لەنزیك ئەنگێلا مێركل سیخوڕێك ئاشكرا بوو

  2020-07-10 19:48      136 جار بینراوە        کۆمێنت

 پێگەی ئەلكترۆنی"فوكس"و ڕۆژنامەی "بیلد"ی ئەڵمانی بەپشت بەستن بەڕاپۆرتێكی هەواڵگری ئەڵمانیا كەپێنج شەممەی دوێنێ 9ی تەموزی2020 بڵاویانكردەوە سیخوڕێكی میسری لەناو نوسینگەی ڕۆژنامەنوسی حكومەتی ئەڵمانی و بەدیاریكراوی لەنزیك"شتێڤان زایبرت"ی وتەبێژی ڕاوێژكاری ئەڵمانیا ئەنگێلا مێركل ئاشكرابوو كە بۆ هەواڵگری میسری ساڵانێكە لەپێشوازی میوانەكانی نوسینگەی ڕاگەیاندنی ڕاوێژكاری ئەڵمانیا كاریكردووە.
ڕۆژنامەی "بیلد" ئاماژەی بەوەداوە لەكانونی یەكەمی ساڵی ڕابردوودا بەئاگاداری داواكاری گشتی پۆلیسی ئیتیحادی تاوانەكان لەدژی گومانلێكراوێكی میسری دۆسییەی بەدواداچوون و لێكۆڵینەوەی دەستپێكردەوە لەم بارەیەوە وتەبێژی ئەنگێلامێركلی ڕاوێژكاری ئەڵمانیا روونیكردەوە ئەو تۆمەتبارە ساڵانێكی زۆر بۆ هەواڵگری میسری كاریكردووەو لێكۆڵینەوەكانیش لەسەر ئەو دۆسیەیە بەردەوامە، لەو ڕاپۆرتەی هەواڵگری ئەڵمانیدا ئەوەش هاتووە دەزگا هەواڵگریەكانی میسری لەهەوڵی ئەوەدابوون ئەو هاوڵاتیە میسریانە ڕاكێشنە ناو كاری هەواڵگریەوەو لەبەرژەوەندی میسر كاریان پێبكەن.
ڕاپۆرتەكەی دەزگای هەواڵگری ئەڵمانیا ئەوەشی ئاشكرا كردووە لەوڵاتی ئەڵمانیا دوو دەزگای هەواڵگری میسری بەناوەكانی"دەزگای ئاسایشی نیشتیمانی و دەزگای گشتی هەواڵگری"لەبەرژەوەندی میسر كاردەكەن و ئامانجیشیان كۆكردنەوەی زانیاریە لەسەر ئەو بەرهەڵستكارە میسریانەی كە لە ئەڵمانیا دەژین بەنمونەی ئەندامانی گروپی ئیخوان موسلیمین.
سایتی"فوكس"ی ئەڵمانی ئەوەشی ئاشكراكردووە كەسانی تری بەڕەگەز میسری كە هەندێكیان ئەندامانی كۆمەڵەی قیبتیە مەسیحیەكانن دەكرێ لەلایەن هەواڵگری ئەڵمانیاوە چاویان بخرێتەسەر.
ڕۆژنامەی"دی ڤێلت"یش لەم بارەیەوە نوسیویەتی ئەو زانیاریانە نەزانراوە كە ئەو سیخوڕە بۆ هەواڵگری میسری گواستویەتیەوە بەڵام ئەگەری ئەوە هەیەی ئەو سیخوڕە زانیاری لەسەر ڕۆژنامەنوسان لەبەرژەوەندی حكومەتی عەبدولفەتاح سیسی كۆكردبێتەوەو هەتا ئێستاش حكومەتی میسری هیچ كاردانەوەو لێدوانێكی لەسەر ئەو دۆسیەیە نەبووە.
شیهاب عوسمان- ئەڵمانیا

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو