هەولێر... 5 کەس بەچەکەوە هێرشدەکەنەسەر کافتریایەک و خاوەنەکەی برینداردەکەن

  2020-10-25 23:32      113 جار بینراوە        کۆمێنت
فۆتۆ: PUKNOW

لەهەولێر چەند کەسێک بەچەکەوە هێرشدەکەنەسەر کافتریایەک و خاوەنی کافتریاکە بەگولە برینداردەکەن، خاوەنی کافتریاکەش بۆ رووداو دەڵێت داوای پارەیان لەئێمە کرد، بەڵام لەبەرئەوەی پێمان نەدان، سێ گولەیان بەڕووی مندا تەقاندو قاچێکم برینداربوو و بەدەمانچەش لەسەرمیانداو برینداریان کردم."
 
رووداوەکە بەیانی رۆژی هەینی (23-10-2020) لەنزیک گوندی لوبنانی لەهەولێر روویداوە، بەگوتەی حەیدەر ساڵح، خاوەنی کافتریاکە ئەوانەی هێرشیان کردووەتەسەر کافتریاکە پێنج کەس بوون و "نزیکەی 7 گولەیان تەقاندووە".
 
حەیدەر ساڵح، خاوەنی کافتریای دیلمار لەهەولێر بەتۆڕی میدیایی رووداوی راگەیاند: بەرەبەیانی رۆژی هەینی پێنج کەس کە چواریان دەمانچەو یەکێکیان کڵاشینکۆڤی پێبوو، هاتنە ژوورەوەو داوای پارەیان کرد، ئێمە دوای ئەوەی داواکەی ئەوانمان رەتکردەوە هەڕەشەیان کردو چەند گولەیەکیان تەقاندو ناو کافتریاکەیان تێکدا. لەکاتی تەقکردنەکە گولەیەک بەر قاچی من کەوت و دواتر یەکێکیان بەدەمانچە لەسەری دام و برینداری کردم."
 
ئەو خاوەن کافتریایە ئاماژە بەوەش دەدات، کە ئەوان وەک خەڵکانی عەشایەر خۆیان ناساندووەو پێیانگوتین ئەگەر لەهیچ شوێنێک باسی ئەو رووداوە بکەن خراپترتان بەسەر دێنین.
 
لە بەشێکی دیکەی قسەکانیدا ئەو خاوەن کافتریایە رایدەگەیێنێت کە لەچەند رۆژی رابردوودا هاتوونەتە سەر کافتریایەکی دیکەی تەنیشتیان پارەو مۆبایلیان وەرگرتووەو دواتر رۆیشتوون، بەڵام چونکە ئەوان پارەیان داوە بەهیچ شێوەیەک تەقەیان نەکردووەو یەکسەر رۆیشتوون."
 
وەک خۆی ئاماژەی پێدا ئەوانە کەسانی ناسراون و بە ئاشکراو بەبێ ترس ئەو کارەیان کردووە،  دەشڵێت: ئێمە لەپۆلیس و ئاسایش سکاڵای یاساییمان تۆمارکردووەو بەڵێنیان پێداوین کە بەزووترین کات ئەو کەسانە دەستگیردەکەن، دەشڵێت لەگەڵ بەڕێوەبەری پۆلیسی هەولێر قسەیان کردووەو وتویەتی کە دەستیان بەلێکۆڵینەوە لەڕووداوەکە کردووەو بەڵێنی پێداوین کە بەزووترین کات هێرشکاران دەستگیردەکەن.
  
لەماوەی چەند رۆژی رابردووشدا دوو کەس بەچەکەوە هێرشیان کردەسەر دەرمانخانەیەک و ڤیدیۆکەی لەتۆڕە کۆمەڵایەتییەکان بڵاوکرایەوە. دوای چەند رۆژێک لەڕووداوەکە، وەزارەتی تەندروستیی هەرێمی کوردستان روونکردنەوەی لەبارەی بڵابوونەوەی گرتەڤیدیۆییەک بڵاوکردەوەو رایانگەیاند کە لێکۆڵینەوە لەڕووداوەکە دەکەن. 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو