كوردۆ عەلی

میدیای كورد لەخزمەت داعشدا، پەلامارەكانی گوندی لهێبان بەنموونە

  2021-12-06 19:21      73 جار بینراوە        کۆمێنت

میدیا هەمیشە لەبازنەیەكدا دەسوڕێتەوە تا ئەركی راستەقینەی خۆی جێبەجێبكات كە گەیاندنی هەواڵ و زانیاری و راستی و گواستنەوەی كارەكتەرو دەنگی ناو هەواڵەكانە، نەك هەڵدانەوەی دیوێكی شاراوەی رووداوەكان كە بەزیان بشكێتەوەو دواتر كارەساتی لێبكەوێتەوە، بەداخەوە بەشێك لەفەرماندە سەربازییەكان هەر زوو كەوتنە ناو داوی هەڵەی میدیاو دنەدران و وەك پاڵەوان باسی كەموكوڕییەكانی هێزی پێشمەرگەیان كردو ئەوەی ژێربەڕەیان خستە سەر بەڕە! كە ئەمە لەڕووی سەربازیشەوە رێگا پێدراو نییە، ئەشێ ئەو هەڵەیەی بەشێك لەڕاگەیاندنەكان كردیان هۆكاری زیادبوونی جموجۆڵەكانی داعش و پەلامارەكانیان بن كە بەداخەوە چەندین شەهیدو بریندارمان دا، چونكە هەر زوو هەموو زانیارییەكانمان خستە بەردەستیان و بەگوێی دوژمن و نەیارمان دا كە لەتەواوی سەنگەرەكان توانای تەكنیكیی سەربازیمان لاوازەو لەشەواندا بەهۆی نەبوونی دووربین و كامێرای "حەراری" ناتوانین وەك پێویست وەڵاممان هەبێت، كە دەكرا ئەم كەموكوڕییە كە لەدەرەوەی دەسەڵاتی وەزارەتی پێشمەرگەو فەرماندەكانە هەر لەكۆبوونەوەی نائاساییدا بوورژێنرایەوەو بیر لەمیكانیزم و ستراتیژێكی نوێ بكرابایەوە بۆ چارەسەركردنی، نەك بكرێتە بابەتی میدیایی كە ئەمە هەڵە زەقەكە بوو. لەڕووداوی پەلاماری چەكدارانی تیرۆریستانی داعش بۆ گوندی لێهبان و بەرگری قارەمانانەی گوندنشیان لەخۆیان، جێگای ستایش بوو لەمە نكۆڵی ناكرێت، بەڵام پیشاندانی هەموو ئەو گوندنشینانەی ئازایەتییان دەنواندو دەرخستنی دەموچاویان وەك پاڵەوان بۆ ئەم دۆخە گونجاو نەبوو، ناشێ و ناكرێ ئاواش پیشان بدرانایە، رووماڵەكەش لەولاوە بوەستێت كەئەوەندەی بەئاڕاستەی زمانی هەڕەشەبوو بۆ ئەوە نەبوو هێزەكانی عیراق هانبدرێن و بەفریایان بكەون، بۆیە ئەم رووماڵە نەك بەخێر نەشكایەوە، بەڵكو بینیمان هەر شەو گوندەكە چۆڵ كراو بەسووتان برێنراو سوپای عیراقیش بەهانایانەوە نەچوو! كەواتە ئەوەی كرا بەڕاستەخۆیی چووە خزمەت تیرۆریستان و ئەوەی ئەوان دەیانویست بەسووك و ئاسانی خستمانە بەردەستیان، هەر لەپیشاندانی سەنگەرەكان و توانا لۆجستی و تەكنیكیەكانیشمان بۆ خستنە بەرچاو، وەك رێبەرێكی شارەزا زانیاریمان پێدان، بەداخەوە كە نەدەبوو ببوایە. هەڵەی میدیاو گواستنەوەی رووداوەكە لەجێی خۆیدا نەبوو، بەدیاریكراوی میدیای خاوەن سەنگیش كە ئەمەی كرد جێگای پرسیارە، بۆو چۆن ئەو هەڵەیە بەسەریاندا تێپەڕی! كات رۆی، بەڵام دەكرێت هەواڵنێر بەتایبەتتر دەزگا میدییەكان وردترو بابەتیانەتر رووماڵی رووداوو ئەو پێشهاتانە بكەن كە پەیوەندی راستەوخۆی بەئاسایشی هەرێم و ئاسایشی خەڵكەوە هەیە تا جارێكی تر نەبنە هۆكاری ماڵوێرانی و مەترسی بۆ ژیانی خەڵك، ئەركی وەزارەتی كاروباری پێشمەرگەشە كۆنتڕۆڵی ئەم دۆخە بكات و رێوشوێنی پێویست بگرێتەبەرو لەكوێدا پێویست بوو پەیامی میدیایی هەبێت و زانیاری دروست بۆ رایگشتی ئاشكرابكات و لەچوارچێوەی زیان نەگەیاندنیش بە بەرەكانی جەنگ زانیاری بدرێتە رۆژنامەنووسان و خۆیان كۆنتڕۆڵی پێشهاتەكان بكەن تا نەكەوینە هەڵەی زیاترەوە. 
سەرئەنجام ئەم رووماڵانە بەخزمەتی نەیار شكایەوەو لەبری قازانج زەرمەندبووین تێیدا. رۆحی شەهیدە سەربەرزەكانمان شادو بەهیوای زووچاكبوونەوەی بریندارەكانیشمان .

وتاری زیاتر


نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو