ئەڵمانیا.. لەئێوارەیەكدا ئاراس حەمە سەعید تابلۆو سروشتی ئاوێتەی یەكتر كرد

  2018-12-09 15:49      258 جار بینراوە        کۆمێنت
بەشێك لەئێوارە كۆڕەكە

 ناوەندی پێكەوە ژیانی كوردو ئەڵمان میوانداری هونەرمەندی شێوەكار ئاراس حەمە سەعیدی كردو هونەرمەند لەڕێگەی ڤیدیۆ سكرینەوە ئەزمونەكانی خۆی لەبواری شێوەكاریدا بەپیشاندانی چەندین نمونەو وردەكاری قۆناغەكانی ژیانی هونەری نمایشكردو خوێندنەوەیەكی وردو جوانی سەبارەت بەئەزمونی كاركردنی خۆی پێشكەش كرد.
ئەو ئێوارە كۆڕە ئێوارە تابلۆو ئێوارە ڕەنگ و هارمۆنیای ڕەنگەكان و فڵچەو گەیاندنی جوانیەكانی سروشت بوو بەدیوە رەسەن و جوانەكەیدا.
هونەرمەند ئاراس حەمە سەعید لەژینگەیەكی رۆشنبیرو هونەرمەندو نیشتمانپەروەردا چاوی هەڵهیناوەو نەشونمایكردوەو وەك خۆی دەڵێ "سەرەتای دەستپێكی هەستی هونەری لەگیانمدا دەگەڕێتەوە بۆ ئەو سەردەمەی مێرد منداڵ بووم و دەچووم بۆ بینینی پێشانگاكان و چاوم بەتابلۆی هونەرمەندە بەتواناكانی وەك ئیسماعیل خەیات و لالە عەبدەو مامۆستا كامیل و عەلی جۆڵاو عەتا قەزازو چەندانی تر دەكەوت، ئیتر لەژێر كاریگەری ئەواندا خۆشەویستیم بۆ هونەری شێوەكاری  سەریهەڵداو تادەهات زیاتر دەبوو ئەمە جگە لەكاریگەری باوكم، چونكە باوكم كەسێكی ڕۆشنبیر بوو هونەرمەندە گەورەكانی جیهانی دەناسی و زانیاری زۆری پی بەخشیم.
لەمیانەی قسەكانیدا باسی لەكاریگەری و پشتگیری هەردوو هونەرمەند وەهبی رەسوڵ وخالد ڕەسوڵ كردو لەبەشێكیتردا باسی لەشێوازەكانی كاركردن و ئەو كەرەستانە كرد كە بەكاری هێناون لەئیشەكانیدا وەك مەرەكەب، مەرەكەب-لەسەردار، قەلەمی جاف، فەحم، زەیتی، كۆلاژ، میناتۆرو باستیل لەسەر رۆژنامە.
 هەر لەو ئێوارە سیمنیارو تابلۆو  كۆڕە رەنگاڵەییەدا  لەرێگەی ڕیكۆردەوە هونەرمەند وەهبی رەسوڵ خوێندنەوەیەكی وردو هەڵسەنگاندنی بۆ بەرهەمەكانی ئەم هونەرەمەندە كردو وتی: لەبەر ڕۆشنایی نەخشەی وتاری تەكنیكیدا هونەرمەند ئاراس كاردەكات و هەڵگری دنیایەكی گشتیەو كاری لەسەر سروشت كردوەو سروشت بەدیوە ڕەسەنەكەیدا دەخوێنێتەوەو بێزاری خۆیمان لە تەڵخی شار نیشان  دەدات و دەگەڕێتەوە بۆ باوەشی سروشت و لەگۆشەنیگای هزرو تێڕوانین و خوێندەوەیەكی هێمنانەوە لەگەڵ ئەو جوانیانەی سروشتدا كە هەندێكجار دەكەوێتە بەرمەترسی شێواندن بەهۆی شارستانیەتە سڕكراوەكانەوە پەیامێكمان پێدەبەخشێت واتە هەستمان بەدیوی نهێنیەكانی سروشت و جوانی ئاشنا دەكات ئەم  هونەرمەندە لەسەر كەرەسەی جۆراوجۆر كاریكردوەو وردەكاری و سەلیقەو پرشنگدانەوەی بەهرەو تواناو بەخشینی دەردەخات.
شیهاب عوسمان- ئەڵمانیا

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو