خەرامان 
-19- 
مامۆستا نییە،  بەڵام وانەی لێبوردەیی و  دەرسی خوێندەواری گوتۆتەوە. پێشمەرگەی خەباتی کوردایەتی و پێشمەرگەی خەباتی رۆشنایی و خوێندەوارییشە..زەینی گشت مناڵەکانی لەسەر حەرف و زانست و پێگەیاندن کردۆتەوە و کێوماڵی داهاتووی  گشت مناڵەکانی گوندەکەی کردووە و بۆ ئەمان و ئایندەش چەکی شەرەفی هەر پێ بووە. خەباتی پێشمەرگایەتی کاک  هیوا عەلی لە شارباژێری کوردایەتی بۆ ئەو رۆژەی رزگاری لە هەشتاکانی سەدەی رابردوو بووە، بەڵام خەباتی تەختەی ڕەش و تەباشیری مەدرەسەی قاچاخی بۆ دوا رۆژی گەل بووە. 
داخۆ کام لەم خوێندکارە ژیکەڵانەی مامۆستا هیوا پێگەیین  و کێ بۆتە ئەندازیار و مامۆستا و پێشمەرگە و کامیان مامۆستاکەیان لە 
بیر ماوە؟
رەنگە مامۆستا خۆشی ناوی خوێندکارەکانی بیر نەمابێ و ئەدگاریشیان  نەناسێتەوە. بەڵام مەعلومە خوێندکارەکان خۆیان مامۆستا هیوایان لە بیر ماوە.
دەبێ یاداشتەکانی مامۆستا چی تێدا نووسرابێ و داخۆ  ئەلبومی وێنەکانی بەشی کورتە چیرۆک یان نۆڤلێتێکی سادەیان تێدا مابێ؟. 
لەم بەرواری یەکێتیی مامۆستایانی مەزندا شانازییە بڵێین ئەم شۆڕشە هەر تۆماری ڤیدیۆیی تەق و تۆقی  نەبەردی پێشمەرگانە نییە، وردیلە شتی گەورەی وای تێدایە کە تانک و تۆپی دوژمن دەرەقەتی نایە. بەدەست ناگیرێ و بە بە پەڕەشوتی سەربازی کێوماڵ ناکرێ. کێ دەتوانێ حەرف و دێر و دەفتەر ڕام بکا و کێ پێی دەکرێ پێشمەرگەیەک  ببەزێنێ کە لەپی ئایندە دەخوێنێتەوە؟
(هیوا) هەر ناو نییە،  هیوا ناوەڕۆکیشە، ئەو چەکە و ئەو قەڵەمیشە ، ئەو دوانەی خەباتی هاوژینە و منداڵەکانیش خەریتەی نیشتمانی رزگاریین
مامۆستای پێشمەرگە و پێشمەرگەی مامۆستا ، ئەی کاک هیوا عەلی ،.. شەوت خۆش ئەگەر لە شەوی و بەیانیت باش ئەگەر بەخەبەر دەبیت