سزاكانی ئەمریكاو ڤایرۆسی كۆرۆنا عەمبارەكانی نەوتی ئێران لە پڕبوون نزیك دەكەنەوە

  2020-07-08 11:58      122 جار بینراوە        کۆمێنت

ئاژانسی رۆیتەرز ئاشكرای كرد، بەرهەمهێنانی نەوتی ئێران بۆ نزمترین ئاستی دابەزیوەو عەمبارەكانیش پڕ بوون، بەوپێیەی سزاكانی ئەمریكاو پەتای ڤایرۆسی كۆرۆنای نوێ تەنگی پێ هەڵچنیون.
رۆیتەرز بە پشتبەستن بە هەندێك ماڵپەڕی داتای تایبەت بە پیشەسازیی نەوت و بازرگانی وڵاتانی جیهان، راپۆرتێكی لەبارەی بڕی نەوتی عەمباركراوی ئێران و بارودۆخی وڵاتەكە بڵاوكردەوە، لە كاتێكدا ماوەی دوو ساڵە، سزاكانی واشنتن بەسەر تاراندا سەپێندراونەتەوەو پەتای كۆرۆناش تەنگی بە وڵاتەكە هەڵچنیوە.
لە راپۆرتەكەدا ئاماژە بە زانیارییەكانی گرووپی كۆمپانیاكانی فاكتس گلۆبەڵ ئینێرجی كراوە كە ئاشكرای كرد لە مانگی نیساندا بڕی نەوتی عەمباركراوی ئێران، 54 ملیۆن بەرمیل بووە، لە كاتێكدا لە مانگی كانوونی دووەم، تەنها 15 ملیۆن بەرمیل بووە، لە مانگی حوزەیرانیش بۆ 63 ملیۆن بەرمیل بەرز بۆتەوە.
دامەزراوەی كپلێر بۆ زانیاریی هەواڵگریی بازاڕ، مەزەندەی ئەوەی كردووە تێكڕای نەوتی عەمباركراوی ئێران 66 ملیۆن بەرمیل نەوت بێت، لە كاتێكدا ئەم بڕە دەكاتە لە سەدا 85ی قەبارەی توانای عەمباركردنی وڵاتەكە.
داتاكانی ماڵپەڕی ڤێسڵز-ڤالیو ئەوەی خستووەتەڕوو، ئێران 54 كەشتیی نەوتهەڵگری هەیە بۆ گواستنەوەی بەرهەمە نەوتییەكانی وڵاتەكە.
وتەبێژی گرووپی كۆمپانیاكانی ئۆردن بۆ گواستنەوە روونیكردەوە، پێشبینی دەكرێت عەمباركردنی نەوتی وڵاتەكە بەردەوام بێت، بەوپێیەی پێناچیت كەشتییەكان بتوانن بەمزووانە بازرگانی بكەن.
ساڵی 2018 سەرۆكی ئەمریكا، دۆناڵد ترەمپ ڕایگەیاند، لە رێككەوتنی ناووكی لەگەڵ ئێران دەكشێتەوەو سەرجەم سزاكانی پێشووی بە زیادیشەوە بەسەر ئێراندا سەپاند، ئەمەش وای كرد مامەڵە بازرگانییەكانی تاران نزیك لە وەستانی تەواوەتی ببێتەوە.
لەلایەكی دیكەشەوە، لەگەڵ سەرهەڵدانی پەتای ڤایرۆسی كۆرۆنای نوێ، وەك رێكارێكی تەندروستی زۆرینەی سێكتەرە پیشەسازییەكانی ئێران وەستان كە ئەمەش كێشەیكی دیكەی بۆ ئابووری و بازرگانیی وڵاتەكە دروستكرد.

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو