خەرامان
-6-
جێگەی پەنجەی شەهیدان
ئەبوایە هیچی لەسەر نەنووسم، چونکە تابلۆی وا خۆی سروشی نووسینە نەک پێویستی بە نووسین بێت.
ساڵەکە، رۆژەکەی ، دەمکەلی بەیانی یان زەردەی ئێوارە؟ گەرمیان یان کوێستانی ئازادستانە؟
ئەم کسپەیە دیمەنی هەموو کات و شوێنێکە تا شۆرش ئەلبومی هەبێ و تا گیانفیدا یاداشت بنوسێتەوە.
ئەگەر بە خوێن و فرمێسک بێ دەبێ کورد سەرداری گشت عالەم بێت. ئەگەر بە تابلۆی شەهیدان بێت بیکاسۆ و دالی بە شاگردی وێنەکێشی کردگار و سەنعەتی هونەرکاری کورد راناگیرێن.
دیمەنێک هێڵکاری نۆڤڵێتی کورد دەهۆنێتەوە. دیمەنێک هی کەسێکە لە پشتەوە ژیان و گیانی چەند کەسی پێوە پەیوەستە:
لە کوێ بینێژین کە گوڵاڵەی سووری وڵاتی لەسەر بروێ؟
کاممان بۆ دایکی بگێرینەوە کە دوا قسەی رووی لە کێ بوو؟ چۆن نامە بۆ یاری بنووسین کە چیتر چاوەڕێ نەبێ و لەسەر ئیزنی شەهید کراسی رەش بۆ حوزنی ئەبەدی نەپۆشێ، یان چۆن قەناعەت بە کورو کچی بکەین بچنەوە شار و لەسەر وەسێتی خۆی لە ماڵی باپیرە بسەکنێن تا خوێندن تەواو بکەن؟
ئەی هاوسەنگەرەکانی چۆن ئێوارە بێ ئەم بچنەوە ناو دێ ؟بێ سوعبەت و سوحبەتی ئەو چۆن هەڵبکەن؟
میوانی سەرشان کێیە وا سەری بۆ کامێرا دانەواندووە؟ ئەگەر شەهیدە کوردستانەکەی ئێستای لە چ حاڵ وبارێکە و ئەگەر زامداری شاهیدە لەسەر سەرگوزەشتەی شۆرشی خوێنین ئەمێستا لە کوێ وێستگەی خەباتی گیرساوەتەوە و داخۆ رۆژ و رۆژگارەکەی بیرماوە؟
تابلۆیەکی رەنگین خولیای نووسینی هەڵرشتووە و لە گوێشدا سۆزی حەمە جەزا سەدای هەیە؛
کوردستانەو کوردستانە
هەم گەرمیانە و هەم کوێستانە
دوژمنان دەستی لێمەدەن
جێگەی پەنجەی شەهیدانە