عەبدولواحید محەمەد

دیسان بەزمی مووچە!

  2021-06-18 20:36      92 جار بینراوە        کۆمێنت

به‌پێی یاسای خزمه‌تی شارستانی ژماره‌(24)ی ساڵی 1960 و هه‌روه‌ها یاسای مووچه‌ی ژماره‌ (23)ی ساڵی 2008، مووچه‌ مافێكی پێدراوی مامۆستایان و فه‌رمانبه‌رانه‌، ده‌بێت حكومه‌ت هه‌موو مانگان له‌كاتی خۆیدا بیدات، به‌دیوێكی تر گرێبه‌ستێكی یاسایی له‌نێوان مامۆستایان و فه‌رمانبه‌ران له‌لایه‌ك و حكومه‌تیش له‌لایه‌كی تره‌، ده‌بێت لایه‌نی یه‌كه‌م ئه‌و خزمه‌ت و ئه‌ركه‌ی له‌سه‌ریه‌تی وه‌كو خۆی جێبه‌جێی بكات، له‌به‌رامبه‌ریشدا حكومه‌ت مافی یاساییان دابین بكات، نابێت و ناكرێت بابه‌تی مووچه‌ تێكه‌ڵاوی هیچ ئه‌جندایه‌ك بكرێت و بخرێته‌ به‌ر مه‌نگه‌نه‌و بینه‌و نییه‌، مخابن له‌هه‌رێمی كوردستان مووچه‌ له‌بری ئه‌وه‌ی خه‌ڵك له‌كاتی خۆیدا وه‌ریبگرێت و پێیه‌وه‌ بحه‌سێته‌وەو بتوانێت ئه‌و ئه‌ركه‌ی له‌سه‌ریه‌تی به‌باشی جێبه‌جێی بكات، بۆته‌ خه‌مێكی گه‌وره‌و به‌رده‌وام له‌هه‌وكی مامۆستایان و فه‌رمانبه‌ران ئاڵاوه‌و حكایه‌تێكی دوورو درێژیشه‌ هه‌ر ده‌سپێكه‌كه‌ی دیاره‌ كۆتاییه‌كه‌ی نادیاره‌، له‌ تونێلێك ده‌چێت رووناكییه‌ك له‌دواوه‌ی دیار نییه‌، به‌تایبه‌ت له‌ 2014ه‌وه‌ به‌سه‌د هه‌ورازو نشێوو بینه‌و به‌رده‌دا تێپه‌ڕیوه‌و (5) ساڵی ته‌واو درێژه‌ی كێشا، راسته‌ ئه‌وده‌م هه‌ندێك پاساو هه‌بوو، به‌ڵام له‌به‌رده‌م ئه‌و پێدراوه‌ یاساییه‌ زۆر لاوازبوون، لێ له‌گه‌ڵ ئه‌وه‌شدا قۆناغه‌كه‌ به‌سه‌د ده‌رده‌سه‌ری و كوله‌ مه‌رگییه‌وه‌ تێپه‌ڕێنرا، به‌هیوای ئه‌وه‌ی جارێكیتر دووباره‌ نه‌بێته‌وه‌و چیتر ئه‌و ده‌سته‌واژه‌ سواوه‌یه‌ (پاشه‌كه‌وت) نه‌یێته‌وه‌ نێو فه‌رهه‌نگی ژیانی مووچه‌خۆران به‌تایبه‌ت مامۆستایان، به‌داخه‌وه‌ جارێكیتر له‌كۆتایی 2019وه‌ كه‌وتینه‌وه‌ نێو فه‌زا بێ سه‌روبه‌ری (5) ساڵی پێشوو، ئه‌مجاره‌ بدعه‌ی لێبڕینیان هێنایه‌ كایه‌وه‌و له‌پاڵیشیدا دوای كه‌وتنیشی هاته‌ سه‌ر، بۆ ئه‌وه‌ی خۆشیان له‌ژێر ئه‌و ئه‌ركه‌ ئه‌خلاقیه‌ بهێننه‌ ده‌ره‌وه‌، هۆیه‌كه‌یان فڕێدا گۆڕه‌پانی كۆڤید-19و چاكسازی و رێككه‌وتن له‌گه‌ڵ حكومه‌تی فیدراڵدا، به‌ڕاستی ئه‌وانه‌ زۆر سواوه‌ن كه‌س به‌فلسێكی قه‌ڵب سه‌ودایان پێناكات، ئاخر كۆڤید-19 له‌هه‌موو جیهاندا بڵاوه‌و كه‌چی مووچه‌ هه‌ر دراوه‌و ده‌درێت، له‌چاكسازی و خراپسازیشدا هه‌ر خۆیان به‌رپرسن، چونكه‌ خۆیان كردوویانه‌ تا خۆشیان چاك نه‌كه‌ن كه‌سیان پێ چاك ناكرێت، هه‌وڵه‌ هه‌وڵیانه‌ ئه‌و خراپسازیه‌ له‌ئه‌ستۆی مامۆستایان و فه‌رمانبه‌ران بشه‌تێنن به‌وه‌ی لێره‌و له‌وێ ده‌رماڵه‌ی زیاده‌ وه‌رده‌گرن، بۆ پرسیار له‌و هه‌موو بندیوارو سه‌ردیوارو لادیوارانه‌ ناكه‌ن؟ بۆ ئه‌وراقی بێسه‌رو به‌ری ئه‌و هه‌موو خانه‌نشینه‌ نایاساییانه‌ هه‌ڵناده‌نه‌وه‌؟ بۆ سنوور بۆ به‌خشینه‌وه‌و ئه‌و هه‌موو پله‌و پۆستانه‌ دانانێن؟ بۆ واز له‌كڕینی وه‌لائی سیاسی یه‌كتر به‌پاره‌ی ئه‌و میلله‌ته‌ خێر له‌خۆنه‌یوه‌ ناهێنن؟ بۆ پاره‌ی ئه‌و گه‌له‌ به‌ش مه‌ینه‌ته‌ له‌ماشێنی زه‌بلاحی راگه‌یاندنه‌وه‌ خه‌رج ده‌كه‌ن، نه‌ك بۆ به‌ده‌ستهێنانی ئامانجه‌ باڵاكان، به‌لكو بۆ شكاندن و گۆڵكردن له‌یه‌كتردا، له‌سه‌ر رێككه‌وتنیش له‌گه‌ڵ مه‌ركه‌زدا، سه‌ره‌تا پێیان وتین مه‌ركه‌ز (موفلیسه‌) با پشت به‌ئابووری سه‌ربه‌خۆی خۆمان ببه‌ستین، ده‌فه‌رموون ئه‌وه‌ حكومه‌ته‌ موفلیسه‌كه‌یه‌ به‌باشی خۆی به‌ڕێوه‌ ده‌بات و مانگانه‌ش بێ كه‌موكوڕی مووچه‌ی فه‌رمانبه‌رانی ده‌دات، ئێمه‌ش به‌ئابووری سه‌ربه‌خۆ بووینه‌ كۆیله‌ی هالك بانك و ده‌یان سه‌ودای سیاسی و سه‌ربازیتر، وه‌كو بۆمبیان لێهاتووه‌ هه‌ر كاتێك بیانه‌وێ به‌ڕوومان دیته‌قێننه‌وه‌، ئه‌وه‌تا ئه‌م مانگه‌ ته‌قاندیانه‌وه‌، دوای ئه‌و ئازاره‌ دوورو درێژه‌ تازه‌ رێكه‌وتنیان له‌گه‌ڵ به‌غدا پێ باشه‌، ده‌ی باشه‌ رێكه‌ون كێ رێگه‌ی لێگرتوون بۆ هیچ نا به‌لكو بۆ خزمه‌تی ئه‌و هه‌موو مامۆستاو فه‌رمانبه‌ره‌ راسته‌قینانه‌ له‌پشتیانه‌وه‌ش كۆمه‌ڵگه‌ی كورده‌واری كه‌ هه‌موو مانگان ده‌ستیان له‌سه‌ر دڵیانه‌ له‌وه‌ی ده‌درێت یان دواده‌كه‌وێت، له‌نزیكه‌ی دووساڵ حكومكردنی ئه‌و كابینه‌یه‌ ته‌نها چوار مانگی سه‌ره‌تای ئه‌مساڵ به‌لێبڕینی 21% مووچه‌كان به‌ڕێكه‌پێكی دراون كه‌ هه‌مووش وه‌كو كونی كاڵه‌ك ده‌زانن ئه‌و غه‌درێكی سۆره‌ سۆره‌ ده‌كرێت، وه‌ك په‌نده‌ كوردییه‌كه‌یه‌ كه‌ ده‌ڵێت (پێت ده‌وه‌ستم و راناوه‌ستم)، كاتێك پێدانی مووچه‌ به‌ته‌واوی بووه‌ داواكارییه‌كی موتڵه‌قی جه‌ماوه‌ری، جارێكی تر هاتن هه‌موو شتێكیان گه‌ڕانده‌وه‌ خاڵی سفر، كەلتووره‌ كۆنینه‌كه‌ی خۆیان له‌دواخستن و نه‌دانی به‌بێ هیچ پاساوێك ده‌ستپێكرده‌وه‌ ، چونكه‌ ئه‌وه‌ی له‌چوار مانگی رابردوودا هه‌بوو مووچه‌یان پێده‌دا ئه‌م مانگه‌ش هه‌ر به‌وشێوه‌یه‌ بوو،به‌پێی خوێندنه‌وه‌كانیش داهات زیاتر بووه‌ له‌جاران، بارودۆخی گشتی سیاسیش گۆڕانكاریه‌كی ئه‌و تۆی به‌سه‌ردا نه‌هاتووه‌، مه‌گه‌ر شتێك له‌ژێره‌وه‌ له‌چوارچێوه‌ی سه‌وداكارییه‌كاندا هه‌بێت ، كه‌واته‌ ئه‌و شێوه‌ دابه‌شكردنه‌ كه‌ به‌دڵۆپاندنه‌ ده‌بێت روونكردنه‌وه‌ی پێویست له‌باره‌یه‌وه‌ بدرێت، نه‌ك یاریكردن به‌وشه‌و رسته‌و ده‌سته‌واژه‌ له‌سه‌ر زاری به‌رپرسه‌كانه‌وه‌ بۆ ئه‌وه‌ی خۆ له‌و ئه‌ركه‌ بهێننه‌ ده‌ره‌وه‌، لێره‌دا ده‌مه‌وێت به‌وانه‌ بڵێم كه‌ بوونه‌ته‌ هۆكاری ئه‌و هه‌موو ئه‌زیه‌ت و ئازاره‌، ئه‌وه‌ی ئه‌و مانگه‌ش به‌و خه‌ڵكه‌ ده‌یكه‌ن ده‌چێته‌ سه‌ر خه‌رمانه‌ی زۆرداری رابردووتان، ده‌تانه‌وێت مردنمان پێ نیشان بده‌ن تاوه‌كو به‌ تا رازی بی كه‌ دڵنیام پێنج و دوو رۆژێكه‌و هه‌تا سه‌ر نابێت، چونكه‌ هیچ شتێك له‌ئازاری برسیكردن كاریگه‌رتر نییه‌.

وتاری زیاتر

لەنێوان خراپ و خراپتر..!!‬ عەبدولواحید محەمەد
2021-04-24 15:59      101 جار بینراوە

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو