سەرۆكایەتی یەكێتیی پەیامێك ئاراستەی مامۆستایان دەكات
"دەبێت هەرچی زووە حكومەت بەدەم داخوازییە رەواكانی مامۆستایانەوە بێت"

  2020-05-15 12:34      175 جار بینراوە        کۆمێنت

سەرۆكایەتی یەكێتیی نیشتمانیی كوردستان لەپەیامێكدا پیرۆزبایی لەیادی دامەزراندانی یەكێتی مامۆستایانی كوردستان دەكات و رایدەگەیەنێت خۆمان بەپشتیوان و خەمخۆری راستەقینەی مامۆستایان و پەروەردەكارانی كوردستان دەزانین و دەنگمان دەخەینە پاڵ سەرجەم داواكارییە رەواكانیان.
دەقی پەیامەكە:
۱٥ی ئایار رۆژێكی پرشنگدارە لەمێژووی هاوچەرخی كوردستاندا، دامەزراندنی یەكێتی مامۆستایانی كوردستان بەر لە پەنجاو هەشت ساڵ ئاماژەیەكی ئەرێنییە بۆ بزوتنەوەی زانستخوازی و پێشكەوتنی كۆمەڵی كوردەواری.
ئێمە لەمڕۆژەدا رێزی بێ پایانمان بۆ تەواوی مامۆستایانی كوردستان دەردەبڕین و دەنگمان دەخەینە پاڵ دەنگیان بۆ داكۆكیكردن لەسەرجەم مافەكانیان و فەراهەمكردنی سەرجەم پێداویستییەكانیان.
مامۆستایانی كوردستان بەگشتی و رێكخراوە تێكۆشەرەكەیان لەسەرجەم وێستگە مێژووییەكانی دۆخی میللەتەكەماندا رۆڵی پێشەنگیان بینیوە و هەمیشە بەزانست و پەرروەردەیەكی خەباتكارانە رۆڵەی كوردیان گۆشكردووە.
ئێمە لەیەكێتی نیشتمانی كوردستان، خۆمان بەپشتیوان و خەمخۆری راستەقینەی مامۆستایان و پەروەردەكارانی كوردستان دەزانین و دەنگمان دەخەینە پاڵ سەرجەم داواكارییە رەواكانیان، پێشمان وایە دەبێت رۆڵی زیاتر بەمامۆستایان بدرێت و زیاتر خزمەت بكرێن، چونكە بنەمای هەموو پێشكەوتنێك لە وڵاتدا زانستە، زانستیش بەهۆی مامۆستایانەوە بۆ نەوەكانمان دەگوازرێتەوە.
لە ئێستاشدا وێڕای سەرجەم ئەو قەیران و كێشانەی بەرۆكیان بە وڵاتمان گرتووە، پەروەردەكاران رۆڵی پێشەنگ دەگێڕن و لەخەمی داھاتووی نەوەكانمان كەرتی پەروەردەیان بەبەهێزی هێشتۆتەوە كەئەمە جێگای ستایش و پێزانینە.
ئەگەرچی لەرابردووشدا، سەدان مامۆستای تێكۆشەر لە رێی زانست و خەباتدا رۆحی خۆیان بەم خاكە بەخشیوە و رووبەڕووی زیندان و ئەشكەنجە و سێدارە بوونەتەوە، لە دوای راپەڕینیش بە دروشمی مامۆستایان سەری بەرزیان بۆ موچە نەوی ناكەن، داینەمۆی بەردەوامی سیستمی پەروەردە بوون لە كوردستاندا، بەڵام لە ئێستادا كە دۆخ و سەردەم گۆڕاوە ، دەبێت هەرچی زووە حكومەت بەدەم داخوازییە رەواكانی مامۆستایانەوە بێت و سەرجەم داوا شایستەكانیان جێبەجێ بكات.
پیرۆزە یادی پەنجاو هەشت ساڵەی دامەزراندنی یەكێتیی مامۆستایانی كوردستان.

سەرۆكایەتی یەكێتیی نیشتمانیی كوردستان
١٥ ئایاری ٢٠٢٠

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو