‎شاناز ئیبراهیم ئەحمەد

ئەو تەڵاقەی كەنەكەوت

  2020-09-25 19:43      91 جار بینراوە        کۆمێنت

سەركێشی ڕیفراندۆم كە سێ ساڵ پێش ئێستا‌ لەدەرەوەی كۆدەنگی نیشتمانی و شەرعیەتی پەرلەمان ، وەك جۆرێك لەخۆسەپاندنی سیاسی‌ و پارێزگاریكردن لەكورسییەك بەدەم قاشكردنی سێوێكەوە ئەنجامدرا ، هیچ نەبوو جگە لەمەترسی خستنەسەر دەستكەوتەكانی نەتەوەیەك لەسەفقەیەكی ژێربەژێری شكستخواردوودا ، ئەو سیناریۆ فاشل و بڕیارە هەڵە و ناستراتیژییە ، ئەو دەست لەپشتدانە هەرێمی و لوتبەرزی سیاسییە ، ئەو ملنەدانە بۆ خواستی دڵسۆزان و دۆست و هاوپەیمانان بوو بەهۆی لەدەستدانی نیوەی خاكی كوردستان .
یادی ئەو شانۆگەرییەی كە خۆم هەر لەسەرەتاوە بە (فڕفڕاندۆم) ناوم بردووە وا ئێستا هەمدیس لەلایەن هەمان ئەو كەسانەوە كە هەمیشە شانازییان بەخیانەتەوە ‌كردووە بەناوی كوردایەتی بەخەڵكی دەفرۆشنەوە و جارێك بەتاپۆی ڕەش‌ و جارێكی تریش بەكارتی گوشار ناوی دەبەن ، خۆ ئەگەر لەڕووكەشدا جۆرێك بوو بێت لەختوكەدانی هەستی نەتەوەیی خەڵكی كوردستان ، ئەوا لەناوەڕۆكدا جۆرێك بووە لەخۆچەماندنەوە و ڕادەست بوون بەویستێكی هەرێمی ، بۆ ئەوەی كەركوكی قودس‌ و خاكی بەخوێن ڕزگاركراوی كوردستان بخەنە شەڕێكی نابەرامبەر و دواجار پارێزگاری لەو باڵانسە سیاسییە بكەن كە بەرژەوەندی خۆیانی تێدا پارێزراو بوو ، بەڵام هەر ئەو ئەسحابی فەخامەتانەی بەزمانی كوردی و لەمیدیاكانی خۆیانەوە ڕیفراندۆمیان بەكوردایەتی دەرخواردی خەڵك ئەدا ، لەبەردەم زوومی كامێرای كەناڵە عەرەبی‌ و جیهانییەكان شەرمنانە دووپاتییان ئەكردەوە ، كە ئەوان عێراقییەكی عەیار بیست‌ و چوارن‌ و ئەوەی ڕوویدا ڕاپرسییەكی ئاسایی بوو بۆ زانینی خواستی خەڵك ، لەكاتێكدا ئەو دوو فاقییە لەبەیانكردن خۆی جۆرێكە لەسوكایەتی بەویستی نەتەوەیەك ، چونكە لەدێرزەمانەوە كورد‌ و بزوتنەوە سیاسییەكەی بەشۆڕش‌ و خوێن بەخشین خواستی سەربەخۆیی بەیانكردووە و پێویستی بەهیچ تاقیكردنەوە و ئەزموون كردنێكیتر نەبوو ...!!
خۆ ئەوكاتیش هاوارمان كرد كە كاكە سەربەخۆیی بەپەنجە ڕاوەشاندن و خۆ گیڤ كردنەوە بەدەست نایەت ، چارەنووسی میللەتێك بەعینادی تەسلیمی قەدەر ناكرێت و نابێت گەردن و گەرووی میللەتێك و خاكەكەی بە ھەڕەشەی لەناوچوون بسپێردرێت . ئەوكاتیش ووتمان بەهۆی شەڕی داعش و ئەو هاوسۆزییە نێودەوڵەتییەی بۆ عێراق هەیە ، هەر سەركێشیەك بەتەنها بریتی نابێت لەڕووبەڕووبونەوە و وەستانەوە بەڕووی عێراقدا ، بەڵكو یەكسانیش دەبێت بەوەستانەوە بەرامبەر كۆمەڵگای نێودەوڵەتی ، بەڵام بەپەنجە ڕاوەشاندن و حساب نەكردن بۆ نامەكەی (تیلەرسن) كە زۆر چاودێر وەك بەڵێنی بڵفۆڕ پێناسەیان دەكرد وەڵام دراینەوە …!!
ئەو رۆژگارەی ھاوشێوەی بارام بەگ پەیامنێر و بێژەر و پەرلەمانتار و سیاسی و سەرۆكیش سەری زمان و بنی زمانییان تەڵاقدانی عێراق بوو ، نەیاندەزانی هەژموون و بەرژەوەندی سیاسی وڵاتان و ھاوكێشە نێودەوڵەتیەكانی ئەم ناوچەیە ، زۆر لەوە ئاڵۆزتر و قوڵترە بەو نەفەسە یاری بەھەموو شتێكەوە بكرێت ، سەركێشی بەدەستكەوتەكانەوە كورد لەعێراقدا لەشەریك و ھاوبەشێكەوە دەكات بە شاگرد ، ئەو كات ووترا كە هەموو موستەالزمازتێكی سەربەخۆییمان هەیە كەچی دوو هەفتەی نەبرد بینیمان كە نەك چارەكە مووچەشمان پێ نادرێت بەلكو ‌چڵە پەڵپینەكیش لەبازاڕدا دەست ناكەوێت تا هەر هیچ نەبێت سەرچۆپی گێڕان بیگرنە دەست بۆ تەواوكردنی شاییەكەیان ..!! 
 عاجباتیەكەشی لەوەدا بوو بە بۆنە و بێ بۆنە خۆیان دانیان پێدادەنا كە ئەوان بۆ سەربەخۆیی ڕیفراندۆمیان ئەنجام نەداوە ، بەڵكو بۆ زانینی ڕای خەڵك و تاقیكردنەوە ئەو زەماوەندەیان سازداوە كەچی‌ ئینجاش هەندێك هەر بەردەوام بوون لەپاسپۆرت سوتاندن و سێ بەسێ تەلاق دانی بەغدا ..!!
هەر چەند مانگێكیش دوای هات‌ و هاواری سەربەخۆیی ، ئاڕاستەی سوكانیان بەرەو بەغداد گۆڕی‌ و كەوتنە شەڕی وەرگرتن‌ و دەستهێنانی پلە و پۆست و لە چاوتروكانێكدا (ئەی رەقیب) بوو بە (موتنی) ...!! 

 

وتاری زیاتر

مامه‌ گیان ‬ ‎شاناز ئیبراهیم ئەحمەد
2020-10-03 21:54      80 جار بینراوە




بۆچی تۆقیوون ؟‬ ‎شاناز ئیبراهیم ئەحمەد
2020-05-13 22:04      208 جار بینراوە



نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو