فەریق حەبیب

ماستاوچی كێیە؟

  2020-11-25 13:05      131 جار بینراوە        کۆمێنت
وشەی ماستاوچی، لە نێو كۆمەڵگەی كوردەواریدا، زیاتر واتایەكی مەجازی هەیە، دەنا دەبوایە ماستاوچی بەو كەسە بووترابایە كە پیشەی درووستكردنی ماستاوە، ئەگەرچی وەها پیشەیەك لە واقعیدا بوونی نییە. وەلێ وەسفەكە بۆ  دیاردەیەك بەكاردەهێنرێت كە تێیدا كەسێك زمان لووس و فێڵبازە، كاری بەهەر كەسێك بێت، یاخود بزانێت لە داهاتوودا كاری پێی دەبێت، قسەی خۆشی بۆ دەكات، چی پێ خۆش بێت ئەوە دەكات، حەزی لەچی بێت بۆی فەراهەم دەكات، بەكورتییەكەی بەپێی میزاج و حەزی ئەو كەسە رەفتار دەكات كە بۆسەی بۆ ناوەتەوەو بەنیازە بۆ مەبەستی خۆی بەكاری بهێنێت.
ماستاوچییەكان، شێرپەنجەی كۆمەڵگەن، لە گۆڕنەری دڵسۆزیی و ئینتیمان بۆ خاك و نیشتمان، بەهۆی رەفتارە قێزەونەكانی ئەوانەوە، خەڵك بێزار و نائومێد دەبن.
ماستاوچییەكان، لەئاكامی هەڵخەڵەتاندنی بەرپرسە گەمژەكان، لە زۆربەی دامەزراوە و رێكخراوەكانی كۆمەڵگەدا جێیان بە كەسانی بەفەڕ و بەرهەمدار و دڵسۆز لێژ كردووە و هەر خۆیان هەڵدەكشێن بۆ سەرەوە، بە چەشنێك كە بەشێكی بەرچاو لە بەڕێوەبەرەكان، كاربەدەستان، لە كەسانی ماستاوچی پێكدێن.
رێزگرتن لە خەڵك و قسەی خۆشكردن لەگەڵیاندا، مەرج نییە بچێتە چوارچێوەی ماستاوكردنەوە، ئەگەر بێت و ئەو رەفتارە لەگەڵ هەموواندا وەكو یەك وابێت و بێ مەبەست بێت، نەك بەتەنها بەرانبەر ئەوانە ئەنجام بدرێت كە خاوەنی رەفتارەكە پێویستی پێیانە یان لەداهاتوودا حەوجێی پێیان دەبێت.
ماستاوچێتی، خوویەكی خۆپەرستانەی مرۆڤ بەرجەستە دەكات، تا مرۆڤەكان خۆپەرستتر بن، ماستاوچی تر دەبن، لەبەرانبەریشدا كەسانی خۆنەویست و مرۆڤدۆست هەرگیز ماستاو و مەرایی بۆ كەس ناكەن.
یەكێك لە خەسڵەتەكانی كەسی ماستاوچی، خۆدەرخستنە، بۆ نموونە فەرمانبەر و كارمەندی ماستاوچی ئەوەندەی خولیای خۆدەرخستن و خۆهەڵكێشانە، نیو ئەوەندە خوازیاری خزمەتكردنی بێ دەنگانە نییە. قسە و گوفتاری زۆرەو كرداری كەمە، هەر كارێكی باش بكات تەنها مەبەستی خۆنمایشكردنە لەبەردەم بەڕێوەبەر یان خاوەنكارەكەیدا، تا پێی بڵێت ئەوەتا من دڵسۆزانە كاردەكەم، بۆ ئەوەی پلەی بەرزبكاتەوە یاخو پاداشتی بكات.
زۆربەكەمی رێكدەكەوێت ماستاوچییەك بدۆزیتەوە كە شوێنی كارەكەی و كەرەستەكانی كاركردنی خۆش بوێت، هەرچی هەڵپەهەڵپێك و خۆنواندنێك بەو ئاراستەیەدا بكات ، تەنها و تەنها دەخوازێت بە سەرپەرشتیارەكەی بڵێت: ئەها من چەندە دڵسۆزم بۆ ئەم شوێنە، راستییەكەشی ئەوەیە كە ئەو بەهیچ كلۆجێك دڵسۆزی لە ناخیدا نییە.
ماستاوچی لە كاتی كاركردندا هەمیشە عەوداڵی ئاژاوە نانەوەیە لەنێوان بەرێوەبەر و كارمەندەكانی تر، چونكە چاوی بەوە هەڵنایەت بەڕێوەبەرەكەی نێوانی خۆش بێت لەگەڵ كارمەندان و ستایشی كارەكانیان بكات، ئەو جۆرە پەیوەندییە بە هەڕەشە بۆ سەر خۆی دەزانێت.
ئەگەر دوو ماستاوچی لەیەك ژینگەی كاركردندا كۆببنەوە، ئەوا دەكەونە دژایەتی و كێبڕكێكردنی یەكتر لە مەرایی كردن بۆ سەرووی خۆیاندا، چونكە هەر یەكەیان ئەوی تر بە مەترسی بۆسەر خۆی دەزانێت، هەر یەكێكیان دەیەوێت بەتەنها خۆی شۆڕەسواری مەیدانی ماستاوكردن بێت! چونكە دەیەوێت سەرانی خۆی تەنها بۆ مەرامەكانی خۆی بەكاربهێنێت و بە هاوبەشیكردنی هیچ ماستاوچییەكی دی قایل نابێت.
دەشێت كەسانێك هەبن لە پلە و پۆستی باڵای بەرپرسیارێتیشیدابن و ماستاوچی بن، لەمجۆرە حاڵەتەدا، ئەوان ماستاو بۆ بەرپرسانی لە خۆیان باڵاتر دەكەن، جاری واش هەیە ماستاو بۆ كەسانێك دەكەن كە لەرووی پلە و پایەوە لەخۆشیان نزمترن، بەڵام بۆ بەئاسانی جێبەجێكردنی كارەكانیان كە رەنگە نا شەرعی و نا قانونی بن پەنا دەبەنە بەر مەرایی كردن!
دەكرێت لەمەودای كورتدا ماستاوچییەكان سەركەوتنی رووكەشی لە بوارە جیاجیاكانی ژیاندا بەدەستبهێنن، بەڵام بەدرێژایی ژیانیان هەمیشە وەكو كەسانی قێزەون و بێ بەها وبێ كەسایەتی كۆمەڵایەتی تەماشادەكرێن، بەپێچەوانەی ئەو كەسانەی ئەنتی ماستاوچین كە لە كورتخایەندا زەرەرمەندن، بەڵام هەمیشە كۆمەڵگە بەچاوی رێزەوە تەماشایان دەكات و پێگە و سەنگیان لەبەرچاودەگرێت و متمانەیان پێدەكات و لەدوای خۆشیان ناوبانگێك جێدەهێڵن كە منداڵەكانیان شەرمەزار ناكەن.
ماستاوچێتی، مێژوویەكی دوورو درێژی هەس، لەگەڵ قۆناغەكانی پەرەسەندنی مرۆڤایەتیدا، ئەویش لەشكڵ و شێوازدا گۆڕانی بەسەرداهاتووە، بەڵام لە رووی ناوەڕۆكەوە، هەمان ماهیەتی ئێستای هەیە. بەداخەوە، نە ئاین و نە بەهاكانی تری بەرهەمی فیكری مرۆڤایەتی نەیانتوانیوە بەیەكجارەكی لەبەینی بەرن، بۆیە هەتا مرۆڤ مابێت ئەویش دەمێنێ، تەنها جیاوازییەكەی ئەوەیە رادە و شێوازەكانی لە كۆمەڵگەیەكەوە بۆ كۆمەڵگەیەكی دیكە دەگۆڕێت. تا كۆمەڵگە پێشكەوتووتربێت رێژە و رادەی ئەم دیاردە چەپەڵە كەمتر دەبێتەوە، بۆیە سنوورداركردنی پەیوەستە بە شێوازی پەروەردكردنەوە چ پەروەردەی خێزانی یان پەروەردەی باخچەكانی ساوایان و قوتابخانەكان، هەر بۆیە پێویستە لەوێوە كار لەسەر سنوورداركردنی بكرێت.
 

وتاری زیاتر







كوژرانی هاشمی یان لێدانی كازمی؟‬ فەریق حەبیب
2020-07-07 13:58      120 جار بینراوە




















عەبادی، بەڵێنی زۆرو كرداری كەم‬ فەریق حەبیب
2017-11-15 14:15      461 جار بینراوە

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو