(91)
پێنج كەس بووین.. یەكێكمان تێدا نەبوو كە هەمان رەنگ و بیروباوەڕی ئەوەی تری هەبێت… یان هەمان پلەو كاری تری حزبی و حكومی هەبێت (هەریەكەشمان خەڵكی دەڤەرێك بووین) یاخود وەكو ئەو قەناعەت و بڕوای بە هەمان ئامانج هەبێت لە ژیانیدا. پێنج كەس كە ساڵەها بوو برادەری شەخسی یەكتر بووین، بەڵام پێنج جیهانی جیاواز. بەندە (ی.ن.ك) و ئەویتر پارتی دیموكراتی كوردستان، سێیەم گۆڕان، ئەوانی تریش یەكگرتووی ئیسلامی و كۆمەڵ بوون. هەر پێنجمان لەسەر یەك خوان نانمان دەخوارد. كەسێك لەو پێنج كەسە نەبوو خەمی كوردستان و تەبایی نەبێت. هەموومان باسمان لە تەبایی و برایەتی دەكردو خەمی پاراستنی ئەزموونەكەمان بوو. جارێ هەر باسی سەرلەنوێ دابەشكردنەوەی كوردستان و دووئیدارەیی مەكە، بەڵام ئەوەی لەسەری ناكۆك بووین، شەڕكردن بوو لەسەر شوێن و دەستكەوتی حزبەكانمان، لەسەر چۆنیەتی تێڕوانینی هەریەكەمان بۆ جێبەجێكردنی هەق و دادپەروەری.
مرۆڤێكی كاسبكار، جوتیارێكی نەخوێندەواری گوند، شوانێكی بەر رانەمەڕی دەشت و كێوەكان، چۆن بتوانن لەنێو ئەو حزبانە هەق و ناهەق لە یەكتر جیابكاتەوە. (لە دنیادا چەندان قارەمان و پاڵەوان لە پێناوی ئامانجێكی ناڕەوا گیانی خۆیان بەختكرد) گەلێ جار لەشەڕدا تۆ یەكێك دەكوژیت كە هەرگیز نەتدیوەو نایناسیت، ڕقیشت لێی نابێتەوەو هەست بە هیچ شتێكیش بەرامبەری ناكەیت، بەڵام لەسەر پاراستنی حزبەكەت درێغی ناكەیت و دەیكوژیت (زانیتس- سەربازێكی پاشایەتی حكومەتی یۆنان بوو، دڵی بۆ كۆمۆنیستەكانی شاخ لێی دەداو نەیدەویست فەرمانەكانی سەركردەی سوپا لە دژی پێشمەرگەكان جێبەجێ بكات، بەڵام كاتێك پێشمەرگە كۆمۆنیستەكانی شاخ هاتنە خوارەوەو ئۆردوگاكەیان گرت، ئەو سەربازە گوللەباران كرا).
**مژدە… مژدە… هەواڵێكی خۆش و گرنگ
جەنگ كۆتایی هات… سەركردەكانی هەردوولای شەڕی براكوژی…چ ئەوانەی لەڕۆژهەڵات، چ ئەوانەی لەڕۆژئاوا لە كەپرێكی نێوان سنووری دەستكردی هەردوولا كۆبوونەوە. تاكو دەست بخەنە ناو دەستی یەكترو بڵێن (كوڕینە بۆ یەكتر بكوژین… ئایا زمانی دیالۆگ باشتر نییە… ئەی ئێمە هەموومان برای یەكتر نین… ئێمە بەیەك زمان قسە ناكەین… ئەگەر كڵاوە سەوزو سوورەكان فڕێ بدەین هەموومان كورد نین… كەواتە شەڕ لە پای چی…؟ هەردوولا ئازاین، دەیان پێشمەرگەو سەركردەو خەڵكی سڤیلمان لەیەكتر كوشت، هەرچی پارەو پول هەبوو خستمانە لوولەی تفەنگەكان و بەڕووی یەكتردا تەقاندمان. لە پەشیمانی بەولاوە چیمان چنییەوە…؟ كەواتە با دەست بخەینە ناو دەستی یەكترو گەلەكەمان لە دوودڵی و ناڕەحەتی شەڕی كورد كوژە بەدووربگرین. ئیتر ئەو هەموو بازگەو سەنگەرو لووتكەی شاخەكان چۆڵ دەكەین، تفەنگەكان بێدەنگ دەكەین.. دەگەڕێینەوە نێو ماڵ و منداڵی خۆمان.
هاووڵاتیانی شارو دێهاتەكان بە چەپڵەڕێزان پێشوازییان لەو ئاشتەواییە كردو لەسەر رێگاو شەقامەكان پێشوازییان لە هەردوولا كرد.
(ئەمەی سەرەوە خەونی ژمارەیەكی زۆر لەپێشمەرگەكانی یەكێتی و پارتی بوو لەكاتی شەڕی ناوخۆدا).
*براكوژی: ناوی رۆمانێكە، نووسەری گەورەو ناسراوی یۆنان (نیكۆس كازانتزاكی) نووسیویەتی و مامۆستا (عەبدولكەریم شێخانی) وەریگێڕاوەتەسەر زمانی كوردی.
**ناوەڕۆكی ئەم گۆشەیە بە هەندێ دەستكارییەوە لەناوو جێگۆڕكێی رستەكان لەو ڕۆمانە وەرگیراوە.