فەتحوڵڵا حسێنی

نامەی روون‌ و ئاشكرای كورد بۆ دیمەشق

  2020-10-26 18:08      83 جار بینراوە        کۆمێنت

ئەنجومەنی سوریای دیموكراسی لەماوەی رابردوودا هەشت كۆڕی یەك لەدوای یەكی لەناوچەكانی باكوور‌و خۆرهەڵاتی سوریا بەست، كە گرنگترینیان كۆڕەكانی رەقە‌و حەسەكە‌و قامشلو بوو، بۆ تیشك خستنەسەر مافی هەموو پێكهاتەكان لە سوریا وەك دەوڵەتێكی یەكگرتوو، هەروەها تیشك خستنەسەر مافی بەشداربوون لە دامەزراوەكانی ئیدارەی خۆجێیی باكوور‌و خۆرهەڵاتی سوریا‌و پەرەپێدانی ئیدارەی خۆجێیی مەدەنی.
كۆڕەكان كە ئیلهام ئەحمەد سەرۆكی ئەنجومەنی جێبەجێكاری ئەنجومەنی سوریای دیموكراسی سەرپەرشتی دەكردن، جەختیان لەسەر گفتوگۆی (سوریا – سوریا) دەكردەوە ئەوجا لەگەڵ ئۆپۆزسیۆن بێت یان رژێمی ئەسەد، بە تایبەتیش كە گفتوگۆی (كورد‌و كورد) رەنگدانەوەی هەبوو لەسەر چارەسەری سیاسی‌و گشتگیری قەیرانەكان.
ئەنجومەنی سوریای دیموكراسی زۆر نامەی ئاراستەی حكومەتی سوریا كردووە بۆ ئاوڕدانەوە لە چارەسەری سیاسی‌و دووركەوتنەوە لە تێكدانی ئاسایشی ناوچەكە‌و گرەونەكردن لەسەر ئاژاوەنانەوە لە نێوان كورد‌و عەرەبدا، هەروەها بۆ قبوڵكردنی دەستپێشخەرییەكەی كورد سەبارەت بەو بابەتە، بە تایبەتیش دوای ئەوەی بارودۆخی ناوچەكە روو لە خراپیی بوو.
قەیرانی سوریا، درزێكی گەورەی خستۆتە سەرجەم جومگەكانی وڵات‌و ژیانی هاووڵاتیانەوە، پێكهاتەكانی باكوور‌و خۆرهەڵاتی سوریا لەوە تێگەیشتن كە رووداوەكان رۆژ بە رۆژ بەرەو خراپتر دەچن‌و سیستمێكی دیموكراسی دامەزراند لە ناوچەیەكی پڕ لە كارەساتدا، لەگەڵ ئەوەشدا تایبەتمەندی سوریایی خۆی پاراستووە‌و بەردەوامیش هەوڵی نزیكبوونەوە لە گفتوگۆ دەدات، داوای گفتوگۆ دەكات، ئەگەر لە رێگەی دیداری راستەوخۆوە بێت یان لە رێگەی ناوبژیوانە نێودەوڵەتییەكانەوە بێت، یاخود لە رێگەی چەندان نامەوە بێت بۆ دیمەشق، بەڵام دیمەشق خۆی لێیان گێل دەكات بە بیانووی ئەوەی گوایە كورد سوورە لەسەر جیابوونەوە، خۆ ئەگەر كورد سووربوایە لەسەر جیابوونەوە دەستپێشخەری نەدەكرد بۆ دانوستان، كە دواهەمینیان نامەی ئاراستەكراوبوو بۆ دیمەشق لە رێگەی كۆڕەكانی رەقە‌و حەسەكە‌و قامیشلووەوە، هەموو ئەوانەش لە پێناو بەهێزكردنی ئاشتی‌و تەبایی مەدەنی كە 10 ساڵە سوریا بەخۆیەوە نەدیوە.
ئەو بارودۆخەی سەرتاپای سوریای گرتۆتەوە، زۆر ئاڵۆز‌و قەیراناوییە، قەیرانەكەش لەلایەن هێزی دەرەكییەوە بەكاردەهێنرێت، بێ خواستی ناوخۆیی گەلی سوریا، ئەمەش مانای نەبوونی ئیرادەی سوریا دەگەیەنێت لە كۆڕ‌و كۆبوونەوە نێودەوڵەتییەكاندا كە لەلاین ئەو وڵاتانەوە بەڕێوەدەچن كە خۆیان بە زامنی چارەسەر دەزانن، لە راستیشدا ئەوانە ئەو وڵاتانەن كە قەیرانەكە قوڵتر دەكەنەوە، بە تایبەتیش دوای ئەوەی كە توركیا پرۆسەی گۆڕینی دیمۆگرافی روون‌و ئاشكرای لە ناوچە كوردییەكان دەستپێكرد كە خۆی داگیری كردوون‌و كۆمەڵی نێودەوڵەتیش قوڕوقەپی كردووە، هەروەها هاندانی وڵاتانی بەناو زامنكەر بەرەو ئەوەی سوریا بكەنە خۆڵەمیش.
یەكەم نامەی كوردی: حكومەتی سوریا سوورە لەسەر ئەوەی وڵات بە ئەقڵیەتی دەسەڵاتگەرا بەڕێوەببات‌و دەستبەرداری بڕیارەكانی خۆی نابێت بۆ چارەسەری قەیرانەكە، ئۆپۆزسۆنیش خزمەت بە ئەجێندای دەرەكی دەكات بە تایبەت توركیا.
نامەی دووەمی كورد: دەسەڵاتی سوریا خۆی بە خاوەنی رەسەنی سوریا دەزانێت‌و لێدوانی زۆر توندیش دەدات‌و دەڵێ: زوو بێ یان درەنگ بە زەبری هێز دەگەڕێتەوە بۆ ئەو ناوچانە، چارەسەری سیاسیش رەت دەكاتەوە، بەمەش رژێم زیاتر لایەنی ئاژاوە دەگرێت تا گفتوگۆ.
نامەی سێیەمی كورد: كوردەكان داواكاری چارەسەری سیاسی‌و سازان‌و بەشداری راستەقینەن لە بڕیاری سیاسی سوریادا، بەڵام رژێم هەموو هەوڵەكانی كوردی بۆ گەیشتن بە لێكگەیشتن بە بێ دەستێوەردانی دەرەكی شكستپێهێنا.
نامەی چوارەمی كورد: ناوچەكانی باكوور‌و خۆرهەڵاتی سوریا‌و ئیدارەی خۆجێیی دەبنە بناغە بۆ دەستپێكی سوریایەكی نوێ، ئەگەر رژێم مەبەستی بێت سوریا سەرلەنوێ بنیات بنێتەوە.
نامەی پێنجەمی كورد: دەستكردن بە گفتوگۆی (كورد‌و كورد)، خزمەت بە رێكخستنەوەی ماڵی كوردی دەكات‌و پڕۆژەیەكە خزمەت بە چارەسەری سیاسی دەكات‌و خزمەت بەجیابوونەوە ناكات، وەك ئەوەی رژێم بانگەشەی بۆ دەكات‌و دەیكاتە تۆمەت‌و ئاراستەی كورد‌و پڕۆژە سیاسییەكەیان دەكات كە لە ئیدارەی خۆجێییدا رەنگی داوەتەوە.
لە راستیدا دەستپێشخەری كورد روون‌و ئاشكرایە‌و نامەكانیش زۆر روونن، كەواتە پێویستە رژێم بیانخوێنێتەوە‌و هەوڵ بدات بە گیانی بەرپرسیارێتییەوە لێیان نزیك بێتەوە.

 

وتاری زیاتر






شەڕی خوێن ‌و شەڕی سەر كاغەز‬ فەتحوڵڵا حسێنی
2020-10-19 16:31      54 جار بینراوە










نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو