عیماد ئەحمەد

خوێندنەوەیەكی تر بۆ (١٦)ی ئۆكتۆبەر ‏

  2020-10-16 17:29      62 جار بینراوە        کۆمێنت

دڵۆپەی شەونم گریانی گوڵە
لێزمەی باران گریانی ئاسمانە
رووباری سیروان گریانی كوردستانە
١٦ی ئۆكتۆبەریش خۆی گریانە
‏‎ لەمێژووی نوێماندا (١٦)ی ئۆكتۆبەری ساڵی (٢٠١٧)
دواهەمین كارەسات بوو لەلایەن دەسەڵاتدارانی عیراق بەگشتی و لایەنی شیعەی دەسەڵاتدار بەتایبەتی بەسەر كورددا هات، به‌ڵام جیاوازییه‌کی زۆر جه‌وهه‌ریشی له‌گه‌ڵ سته‌م و غه‌دره‌کانی پێشوو هه‌یه‌، چونکه‌ دۆسته‌کانی دوێنێمان لەكاتێكدا هێشتا كفنەكەی هەڤاڵ مام جەلال زەرد نەبووبوو كە (صمام الامان)ی عیراق بوو، به‌هه‌مان سیاسەتی‌ رژێمه‌ دیکتاتۆره‌کان كارەساتێكی تریان دژ بەكوردستان ئەنجامدا.
‎‏‎١٦ ئۆكتۆبەر كارەسات و تاوانێک بوو دژ بە میللەتە ستەمدیدەكەمان، لەم رۆژەدا بەڕوونی هەڵوێستی راستەقینەی بەشێكی شیعەی عەرەب دەركەوت و ماسکی درۆزنانه‌یان بەرامبەر بە ئەزموونی فیدراڵی لەكوردستان داماڵدرا كە چۆن ئەوان لەسەردەمی حوکمڕانی و دەسەڵاتدا بێ بەڵێن و بێ وەفا دەرچوون و چاكەی كوردو بزووتنەوەكەیان له‌به‌رچاو نه‌بوو، بەناوی زۆرینەی پەرلەمانی و لەڕێی حكومەتی مەركەزیی و ئیعلامی چەواشەكاریی، دەستیان خستەناو دەستی هەندێك لەشۆڤێنی سوننەی عەرەب بۆ دژایەتیكردنی خەڵكی كوردستان كە
لەسەردەمی شۆڕش و بەرهەڵستكاریی، چەندین یارمەتی و پشتیوانی و هاوكاریی شیعەی كردووە لەمڕووەشەوە ھاوخەباتی و ھاوپەیمانیی نێوان کوردو شیعە وەک دوو پێکھاتەی زوڵملێکراوی عیراق، مێژوویی بووە. لەدوای رووخانی دەسەڵاتی بەعسیش، بەتایبەتی سه‌رۆک مام جەلال زۆر هەوڵ و كۆششی کردووە بۆ بەهێزكردنی پایەکانی پێکەوەژیان و سازان و پێدانی پێگه‌ی به‌هێز بە شیعەی ھاوخەبات لەدامەزراوە تازەكانی عیراقدا.
‎لەدوای سەرھەڵدانی داعش و پەرەسەندن و سەركەوتنی لەزۆر ناوچەدا كە خەریك بوو لە (كازمیە)و (نەجەف)و (كەربەلا) نزیکببنه‌وه‌. به‌هاوکاریی هه‌موولایه‌ک تێکشکێندران، بەڵام دوای شكستی داعش و رزگاركردنی بەشێكی زۆری ناوچەكانی ژێر دەسەڵاتی بەناو (دەوڵەتی ئیسلامی) بەهاوكاریی هاوپەیمانان و پشتیوانی و یارمەتی هێزی پێشمەرگەی كوردستان بۆ سوپای عیراق و حەشدی شەعبی، بەداخەوە دەسەڵاتدارانی عیراق لەجیاتی سوپاس و پێزانین و پێشكەشكردنی یارمەتی و هاوكاریی بۆ كوردستان، هەلی ریفراندۆمیان قۆستەوەو وەكو ئەوەی هەنگیان لەكونی داردا دۆزیبێتەوە، بەبێ رەچاوكردنی هاوپەیمانێتی و دۆستایەتی، بەدەبابەی ئه‌برامزی ئەمریكی و بەسەرۆکایەتیی عەبادی و بەسەرپەرشتی و پشتیوانیی دەرەكی، پەلاماری كوردستانیاندا. له‌ئه‌نجامیشدا ناوچەیەكی بەرفراوانی كوردستان لەهەرێم دابڕاو ژمارەیەكی زۆری پێشمەرگەی کوردستانیش شه‌هید بوون، به‌مه‌ش ئه‌و ناوچانه‌ دیسانەوە كەوتنەوە ژێر دەستی زوڵم و ستەمی هه‌ندێ لایه‌نی شۆڤینی عه‌ره‌ب و دووبارەبوونەوەی سیاسەتی تەعریب و ته‌هجیری شۆڤێنییەكان دەستیپێکردووە، ئەمە وێڕای سەپاندنی سزای دارایی و ئابووری و ئیداریش به‌سه‌ر هەرێمی كوردستان. ‎
‏‎لەڕاستیدا ریفراندۆم مافێكی رەوایەو رێگایەكە بۆ جێبەجێكردنی ئاشتیانەی مافی چارەی خۆنووسین، بەڵام کاتێک بێ رەچاوكردنی تەرازووی هێزو بەبێ گوێدان بەئامۆژگاریی دۆستان و هەڕەشەی دوژمنان، وەک کورد تاکلایەنە ریفراندۆممان ئەنجامدا، ئەوا وێڕای رەوایەتی مافەکەو سەروەرییەكی مێژوویی، میللەت دەنگی خۆی گەیاندو دووژمنەكانیش گورزی خۆیاند وەشاندو ستەمی رۆژگاری لێكەوتەوه‌.
‏‎لەم سەروبەندی ئه‌م میحنەت و كارەساتەدا، بەداخەوە لایەنە سەرەكییەكانی هەرێمیش له‌بری یه‌کڕیزیی، جارێکی دیکە كەوتنە ناو دۆخی ململانێی سیاسیی توندوتیژو تۆمەتبارکردن و هێرشكردنە سەر یەكتر، لەجیاتی برین ساڕێژكردن، تێزابڕێژی برینە کۆن و تازەكان كرا، دەرئەنجام بەمەش خەڵكی كوردستان زەرەرمەندی یەكەم بوو.
ئه‌وان به‌م په‌لاماره‌ دڕندانه‌یه‌ دوو نیشانیان پێشكاند ناوچه‌یه‌کی زۆریان به‌هێز له‌ئێمه‌ وه‌رگرته‌وه‌، له‌لایه‌کی تریش تۆوی ناکۆکی و دووبه‌ره‌کییه‌کی قووڵیان له‌ناوماندا چاند‏‎.
‏‎ئێستاش دوای تێپەڕبوونی چەند ساڵێك بەسەر ئەو رووداوە، ئەركی راستەقینەی لایەنە سیاسییەكانی سەر گۆڕەپانی كوردستان لەم قۆناغە سەختەدا، دانانی نەخشەڕێگایەکە بۆ چارەسەركردنی هەموو كێشەكان و دەربازبون لەم قەیرانە، ئەوەش خۆی لە یەكڕیزی و یەكهەڵوێستی و یەكدەنگیی ھەموو لایەنە سیاسییەکان ئه‌بینێته‌وه‌ لەڕێگای كۆبوونەوەی فراوان و بەشداریپێكردنی زیاتری خەڵك لەپڕۆسەی سیاسی و كۆمەڵایەتی و ئابووری لەڕێگای رێكخراوەكانی کۆمەڵگەی مەدەنی و هەڵسەنگاندنی زانستی و واقعی بۆ دۆخی ئێستای هەرێم و دەسپێكردنی چاكسازیی راستەقینەی ئیداری و دارایی و ئابووری و سیاسی و شۆڕكردنەوەی دەسەڵات بەشێوەی (لامەركەزی) بۆ پارێزگاكانی هەرێمی كوردستان و رێكخستنەوەی پەیوەندییەكانی هەرێم و عیراقی ئیتحادی لەچوارچێوەی دەستووردا، كە مافە رەواكانی كوردستان لەدابەشكردنی ئەرزو دەسەڵات و داھات و تەواوی شایستەکانی، مسۆگەر بكات.

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو