فەریق حەبیب

کەرکوکییەکان لەنێوان دەنگنەدان و ئازاری ویژداندا

  2021-09-16 15:09      79 جار بینراوە        کۆمێنت

پرۆسەی دەنگدان لەهەڵبژادنەکاندا، لەکاتێکدا سادەترین مافی مرۆڤی ئەم سەردەمەیە، هاوکات کۆڵەکەی سەرەکی دیموکراسی و ئامرازێکی گرنگی گۆڕانکاریشە، ئەگەر ساختەی تێدا نەکرێت.
سەبارەت بە کەرکوکییەکان، دەنگدان لەئێستادا، تاکە رێگایە بۆ تێکشکاندنی پیلانی شۆڤێنیستانەی دژ بە خواستە رەواکانی خەڵکی کوردستان کە دەیانەوێت سەرلەنوێ لەڕێی تەعریبکردنی کەرکوکەوە، مۆرکی کوردانەی شارەکە و پارێزگاکە بسڕنەوە و بیکەنەوە بە ناوچەیەکی نامۆ بە کوردستان، خەڵکە رەسەنەکەشی ملکەچ بکەن و سەرلەنوێ بیانکەنەوە بە مرۆڤی پلە دوو لە شارەکەی خۆیاندا.
لەدوای پرۆسەی ئازادی عیراق، کاتێک پێ بەپێ خەریک بوو شوێنەواری دەیان ساڵەی بەعەرەبکردنی کەرکوک نەدەما و سەرەنجام لە ساڵی 2017 دا دەتوانرا بە روونی سیمای کوردانەی شارەکە بەدیبکرێت، ئاهێک هاتەوە بەر دانیشتوانە ماندوو و شەکەتەکەی، بەڵام بەهۆی ململانێی قێزەونی لایەنە سیاسییەکانی کورد و خراپ ئیدارەدانی دۆخەکە و هەندێ رەفتاری نابەرپرسانەی ژمارەیەک بەرپرس و کاربەدەستی کورد، هەلومەرجێک هاتبووە ئاراوە کە زۆربەمانی هەراسان کردبوو، بۆیە رەخنەی تووندمان دەگرت و ناڕەزاییمان دەردەبڕی و رەنگە زۆرێک هەبووبێت هیوای رووخانی ئەو دەسەڵاتەی خواستبێت کە زۆربەی هەرەزۆری جومگە سەرەکییەکانی بەدەست کوردەوە بوو. هەرواش دەرچوو، لە 16ی ئۆکتۆبەری2017  دەسەڵاتە کوردییەکەی کەرکوک هەرەسیهێنا، بەڵام ئەی دواتر چی روویدا، ئاخۆ دەسەڵاتێکی باشتر هات؟
لەوکاتەوە تائێستا، کە کەرکوکییەکان لە هەرێمەوە دەگەڕینەوە بۆ کەرکوک، لە خاڵەکانی پشکنینی پارێزگاکە کە پێشتر بە لەخۆباییبوونەوە پێیدا تێدەپەڕین و ئەگەر تیایاندا ئاسایش و پۆلیسەکان کەمێک پرسیاری زیاتریان لێبکردنایە، ئەوا رووبەڕووی وەڵامی تووند دەبوونەوە، کەچی حاڵی حازر بەزەلیلی و مات و مەلوول لە هەمان ئەو خاڵە پشکنینانەوە گوزەر دەکەن و خواخوایانە سەربازێکی جل رەشی مڕومۆچ کە کەس نازانێت خەڵکی کوییە و چییە سوکایەتییان پێنەکات، هاوکات لەو خاڵانە بەولاوە هیچ گرەنتیەک نییە بۆ پاراستنی کەرامەتمان و تەنانەت ژیانیشمان، کەواتە هەرچۆنێک بێت هەر باڵادەستبوونی کورد لە زاڵبوونی شۆڤێنیزمی نەتەوەکانی تر باشترە بۆمان،  ئیسماعیل بێشکچی وتەنی" خراپترین ئیدارەی کوردی لەباشترین ئیدارەی عەرەب و تورک و فارس بۆ کورد، باشترە".
لەئێستاشدا کە ئیستحقاقی هەڵبژاردنمان لەبەردەمدایە، باوەڕم وایە پێویستە گوێ بە کەموکورتییەکانی دەسەڵاتی کوردی لە هەرێم و پێشتریش لە کەرکوک نەدەین و نەیکەین بە بەهانە و پاساو بۆ دەنگنەدان، چونکە ئەگەر دەنگدان لە ناوخۆی هەرێمدا مافێکی سەرەتایی و ئەرکێکی دیموکراسی گرنگ بێت، ئەوا لە کەرکوک پرسێکی چارەنووسسازە و بۆ کەرکوکییەکان و تەواوی دانیشتوانی تری ناوچە کوردستانییەکانی دەرەوەی ئیدارەی هەرێم بەرپرسیارێتییەکی نەتەویی و ویژدانيی پاساوهەڵنەگرە.
بە دەنگدانمان لە کەرکوک و موسڵ و مەخمور و خانەقین و شنگال، دەتوانین هەنگاوێکی گرنگ لە مەسەلەی گێڕانەوەی هاوسەنگی هێز و گەڕانەوەی شکۆی کورد بهاوین، چونکە لەکاتێکدا لەدوای 16ی ئۆکتۆبەر، لەسەر ئەرزی واقیع هێزی سەربازی و ئەمنی کورد لەو ناوچانە سفربووەتەوە، ئەگەر بێتو دەنگیشمان نەمێنێ و قورسایی هێزی هەڵبژاردن لە دەست بدەین، ئەوا مەترسی هەیە شۆڤێنیستەکان بەیەکجاری بوونیشمان لەو ناوچانە سفر بکەنەوە و ئیدی لەچاوەڕوانی قەدەرێکی تر و چارەنووسێکی نادیاردا هەر بەتەمای هاتنی "گۆدۆ"یەک بین کە هەرگیز نایەت، بۆیە دەبێت گوێ لەو بانگەشە ناعەقڵانییانەی تۆڕە کۆمەڵایەتییەکان نەگرین کە هەندێک هەرزەکاری کەم ئەزموون تێیدا بە پۆستی کرچوکاڵ و کۆمێنتی نا لۆژیکی هانی خەڵک دەدەن نەچنەسەر سندوقەکانی دەنگدان، بەپێچەوانەوە ئەگەر بێتو دەنگ نەدەین و بەو هۆیەشەوە لەو ناوچانە پاشەکشەی زیاتر لەمەی ئیستا بکەین، ئەوا بەدڵنیاییەوە ئازاری ویژدان بە کاوەخۆ دەمانکوژێت، ئەو کاتیش پەشیمانی بێ هوودەیە، بۆیە پێویستە بەدەنگەکانمان بوونی خۆمان لە کەرکوک و ناوچە کوردستانییەکان بسەلمێنین و بەرەنگاری ئەو شەپۆلە ناڕەوایە بینەوە کە هەڕەشە لە تەواوی بونیادی نەتەوەییمان دەکات.

وتاری زیاتر




ماستاوچی كێیە؟‬ فەریق حەبیب
2020-11-25 13:05      307 جار بینراوە




كوژرانی هاشمی یان لێدانی كازمی؟‬ فەریق حەبیب
2020-07-07 13:58      208 جار بینراوە




















عەبادی، بەڵێنی زۆرو كرداری كەم‬ فەریق حەبیب
2017-11-15 14:15      537 جار بینراوە

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو