ئاوات كۆكه‌یی

هه‌ولێر له‌جه‌ژنێكی پڕ قـوربانیدا

  2020-02-01 18:53      108 جار بینراوە        کۆمێنت

لەبه‌یانی رۆژی (1/2/2004) كه‌ یه‌كه‌م رۆژی جه‌ژنی قوربان-ی ئه‌وساڵه‌بوو، باره‌گای مه‌ڵبه‌ندی سێی یه‌كێتیی نیشتمانیی كوردستان له‌ هه‌ولێر جمه‌ی ده‌هات له‌ ئه‌ندامان و دۆستان و تێكۆشه‌رانی و له‌ هاووڵاتیانی ئه‌وشاره‌ كه‌ بۆ پیرۆزبایی یه‌كه‌م رۆژی جه‌ژن ده‌سته‌ده‌سته‌ سه‌ردانی مه‌ڵبه‌ندیان ده‌كرد، ستافی مه‌ڵبه‌ندیش له‌گه‌ڵ به‌رپرسانی دیكه‌ی یه‌كێتی له‌ پایته‌خت و ئه‌وانه‌ش كه‌ ئه‌ركی ده‌وڵه‌تییان هه‌بوو، له‌ پێشوازی میواناندا بوون، ئه‌و رۆژه‌ وڵاتمان هێشتا لەسه‌ره‌تاكانی تیاچوونی رژێمی به‌عسدابوو، له‌سه‌ره‌تای درووستبوونه‌وه‌ی متمانه‌ی ناوخۆییدا بوو، بۆنه‌و بیانوو بۆ ئاهه‌نگ و ده‌ربڕینی خۆشی هێنده‌ زۆر بوو كه‌ وڵات یه‌ك پارچه‌ خه‌نده‌و ئامێزی میهره‌بانیی بوو، ئه‌و سه‌رده‌مه‌ هێنده‌ هیوابه‌خشبوو جۆشوخرۆشی ده‌به‌خشییه‌ ده‌روونیی ده‌رده‌دارانیش، جا له‌و دۆخه‌دا كه‌ وڵات یه‌كپارچه‌ هیوایه‌، مه‌راسیمی یه‌كه‌م رۆژی جه‌ژنی قوربانی ئه‌وساڵەو مه‌راسیمی ئاپۆرای جه‌ماوه‌ر و تێكۆشه‌ران و كادرانی یه‌كێتیی پێكه‌وەو گردبوونه‌وه‌یان له‌و شاره‌ لەدوای ساڵانێكی زۆر دابڕان، ببووه‌ كه‌رنه‌ڤاڵێكی ده‌گمه‌نی پڕ لەخه‌نده‌و هیوا، رێك له‌و كاته‌دا كه‌ جه‌ژن ته‌نیا جه‌ژنی قوربان نه‌بوو و هه‌موو بۆنه‌كان تێكه‌ڵ ببوون و نوقڵانه‌ی ئاسۆیه‌كی روونتر لێده‌درا، ده‌ستی ره‌شی تیرۆرو دژه‌ مرۆڤایه‌تی و دژه‌ ئاینییش، چووه‌ خوێنی ده‌یان خه‌ڵكی نیشتمانپه‌روه‌ر، ئاینپه‌روه‌ر، مرۆڤدۆست، تێكۆشه‌رو دڵسۆزی خاك و خه‌ڵكی كوردستان و ده‌یان كه‌سی ماندووی رێگه‌ی نه‌هێشتنی زوڵم و چه‌وسانه‌وه‌.
به‌ڵێ، ده‌ستی ره‌شی تیرۆر له‌ڕێگه‌ی تیرۆریستێكه‌وه‌ كه‌ لەژێر سیمای میوان و گوایا بۆ پیرۆزبایی جه‌ژن، وه‌ك باقیی سه‌ردانیكارانی دیكه‌ چووبووه‌ ناو ریزی ئاپۆرای جه‌ماوه‌رو میوانانی مه‌ڵبه‌ند، كاره‌ساتێكی وه‌حشیگه‌رانه‌ی خوڵقاند.
ئه‌و تیرۆریسته‌ی لەبه‌رگی میواندا دزه‌ی كردبووه‌ نێو ریزی سه‌ردانیكارانی مه‌ڵبه‌نده‌وه‌، خۆی ته‌قانده‌وەو ده‌یان كه‌س لەسه‌ركرده‌و كادران و ئه‌ندامانی یه‌كێتی و هاووڵاتیانی شه‌هید كردو ده‌یانییش بریندار بوون كه‌ برینی هه‌ندێكیان هێنده‌ سه‌خت بوو بۆ هه‌میشه‌ كه‌مئه‌ندام بوون و به‌شێكی جه‌سته‌یان لەده‌ستدا، كه‌ له‌ناو شه‌هیده‌كاندا هه‌ردوو ئه‌ندامی سه‌ركردایه‌تی یه‌كێتیی نیشتمانیی كوردستان (شاخه‌وان عه‌باس و خه‌سره‌و شێره‌) هه‌بوون كه‌ هه‌ر یه‌كێكیان به‌شێكی زۆری ته‌مه‌نیان لەكۆڕی تێكۆشانی كوردایه‌تی به‌گشتی و خه‌باتی سه‌ختی پێشمه‌رگایه‌تی به‌تایبه‌تی، به‌سه‌ر بردووه‌.
له‌نێو برینداره‌كانیش هه‌ڤاڵ (عه‌دنان موفتی) ئه‌ندامی مه‌كته‌بی سیاسی هه‌بوو كه‌ ئه‌وسا لێپرسراوی مه‌ڵبه‌ندیی سێی هه‌ولێر بوو.
هاوكات لەلقی سێی (پ.د.ك)یش كه‌ هه‌مان مه‌راسیمی پێشوازی و جه‌ژنه‌ پیرۆزه‌ به‌رێوه‌ده‌چوو، تیرۆرستێكی دیكه‌ به‌هه‌مان سیماو باوه‌ڕی بۆگه‌نه‌وه‌، خۆی ته‌قانده‌وەو له‌وێش هه‌مان كاره‌ساتی نایه‌وه‌.
ئه‌و رووداوه‌ هه‌وڵێكی دیكه‌ی نه‌یارانی كورد بوو بۆ تێكدانی خۆشی و شادی و بۆ درووستكردنه‌وه‌ی دووبه‌ره‌كیی بوو له‌نێو هێزه‌كانی كوردا، به‌حسابی خۆیان تا له‌ یه‌كه‌م ساتی رووداوه‌كه‌دا هه‌ر لایه‌نێك كت و پڕ په‌رچه‌كردارێكی هه‌بێت و ئه‌وی تر به‌ ئه‌نجامده‌ری هێرشه‌كه‌ی سه‌رخۆی بزانێت.
لەئه‌نجامدا جگه‌ له‌و كاره‌ساته‌ مرۆییه‌ی نایانه‌وەو جه‌رگی چه‌ندین دایك و باوكیان سوتاندو چه‌نده‌ها منداڵیان بێ باوك كردو ماڵی خه‌ڵكی بێتاوانیان شێواند، به‌ڵام خۆشبه‌ختانه‌ ئامانجه‌ بۆگه‌نه‌ سیاسییه‌كه‌یان نه‌هاته‌دی، ئیراده‌و ئاوه‌زی كورد لەپیلانی دوژمنان، گه‌وره‌تربوو.
سه‌ربه‌زیی بۆ گیانی پاكی شه‌هیدانی 1ی شوبات و بۆ هه‌ولێرو هه‌ولێرییه‌كان، سڵاویش بۆ خۆڕاگریی و قاره‌مانێتیی برینداره‌كان.
ژیاننامه‌ی شه‌هیدی سه‌ركرده‌ شاخه‌وان عه‌باس
شاخه‌وان عه‌باس پێشمه‌رگه‌ی دێرین و ئه‌ندامی كۆمیته‌ی سه‌ركردایه‌تی. ناوی ته‌واوی محه‌مه‌د عه‌باس عه‌وڵا، له‌دایكبووی ساڵی 1952ی شاری هه‌ولێر، ساڵی 1966 په‌یوه‌ندیی به‌یه‌كێتیی قوتابیانی كوردستانه‌وه‌ كردوه‌ و ساڵی 1967 بووه‌ به‌ئه‌ندامی پارتی دیموكراتی كوردستان. ساڵی 1972 په‌یوه‌ندیی به‌كۆمه‌ڵه‌ی ره‌نجده‌رانی كوردستانه‌وه‌ كردوه‌، ساڵی 1973 ئاماده‌یی كشتوكاڵی له‌هه‌ولێر ته‌واو كردو بۆ ساڵی دواتر بوو به‌سه‌ربازو ره‌وانه‌ی دیوانیه‌ كرا، ساڵی 1974 له‌گه‌ڵ بڵاوبوونه‌وه‌ی هه‌واڵی به‌ئه‌نجام نه‌گه‌یشتنی وتووێژی كوردو حكومه‌تی عیراق و زیادبوونی ئه‌گه‌ری ده‌ستپێكردنه‌وه‌ی شه‌ڕ، وازی له‌سه‌ربازی هێناو گه‌ڕایه‌وه‌ بۆ هه‌ولێر، له‌وێ چووه‌ ناوچه‌كانی ژێر ده‌سه‌ڵاتی شۆڕش و له‌لقی كشتوكاڵی هیران به‌فه‌رمانبه‌ر دامه‌زرا، ساڵی 1975 پاش نسكۆی شۆڕش، ئاواره‌ی ئێران بوو، ماوه‌یه‌ك له‌ئۆردوگای به‌هرام له‌دیزفول گیرسایه‌وه‌، له‌مانگی ئایاردا گه‌ڕایه‌وه‌ بۆ كوردستان و په‌یوه‌ندیی به‌ڕێكخستنه‌كانی كۆمه‌ڵه‌وه‌ كرده‌وه‌، له‌م سه‌روبه‌نده‌شدا به‌فه‌رمانبه‌ر له‌دیبه‌گه‌ دامه‌زرا، له‌كانونی دووه‌می ساڵی 1976 له‌دیبه‌گه‌ ده‌ستگیر كراو برایه‌ ئه‌منی هه‌ولێر، تۆمه‌تی ئه‌وه‌ی خرایه‌ پاڵ كه‌ په‌یوه‌ندیی به‌ڕێكخستنی كۆمه‌ڵه‌وه‌ هه‌یه‌، سه‌ره‌ڕای ئازاردان، هیچی نه‌دركاند، دواتر، برایه‌ به‌غداو له‌وێش خرایه‌وه‌ ژێر لێكۆڵینه‌وه‌و ئه‌شكه‌نجه‌دان، پاش ئه‌وه‌ی كه‌ هیچی له‌سه‌ر ساغ نه‌بۆوه‌، له‌كۆتایی مانگی شوبات ئازاد كراو گه‌ڕایه‌وه‌ سه‌ر كاری پێشووی له‌دیبه‌گه‌.
دواتر خۆی بۆ پیرمام گواسته‌وه‌، دوای ئه‌وه‌ی كه‌ په‌یوه‌ندیی به‌ڕێكخستنه‌كانی كۆمه‌ڵه‌وه‌ كرده‌وه‌، كرایه‌ ئه‌ندامی كۆمیته‌ی هه‌رێمی هه‌ولێرو لێپرسراوه‌تیی رێكخستنه‌كانی ناو شاری هه‌ولێری پێ سپێردرا، له‌مانگی ئایاری ساڵی 1977، پاش ئاشكرابوونی هه‌ندێ ئه‌ندامی رێكخستنه‌كان و شپرزه‌بونی دۆخه‌كه‌، هه‌ولێری به‌جێ هێشت و په‌یوه‌ندیی به‌هێزی پێشمه‌رگه‌وه‌ كردو له‌ده‌شتی هه‌ولێر بوو به‌كادیر، له‌ئه‌یلولی ساڵی 1977، له‌سه‌روبه‌ندی یه‌كه‌م كۆبوونه‌وه‌ی كۆمیته‌ی سه‌ركردایه‌تیی یه‌كێتیی نیشتمانیی كوردستان له‌برادۆست، كرایه‌ كارگێڕی لقی 4ی هه‌ولێر وه‌ك نوێنه‌ری كۆمه‌ڵه‌، له‌ئازاری 1978دا به‌شدار بوو له‌یه‌كه‌م كۆبوونه‌وه‌ی فراوانی كادیرانی كۆمه‌ڵه‌ له‌گوندی نۆكان، له‌مانگی حوزه‌یرانی ساڵی 1980 به‌شدار بوو له‌خولێكی عه‌سكه‌ری له‌باشووری لوبنان ( خولی لوبنان ) كه‌ رێكخراوی به‌ره‌ی دیموكراتی رزگاریی فه‌له‌ستین به‌ رابه‌رایه‌تیی نایف حه‌واتمه‌ به‌تایبه‌ت بۆ كادیره‌كانی یه‌كێتی سازی كردبوو، پاش گه‌ڕانه‌وه‌ی له‌ لوبنان، لێپرسراوه‌تیی قوه‌تی ده‌شتی هه‌ولێری گرته‌ ئه‌ستۆ، ساڵی 1982 دوا به‌دوای هه‌ڵوه‌شاندنه‌وه‌ی هه‌رێمه‌كان و پێكهێنانی تیپه‌كان، بووه‌ یه‌كه‌م فه‌رمانده‌ی تیپی 86ی ده‌شتی هه‌ولێر و دواتریش بووه‌ فه‌رمانده‌ی تیپی 85ی به‌ڕانه‌تی.
دوای راپه‌ڕینی ساڵی 1991، كرایه‌ لێپرسراوی مه‌ڵبه‌ندی 3ی رێكخستنی هه‌ولێر كه‌ له‌و كاته‌دا باره‌گاكه‌ی له‌شه‌قڵاوه‌ بوو، ساڵی 1992 له‌كۆنگره‌ی یه‌كه‌می یه‌كێتیی نیشتمانیی كوردستان به‌ئه‌ندامی سه‌ركردایه‌تی هه‌ڵبژێردرا. هه‌مان ساڵ، دوا به‌دوای هه‌ڵبژاردنی ئه‌نجومه‌نی نیشتمانیی كوردستان، به‌ئه‌ندامی په‌رله‌مان له‌سه‌ر لیستی سه‌وز هه‌ڵبژێردرا، ساڵی 2000 بووه‌ به‌رپرسی مه‌كته‌بی مافی مرۆڤ، ساڵی 2001 له‌كۆنگره‌ی دووه‌می یه‌كێتیی نیشتمانیی كوردستان له‌سلێمانی، به‌ئه‌ندامی كۆمیته‌ی سه‌ركردایه‌تی هه‌ڵبژێردرایه‌وه‌.
له‌یه‌كی شوباتی ساڵی 2004 له‌ته‌قینه‌وه‌ تیرۆریستییه‌ خۆكوژییه‌كه‌ی ناو مه‌ڵبه‌ندی 3ی رێكخستنی هه‌ولێر، له‌گه‌ڵ پۆلێك ئه‌ندام و كادیردا شه‌هید بوو. دیارترین به‌رهه‌مه‌كانی:
سه‌فه‌ری كوردایه‌تی: بیره‌وه‌ری.
ژیاننامه‌ی شه‌هیدی سه‌ركرده‌ خه‌سره‌و شێره‌
خه‌سره‌و شێره‌ كادیری‌ رێكخستن‌و ئه‌ندامی‌ كۆمیته‌ی‌ سه‌ركردایه‌تیی‌ یه‌كێتیی‌ نیشتمانیی‌ كوردستان، ناوی‌ ته‌واوی‌ خه‌سره‌و هادی‌ سمایل ته‌ها، له‌دایكبوی‌ ساڵی‌ 1957ی‌ گوندی‌ چه‌غه‌میره‌ی‌ ناوچه‌ی‌ كه‌ندیناوه‌ی‌ قه‌زای‌ مه‌خمور، خوێندنی‌ سه‌ره‌تایی‌‌و ناوه‌ندی‌‌و ئاماده‌یی‌ له‌هه‌ولێر ته‌واو كردووه‌، ساڵی‌ 1978 په‌یوه‌ندیی‌ به‌ڕێكخستنه‌كانی‌ یه‌كێتیی‌ نیشتمانیی‌ كوردستانه‌وه‌ كردووه‌، ساڵی‌ 1981 بۆته‌ پێشمه‌رگه‌و له‌ناوچه‌كانی‌ خۆشناوه‌تی‌‌و ده‌وروبه‌ری‌ كۆیه‌ ئه‌ركی‌ كادیری‌ سیاسیی‌ پێ‌ سپێردراوه‌.
له‌ساڵانی‌ 1991- 1992دا بۆته‌ ئه‌ندامی‌ كۆمیته‌ی‌ رێكخستنی‌ مه‌خمور، ساڵی‌ 1992 به‌شدار بووه‌ له‌كۆنگره‌ی‌ یه‌كه‌می‌ یه‌كێتیی‌ نیشتمانیی‌ كوردستان، ساڵی‌ 1993 بۆته‌ لێپرسراوی‌ كۆمیته‌ی‌ رێكخستن له‌سنوری‌ هه‌ولێر، ساڵی‌ 1994 بۆته‌ كارگێڕی‌ مه‌ڵبه‌ندی‌ رێكخستنی‌ نه‌ینه‌وا- ئاكرێ‌‌و لێپرسراوه‌تیی‌ به‌شی‌ راگه‌یاندنی‌ گرتۆته‌ ئه‌ستۆ، ساڵی‌ 1995 له‌مه‌ڵبه‌ندی‌ 3ی‌ رێكخستنی‌ هه‌ولێر بۆته‌ كارگێڕو سه‌رباری‌ ئه‌وه‌ی‌ كه‌لێپرسراوی‌ ئیداریی‌ مه‌ڵبه‌ند بووه‌، سه‌رپه‌رشتیی‌ كۆمیته‌كانی‌ رێكخستنی‌ كۆیه‌و ته‌قته‌قیشی‌ كردووه‌، ساڵی‌ 1997 كراوه‌ته‌ ئه‌ندامی‌ مه‌كته‌بی‌ رێكخستن‌و لێپرسراوه‌تیی‌ به‌ڕێوه‌بردنی‌ رێكخستنه‌ نهێنییه‌كانی‌ هه‌ولێری‌ یه‌كێتیی‌ نیشتمانیی‌ كوردستانی‌ پێ‌ سپێردراوه‌.
ساڵی‌ 1999 له‌كۆنفره‌نسی‌ مه‌ڵبه‌نده‌كاندا به‌جێگری‌ لێپرسراوی‌ مه‌ڵبه‌ندی‌ 3ی‌ رێكخستنی‌ هه‌ولێر هه‌ڵبژێردرا، هه‌ر له‌و ساڵه‌شدا بووه‌ نوێنه‌ری‌ یه‌كێتیی‌ نیشتمانیی‌ كوردستان له‌هێزی‌ پاراستنی‌ ئاشتی‌(PMF). ساڵی‌ 2001 له‌كۆنفره‌نسی‌ دووه‌می‌ یه‌كێتیی‌ نیشتمانیی‌ كوردستاندا به‌ئه‌ندامی‌ یه‌ده‌كی‌ كۆمیته‌ی‌ سه‌ركردایه‌تی‌ هه‌ڵبژێردرا.
ساڵی‌ دواتر لێپرسراوه‌تیی‌ مه‌ڵبه‌ندی‌ 3ی‌ رێكخستنی‌ هه‌ولێری‌ گرته‌ ئه‌ستۆ. ساڵی‌ 2003 له‌چوارچێوه‌ی‌ پرۆسه‌ی‌ ئاساییكردنه‌وه‌ی‌ ره‌وشی‌ سیاسیی‌ هه‌رێمی‌ كوردستاندا، له‌گه‌ڵ‌ هه‌ر یه‌ك له‌عه‌دنان موفتی‌ ‌و سه‌عدی‌ ئه‌حمه‌د پیره‌ و شاخه‌وان عه‌باس ی‌ گه‌ڕایه‌وه‌ بۆ هه‌ولێر، له‌مه‌ڵبه‌ندی‌ 3ی‌ رێكخستنی‌ هه‌ولێردا كاری‌ كردو لێپرسراوه‌تیی‌ به‌شی‌ رێكخستنی‌ گرته‌ ئه‌ستۆ.
له‌یه‌كی‌ شوباتی‌ 2004دا له‌ته‌قینه‌وه‌ خۆكوژییه‌ تیرۆریستییه‌كه‌ی‌ ناو باره‌گای‌ مه‌ڵبه‌ندی‌ 3ی‌ رێكخستنی‌ هه‌ولێردا له‌گه‌ڵ‌ پۆلێك ئه‌ندام‌و كادیردا شه‌هید بوو.

وتاری زیاتر







نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو