەی ڕابردوو، لە (زۆنی سەوز) ژمارەیەك خۆپیشاندان ئەنجامدران، دیسانەوە وەك جاران، لێكەوتەو كاردانەوەكان نیگەرانكەربون، دووپاتیشان كردەوە، هەندێك خوو و كولتوورو مەرامی سیاسی ‌و كەسیی نەگۆڕاون.
ڕاستیەكی بێخەوش هەیە، بەهۆی خراپیی بژێوی و داتەپینی ئابوورییەوە، كە زەمینەی دەربڕینی ناڕەزایی ‌و خۆپیشاندانی مەدەنیانە لە باشووری كوردستان لەبارە، خۆپیشاندانی دابڕاو لە پیلانی سیاسی و دەستكێشی لایەنی گومناو، مافێكی سەرەتایی خەڵك ‌و دیاردەیەكی دیموكراسیانەیە.
لەدەرەوەی خۆپیشاندەری برسیی ‌و گوزەران داڕماو، كۆمەڵێك پیلان و ئۆخەی سیاسی خۆیان مەڵاسداوە، كە بەخوێندنەوەی سەرپێیانەش، مرۆڤ دەتوانێ بیانبینێت، لەوانە:
-پیلانی بچوكردنەوەو وەدەرنانی یەكێتی لە هاوكێشەكان، یان شێواندنی وێنای سیاسی و جەماوەری یەكێتی، ئەمەیان بە دەستی لۆكاڵی و دەرەكی.
-نزیكبونەوەی هەڵبژاردنەكان، هەڵمەتی پێشوەختەی پرووپاگەندەی هەڵبژاردن، كاراكتەرەكانی ئەمەش زۆرن، هەیە تازە دەركەوتوەو دەیەوێ‌ زوو بناسرێ‌، هەیە پەلەیەتی بگاتە دەسەڵات و هەیشە مەبەستێتی ئەوانی تر ناشرین بكات‌و خۆی بكات بە فریشتە.
-پیلانی گەورەتر لەسەر ئەزمونی هەرێمی كوردستانە، بۆ بچوكردنەوەو زیاتر گۆشەگیركردنی هەرێم، تا ئەو ڕادەیەی كۆتایی پێبهێنن و بەتەواوەتی بخرێتەوە ژێر دەستی ناوەند.
-مەرامی لاوەكی و بچوكیش، پاكتاوكردنی مەسەلەی كەسیی و كۆمەڵایەتیە لەهەندێ‌ شوێن.
بەڵام مەرام و پیلانەكان هەرچیەك بن، بیانو نین بۆ ئەوەی دوای گەڕاندنەوەی ئارامی و تێپەراندنی مەترسیەكان، چاكسازی بنەڕەتی لە حوكمڕانی نەكات و هەرچی زووە بژێوی خەڵك‌و خزمەتگوزارییەكان باش نەكات.
ئەوەی پێیوابێت لێدانی یەكێتی، بە سود وەرگرتن لە كەشی ئازادی زۆنی یەكێتی‌و بە كەرەستەو توانای یەكێتی لەبەرژەوەندیەتی، هەڵەیەكی گەورە دەكات، وەكچۆن ئەوانەشی پێانوایە رووخاندنی ئەزمونی باشوور خاڵی وەرچەرخانە و دۆخێكی باشتر بەدیدەهێنێ‌، هەڵەی گەورەتر دەكەن.
ئەگەر خەونی بچوك‌و نەزۆكی ئەوانە بێتەدی، ئەوا سەدان خەونی گەورە و مێژویی كورد دەمرێ‌‌و دەیان ساڵی تریش دۆخەكە نایەتەوە جێگەی خۆی.
مێژووی دورو نزیكی ئەو كەسایەتی و هێزانە بخوێننەوە، كە پێشڕەوی خەڵكیان كردوە بۆ چاكسازی ‌و گۆڕانكاری و باشكردنی ژیانی خەڵك، بەشی هەرە زۆری ئەوانەی سەركەوتون، ڕاستگۆ بوونە و ئامادەبون وەك خەڵك بژین و وەك خەڵكیش لەپێشەوەی تێكۆشان بن.
ئەزمون‌و رووداوەكانی چەند ساڵەی لایەنە بەرهەڵستكارەكانی باشووری كوردستان، بەتایبەتی لەدوای (2010)، پێچەوانەی ئەم ڕاستیەمان پیشاندەدەن. ئەوانەی دەیانەوێ‌ پێشڕەوی برسیەكان بكەن خۆیان تێرن، ئەوانەشی بانگەشەی چاكسازی دەكەن‌و دەیانەوێ‌ بەگژ گەندەڵیدا بچنەوە، ئەگەر خۆیان تێوەنەگلابن، ئەوە بەشداربوون لە ڕەخساندنی زەمینەی مشەخۆری‌و گەندەڵی.
ئەمجۆرە لە خەبات، فیداكاری‌و دەستبەرداری بونی خۆشی‌و كەیف‌و سەفای ژیانی خۆت‌و ماڵ‌و منداڵی دەوێ‌، دابەزین لە ئۆتۆمبێلی بەبەها و رۆیشتنی لەگەڵ خەڵكدای دەوێ‌. لەبری ئاڕاستەكردن‌و هاندان لەپشتەوە، هاتنە مەیدان و خۆپێشخستنی خەڵكی دەوێ‌.
ڕاستگۆیی گەورەتریش ئەوەیە، سبەی كە هەڵبژاردن بو، یان پۆستەكان دابەشكرا هەڵپەت نەبێ‌ ‌و هەموی ڕەتبكەیتەوەو بڵێی «خۆ من بۆ پۆست ‌و پلە نەمكرد، لەپێناوی خەڵكدا كردم».
دیمەنی خوێنڕشتنی گەنجان‌و وێرانبونی شارو شارۆچكەكان بەهۆی توندوتیژییەكانەوە، چەند ئازاربەخش بوون، لەوەش زیاتر هەڵوێست فرۆشتنەوەو خۆ بەفریشتە پیشاندانی هەندێك، كە دڵنیام هەم خەڵك‌و هەم خۆیشیان باش دەزانن چەواشە دەكەن.
ئەم ناڕاستگۆییە لەگەڵ خود و خەڵكیش دۆخەكە خراپتر دەكەن‌و زیاتر دوورمان دەخەنەوە لە چاكسازی بنەڕەتی و ئەو مافە سەرەتاییەش لە خەڵك زەوت ئەكەن، كە گوزارشت لە خراپیی ژیانیان بكەن.
گوزارشتی كۆتاییش ئەوەیە: یەكێتی، كە زۆنی هەژمون‌و هێزەكەی كراوەتە گۆڕەپانی تاقیكردنەوەی پیلان و خۆدەرخستنی سیاسی‌و كەسیی، نێوماڵی خۆی پتەوبكات‌و هەر خۆی پێشەنگایەتی چاكسازی لە حوكمڕانی ‌و باشكردنی گوزەرانی خەڵك ‌و ئاساییكردنەوەو خاوێنكردنەوەی پرۆسەی سیاسی بكات.