مستەفا محەمەد

پەرلەمانتارێک هەرگیز نەخەوت!

  2018-06-20 11:57      481 جار بینراوە        کۆمێنت

وەک ڕۆژنامەنوسێک كەچاودێری ڕەوشی سیاسی عیراق و کوردستانم کردووە ، مەڵۆیەک زانیاریم لەبارەی زۆرێک لایەن و کەسایەتی سیاسی کۆکردۆتەوەو ڕۆژانە تۆمارم کردوون، لێدوانی زۆریانم بیستووەو هەڵوێستەکانیشیان لەوێستگە سیاسییەکاندا جاروبار جێی تێبینم بوون، بەڵام هیچیان هێندەی لێدوان و هەڵوێستەکانی عادل نوری  کە پەرلەمانتارێکی کوردە لەئەنجومەنی نوێنەرانی عیراق سەرنجی ڕانەکێشاوم، بێگومان لەبەر ئەوە نا کە زۆر چالاک و پڕ ئیشەو پیشەییانە لەڕوی تەشریعی و ڕەقابیدا کاری خۆی کردووە، ئەوەیان مەبەستەکەی من نییە، بەڵکو هەمیشە هەڵوێستە عەجیب و غەریبەکانی ئەو بەڕێزە جێی تێڕامانی میدیا بوون ، لێرەدا هەندێکیان ڕیز دەکەم.
عادل نوری کوردێکی لەدایکبووی خانەقینیە، کەچی هیچ کات نەمانبینیوە لەبارەی ناوچە دابڕاوەکانەوە دەنگێکی هەڵبڕاو بێ، تەنانەت یەکگرتوو لەو ناوچەیەش کاندیدی نەکردو بەدەنگی هاووڵاتیانی پارێزگای سلێمانی چۆتە پەرلەمانی عیراق.
لەسەر چونە ناو هاوپەیمانی عەرەبی بۆ تێکدانی مەبدەئی تەوافوق فراکسیۆنی یەکگرتوو بێبەری بوونی خۆی لەناوبراو ڕاگەیاندو لەکوتلەکەی دووری خستەوە، لەکاتێکدا یەکێکە لەدامەزرێنەرانی ئەو حزبە ئیسلامیە.
لەئێستادا دەڵێ پەرلەمانتارێکی سەربەخۆم ، کەچی هاودیدی کاک بەرهەمەو شەڕی بەرژەوەندیەکانی لەبەغداوە بۆ دەکاو چاوی لەوەیە بەڕێزیان لەدوای کۆتایی هاتنی کاری پەرلەمانتاریی، لەخولی چوارەمدا ڕۆڵێکی لەحکومەتی عیراق بۆ بپچڕێ.
دوو ساڵ پێش ئێستا 56 واژۆی بۆ لێپرسینەوە لەئیبراهیم جەعفەری کۆکردەوەو ڕایگەیاند کە دڵنیایە بەهۆی ئەو تۆمەتانەی لەسەریەتی متمانەی لێ دەسەنرێتەوەو دواتریش ڕەوانەی دادگای دەکەن، کەچی تا ئێستا جەنابی جەعفەری حەقیبەی وەزارەتی دەرەوەی لایەو موعەززەز موکەڕڕەم کاری خۆی دەکا،
لەکاتی سوتانی کۆگاکەی ڕەسافەداکە سندوقەکانی دەنگدانی لێ بوو وێنەیەکی بڵاو کردەوەو لەسەری نوسیبووی «گاڵتەجاڕی کۆتایی هات «وەک ئاماژەیەک بۆ سووتانی ئەنجامی هەڵبژاردنەکان، کەچی وەزارەتی ناوخۆی عیراق دەریخست بەڵگەنامە سووتاوەکان دۆکیۆمێنتی تۆماری بایۆمەتری بوون، نەک بەڵگەنامەی هەڵبژاردن.
بەسیفەتی سەرۆکی لیژنەی گێڕانەوەی ڕاستییەکان چووە بارەگای کۆمسیۆن، بەڵام دەرکەوت کە ئەو لیژنەیە یاسایی نییەو لەپەرلەماندا دەنگی بۆ نەدراوە بۆیە بەرپرسانی کۆمسیۆن ئامادەنەبوون نەک گوێی لێ بگرن، تەنانەت پێشوازیشی لێبکەن، ئەو پەرلەمانتارە هەر جارێ چوبێتە ناو فڕۆکەخانەی بەغداوە، بەزمێکی ناوەتەوە، وەک بڵێی قینێکی تایبەتی لەبەرپرسانی هەڵگرتبێ زۆرتریش بۆ ڕاگەیاندن و میدیا لەوبارەیەوە هاتۆتە دەنگ، بۆ نمونە :
هەڵڵایەکی گەورەی نایەوە گوایە لەناو فڕۆکەخانەدا هەوڵی تیرۆرکردنی دراوە ، کەچی دواتر لایەنی ئەمنی فڕۆکەخانە بەڵگەنامەیان بڵاوکردەوە کە دەیسەلمێنێ ئەو ڕاگەیاندنەی پەرلەمانتاری ناوبراو دوورە لەڕاستییەوە و مەبەست لێی تەنها پەیاکردنی ناوو شوهرەی میدیاییەو هیچی تر، لەسەروبەندی شەڕی داعشدا، بڵاویکردەوە گوایە بە فڕۆکەی ڕوسی و ئاگاداری حکومەتی عیراق چەک و تەقەمەنی لەفڕۆکەخانەی بەغداوە بۆ داعش دەگوازرێتەوە، هەربۆیە وەزارەتی بەرگری عیراق داوای یاسایی لەدژی تۆمارکرد.
لەجارێکی تری چونیدا بۆ ناوفڕۆکەخانە، ئاماژەی بۆ ئەوە کرد کە لەکاتی گوێزانەوەی دەرمان و پێداویستی پزیشکی لەوەزارەتی تەندروستی عیراقەوە بۆ کوردستان گەندەڵی بینیوەو چەن تەنێک دەرمانی بینیوە کە لەبەشی کورد لەوێدا کەمکراوەتەوە.
لەبەرنامەیەکی تەلەفزیۆنیدا لەکاک عادل گوێبیست بووم کە «٩» نۆجار هەوڵی تیرۆرکردن و هەڕەشەو تەسفیەی جەسەدی دراوەو هەر نۆجارەکەش خوای گەورە بۆ ئاشکراکردنی گەندەڵکاران پاراستویەتی.
لەهەموو لێدوانەکانی ئەم دواییەیدا کە لەبارەی ساختەکاریەوە بۆ میدیا بڵاویکردوونەتەوە، بە گومان و هاجس قسەی کردووە کە ساختەکاری گەورە کراوە، لەکاتێکدا پێویستە وەک لیژنەکە هەموو وتەکانی لەدۆکیۆمێنتەوە سەرچاوە بگرن نەک زانیاری گوماناویی.
گوێم لێی بوو کە سەرۆک و ئەندامانی کۆمسیۆنی بەموجریم ناودەبرد لەکاتێکدا ئەو ئەندامی لیژنەی نەزاهەی عیراقیەو لەوە باش دەزانێ تۆمەتەکانی پێچەوانەی ڕاڕەوی موعتەبەری یاسایە، چونکە هێشتا کۆمسیۆن ئیحالەی دادگا نەکراوە بۆ لێپێچینەوەو هیچ بەڵگەیەکی گەندەڵی و هیچ تۆمەتێکیشیان بەسەردا ساغ نەکراوەتەوە. لەتێپەڕاندنی پڕۆژە یاسای هەمواری هەڵبژاردن هاوپەیمانێتی لەگەڵ تورکمان و عەرەبە شۆڤێنیەکان کردو بەوێنەیەک شەقامی کوردی و کەرکوکیەکانی لەخۆی ڕەنجاند، لەکاتێکدا خۆی لەدایکبووی خانەقینە کەشارێکی کودی کێشە لەسەرە، جەنابیان لەم شەوانەدا لەکەناڵی کوردسات دیمانەی هەبوو لە په‌یام و مێسه‌جه‌كه‌یدا ویستی لاباری خۆی بەوە ڕاستکاتەوە گوایە ئەوان تەنها بۆ ئەژمارکردنەوەی دەستی دەنگیان داوە ، نەک هەڵوەشاندنەوەی دەنگی پێشمەرگەو دەنگی تایبەت و ئەوەی ئیقراریش کراوە شتی وای تێدانییە، لەکاتێکدا ئەو ڕەشنوسی یاسایەی دەنگی بۆدراوەو ئێستا لەسەرۆکایەتی کۆماره بۆ تەسدیق کردنی بڕگەی هەڵوەشاندنەوەی دەنگی تایبەتی هەرێمی تێدایە، سەیرەکە لەوەدایە ئەو بڕگەیە لەدوای دەنگدانیش لەسەر پڕۆژە یاساکە بەنایاسایی زیادکراوە.

وتاری زیاتر


عیراق وەک ئەفغانستانی لێدێت؟‬ مستەفا محەمەد
2021-08-19 10:56      49 جار بینراوە






















بڕیارەکەی دادگاو لێکەوتەکانی‬ مستەفا محەمەد
2018-06-27 10:56      445 جار بینراوە

سەرکـەوتـنی یەکێتی قبوڵ بکەن‬ مستەفا محەمەد
2018-05-16 10:07      439 جار بینراوە

کاتێ بانگەشە پـێچەوانەیە‬ مستەفا محەمەد
2018-05-02 14:08      350 جار بینراوە


نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو