مستەفا محەمەد

هەنگاوی كردەیی بۆ دەربازكردنی پرۆسەی خوێندن

  2021-04-26 22:49      84 جار بینراوە        کۆمێنت

وەزارەتی پەروەردە وەك چارەی دۆخی خۆپارێزی و رێگری لە تەشەنەی زیاتری پەتای كۆڕۆنا، بڕیاری داخستنەوەی خوێندنگەكانی دەركردەوە و لە 17ی نیسانیشەوە خوێندنی ئەلیكترۆنی ئەكتیڤ كردۆتەوە، كە لە رێگەی (كۆد و وشەی نهێنی) خوێندكار دەچێتە ناویەوە و وانە تۆماركراوەكانی، لە سایتی «ewana.krd» وەردەگرێ.

ئەم هەنگاوەی وەزارەت تازە نییە، بەڵكو ساڵی رابردووش بۆ وەرزی دووەمی خوێندن تاقیكردەوە و تیایدا سەركەوتوو نەبوو، ئەمساڵ خوێندكاران پابەندكراون و دەبێ بۆ بینینی وانەكان بە ناچاری سەردانی سایتەكە بكەن، چونكە وەك وتراوە، لە ناو سایتەكەوە كارگێڕی خوێندنگە و مامۆستایان بە راپۆرتی هەفتانە بەشداری و ئامادەبوونی خوێندكاران تۆمار دەكەن و بۆ پەروەردەی قەزا و پارێزگاكان بەرزی دەكەنەوە. ئەمە لە كاتێكدا ساڵی رابردوو بەشێوەیەكی ئارەزوومەندانە بوو.

هێشتا زووە بۆئەوەی بوترێ كە ئەنجامی ئەم هەنگاوەش وەك ساڵی رابردوو دەبێ، بەڵام بۆچوونی زۆرینەی شارەزایانی بواری پەروەردە وایە، كە ئەم جۆرە لە خوێندن سەركەوتوو نابێ، چونكە هەرگیز ناتوانرێ بكرێتە بەدیل بۆ خوێندنی ناو پۆل و خوێندكار وانەكانی رووبەڕوو لە مامۆستاكانی وەربگرێ. جگە لەوەش، ئاستی دارایی زۆرینەی خانەوادەكانی خوێندكاران و هێڵەكانی ئینتەرنێت و دابەشبوونی جوگرافی خوێندنگەكانیش رێگرن و لەو ئاستەدا نین كە هاریكاری سەرخستنی خوێندنی ئەلیكترۆنی بن .

لەم چەند رۆژەی كە خوێندنی ئەلیكترۆنی دەستیپێكردۆتەوە، دەبینرێ جگە لەوەی كارلێكی خوێندكاران و ئیستیجابەیان بۆی لە ئاستێكی تەواو لاوازدایە، هاوكات مامۆستایانیش قسەی خۆیان هەیە و پێیانوایە بەجۆرێك لەجۆرەكان ئەم هەنگاوە لێدانە لە كەسایەتییان و وادەكات كە مامۆستا هیچ رۆڵێكی میحوەریی لە پڕۆسەی پێگەیاندنی خوێندكاراندا نەبێ و رایەڵەكانی پەیوەندی نێوان خوێندكار و مامۆستا لەلایەك و مامۆستا و كەسوكاری خوێندكارانیش بە ژینگەی خوێندنەوە لەلایەكی ترەوە بپچڕێ و ئاسۆی تێفكرین و نەشونمای مەعریفی خوێندكاریش تا ئاستێكی مەترسیدار دادەبەزێنێ و تێڕوانینی خوێندكاران و كەسوكاریشیان لەبارەی رۆڵی پەروەردە تەواو دەگۆڕێ و وا دەكا هیچ متمانەیەكیان بەپڕۆسەكە نەمێنێ، بەڵكو تەنها بۆ پەڕینەوەی ساڵێك بۆ ساڵێكی تر چاویان لە دەرچوواندنی خوێندكارەكانیان بێ، ئەمەش لە دەرەنجامدا نەوەیەكی نەخوێندەوار و ئاست نەوی دەهێنێتە بەرهەم، كە لەسەر كۆی كایەكانی ژیان كاریگەریی سلبی بەجێدەهێڵن.

ئاشكرایە لە مانگی شوباتی ئەمساڵ تا ناوەڕاستی مانگی ئادار، بە جێبەجێكردنی رێنماییەكانی تەندروستییەوە خوێندن بە شێوەی تەناوب و دابەشكاریی خوێندكاران لە چەند كاتێكی جیادا تاقیكرایەوە و تاڕادەیەكی باشیش سەركەوتوو بوو ‌و كەمترین حاڵەتی تووشبوون یا تەشەنەسەندنی پەتای كۆرۆنا تۆمار كرا، خۆ ئەگەر بە بەرنامەی وردترەوە و بە كەمێك گۆڕانكاریش لە كات و چۆنێتی پەیوەندیكردنی خوێندكاران بە خوێندنگەكانەوە كرابا، ئەوا دەتوانرا بە ئاسودەیی وەرزێكی خوێندن تێبپەڕێنرێ، ئەوسا ئەگەرچی سەد دەر سەد مەبەست و ئامانجی ساڵێكی خوێندنی ناپێكێ، بەڵام دەكرا وەرزێك بكرێتە بنەما بۆ دەربازكردنی ساڵێكی خوێندن.

پێشنیازی بەجێ و چارەسەر بۆ ئەم دۆخە، جارێكیتر پێداچوونەوەی وەزارەتی پەروەردەیە بە بڕیاری داخستنی خوێندنگەكان و هاوشێوەی زانكۆكان سوودوەرگرتن لە خوێندنی ئاوێتە «خوێندنی ناوپۆل و خوێندنی ئۆنلاین»، پێشموایە جێبەجێكردنی خاڵی دووەم لەو فەرمانە وەزارییەی كە لە 11ی نیسان لە هەمان وەزارەت دەرچووە بۆ كردنەوەی دەروازەكانی خوێندن لە ژێر رێكاری توندی خۆپارێزی، دەستەبەری راستەڕێبوونی پڕۆسەكە دەكا، بێگومان لەگەڵ هەموو ئەمانەشدا پێویستە حكومەت لە دابینكردنی پێداویستییەكانی خۆپارێزی و پێدانی پێكوتەی ئەو پەتایە، پشكی شێر بداتە وەزارەتی پەروەردە، لانیكەم بۆ ئەو قۆناغەی كە چارەنووسی یەك ساڵی خوێندنی لەسەر بەندە.

وتاری زیاتر


عیراق وەک ئەفغانستانی لێدێت؟‬ مستەفا محەمەد
2021-08-19 10:56      49 جار بینراوە





















بڕیارەکەی دادگاو لێکەوتەکانی‬ مستەفا محەمەد
2018-06-27 10:56      445 جار بینراوە

پەرلەمانتارێک هەرگیز نەخەوت!‬ مستەفا محەمەد
2018-06-20 11:57      480 جار بینراوە

سەرکـەوتـنی یەکێتی قبوڵ بکەن‬ مستەفا محەمەد
2018-05-16 10:07      439 جار بینراوە

کاتێ بانگەشە پـێچەوانەیە‬ مستەفا محەمەد
2018-05-02 14:08      350 جار بینراوە


نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو