ئەڵمانیا هاریکاری بەپەلەی ناوچە زیانلێکەووتووەکانی دەکات

  2021-07-21 21:31      150 جار بینراوە        کۆمێنت

وەزیری دارایی ئەڵمانیا رایدەگەیەنێت، نزیكەی 400 ملیۆن یۆرۆ هاریكاری بەپەلەی ئەو ناوچانە دەكرێت كە لە ئەنجامی روودانی لافاو لەویلایەتەكانی راینلاند-پلاز و باكووری راین ڤێستفالنی رۆژئاوای ئەڵمانیا زیانیان پێگەیشتووە.
لەلێدوانێكی رۆژنامەوانیدا ئۆلاف شۆڵز، وەزیری دارایی ئەڵمانیا  رایگەیاند، لافاوەكان زیانی زۆریان لێ كەوتووەتەوە و پێویستە بە خێرایی هاوكاری زیانبەركەوتووانی لافاوەكە بكرێت، هاوكات تیشكی خستە سەر ئەوەی كە لەم بارەیەوە هەنگاوی پێویستییان ناوە و وەك هەنگاوی یەكەمیش نزیكەی بڕی 400 ملیۆن یۆرۆیان بۆ ئەم مەبەستە تەرخان كردووە.
ئاماژەی بەوەشكرد كە نیوەی ئەم پارە لەلایەن حكوومەتی فیدڕاڵی و نیوەكەی دیكەیشی لەلایەن ویلایەتەكانەوە بەمەبەستی نۆژەنكردنەوە و چاككردنەوەی باڵەخانە و ژێرخانەكان و هاوكاریكردنی ئەوانەی پێویستییان بە هاوكاری بەپەلەیە خەرج دەكرێت.

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو