کارۆخ خۆشناو

ناهۆشیاریی لەسەردەمی هۆشیاریدا!

  2021-05-08 16:08      122 جار بینراوە        کۆمێنت

لەسەروبەندی دروستبوونی زەمینەیەکی سیاسی لەبارو ئەتمۆسفێرێکی گونجاو بۆ گفتوگۆکردن لەسەر پرسە نیشتمانییەکانی وەک (دەستوور)، خەریکە خەڵکانێکی ناهۆشیارو کورتبین و نابەرپرس هەوڵدەدەن ئەم زەمینەیە تێکبدەن، ئەو هەوڵانەش بەشێوەیەکی راستەوخۆ یان ناڕاستەوخۆ دەچنە چوارچێوەی خزمەتکردن بەدوژمنانی کوردستان، یەکێک لەخاڵە لاوازەکانی مێژووی خەباتی رزگاریخوازی کوردستان بریتی بووە لەهەبوونی کەسانێک کە نانیان لەدروستکردنی ناتەباییدا بووە، بۆیە بەشێوەیەک برەویان بەگوتاری دووبەرەکی و لێکترازان داوە تاکو شەڕی نەگریسی ناوخۆی لێکەوتۆتەوە، لەم قۆناغەشدا خەڵکانێک هەن کە بەشێوازێکی زبر دەنووسن و قسە دەکەن، ئەم شێوازەش کاریگەری خراپی لێکەوتۆتەوە، بۆیە پێویستە ئەو خەڵکانە بەخۆداچوونەوەیەکی جدی بکەن و ئەو راستییە بزانن کە لەم بارودۆخەدا کاتی ململانێی ناوخۆیی نییە، ئەرکی دەسەڵاتی باڵای حزبەکانیشە رێگا لەم جۆرە کەسانە بگرن، چونکە ئێستا لەهەمووکات زیاتر پێویستە بەرژەوەندییە باڵاکانی نیشتمان لەسەرووی بەرژەوەندی حزبەکانەوە بن، تاکو بتوانرێت لەم بارودۆخە هەستیارەدا قۆناغی رق و کینە تێپەڕێنین و بەهەوڵ و کۆششی هەموولایەک بەرەو تەواوکردنی پڕۆژەی (دەستوور) هەنگاو بنێین، یەکێک لەخەسڵەتە گرنگەکانی کۆمەڵگا زیندووەکان بریتییە لەهەبوونی دەنگ و رەنگی جیاواز، کاتێک سەیری وڵاتانی پێشکەوتوو دەکەین، وێڕای ئەو هەموو جیاوازییانەی کە هەیانە، کەچی هەموویان بەشێوەیەکی ئاشتییانە دەژین و جیاوازییەکانیشیان بوونەتە هۆکارێکی بەهێز بۆ داهێنان و پێشکەوتن، نەک دواکەوتن و لێکترازان.
ئێمەی کوردیش دەبێت جیاوازییەکانی یەکتر (لەهەموو روویەکەوە) قبوڵ بکەین، چونکە ناکرێت هەموومان بەیەک شێواز بیربکەینەوە، بۆیە ڕێزگرتن لەجیاوازییەکانی یەکتر ئەرکی هەموولایەکمانەو بەم هۆیەشەوە دەتوانین پێشبکەوین و ئەم قۆناغە بەسەرکەوتوویی تێپەڕێنین، لەدونیای راستەقینەو دونیای سۆشیال میدیادا گفتوگۆکردن و بیروڕا گۆڕینەوە بەشێوازێکی هێمن و لەسەرخۆ، هونەرێکە کەم کەس پێی ئاشنا بوون، ئاستی پێشکەوتنی کۆمەڵگاکانیش لەکاتی گفتوگۆی تاکەکانیدا بە دیار دەکەوێت، لێرەدا پێویستە هەمیشە ئەو راستییە بزانین کە لەکاتی توڕەبووندا عەقڵ غائیب دەبێت، بۆیە هەرکاتێک بەتووڕەییەوە گفتوگۆ دەکەین، نە خۆمان لە خۆمان حاڵی دەبین، نە بەرامبەرەکانیشمان لێمان حاڵی دەبن.
لەکۆتاییدا دەڵێم مرۆڤە ئازاو ئازادەکان ئەو کەسانەن کە بەهێمنی گفتوگۆ دەکەن و خۆیان کۆنتڕۆڵدەکەن و هیچکات خۆیان ناخزێننە ئاستێکی ناهۆشیارو نزم و نەخوازراو، بەڵکو هەمیشە خۆیان لەئاستێکی بەرزی هۆشیاری و فەزایەکی ئارام و دوور لەفەوزا دەهێڵنەوە، بۆیە زۆر گرنگە لەم سەردەمەدا دەستەبژێرە ئازاو ئازادەکان گفتوگۆی ئارام و بنیاتنەرو هۆشیار ئەنجامبدەن، لەپێناوی رزگاربوون لەگێژاوی بێڕێزیکردن و گەیشتن بەئاستێکی بەرزی گفتوگۆی عەقڵانی و تەندروست.
سەرۆکی ئەنیستیتۆی توێژینەوەی ئەمریکی-کوردی

وتاری زیاتر


چەکی یەکڕیزی و زانست و ئیرادە!‬ کارۆخ خۆشناو
2021-05-20 11:56      92 جار بینراوە


(مرۆڤ)سازی و (نیشتیمان)سازی!‬ کارۆخ خۆشناو
2021-05-11 16:38      86 جار بینراوە



دەستوور فریادڕەسە! ‬ کارۆخ خۆشناو
2021-04-27 00:12      91 جار بینراوە

واژوویەكی مێژوویی!‬ کارۆخ خۆشناو
2021-04-25 14:12      118 جار بینراوە

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو