تەندروستی جیهانی هەواڵێكی دڵخۆشكەر رادەگەیەنێت

  2020-11-21 09:24      337 جار بینراوە        کۆمێنت

رێكخراوی تەندروستی جیهانی رایگەیاند كە لە تاقیكردنەوەیەكی سەر كارمەندانی تەندروستی بەریتانیا دەركەوتووە، ئەوانەی تووشی ڤایرۆسی كۆرۆنا بوون، ئەگەری تووشبوونیان بە ڤایرۆسەكە بەلانی كەمەوە بۆ ماوەی شەش مانگ زۆر كەم بووە و ئەمەش هەواڵێكی دڵخۆشكەرە و جێگەی هیوایە بۆ بەرهەمهێنانی پێكوتەكان.
بەرێوەبەری گشتی رێكخراوی تەندروستی جیهانی، تیدرۆس ئەدهانۆم گیبریسۆس لە بارەكای رێكخراوەكە لە شاری جنێڤ پایتەختی سویسرا لە رێگەی ڤیدیۆ كۆنفرانسەوە كۆبوونەویەكی لەگەڵ شارەزایانی پەتازانی ئەنجامدا.
تیدرۆس ئەدهانۆم گیبریسۆس راشیگەیاند كە لە ماوەی چوار هەفتەی رابردوودا لەسەرتاسەری جیهان ژمارەی حاڵەتەكانی تووشبوون بەراورد بە شەش مانگی یەكەمی سەرهەڵدانی پەتاكە زیاتر بووەو بەشێكی زۆر بەشی چاودێری چڕی نەخۆشخانەكانی ئەورووپا و ئەمریكای باكوور پڕبوون.
ئاشكراشی كرد كە هەواڵی دڵخۆشكەر هەن لەبارەی بەرهەمهێنانی ڤاكسینی ڤایرۆسی كۆرۆنای نوێ و وتیشی: ئەمە هیوای كۆتایی پێهێنانی ئەم ڤایرۆسەمان پێدەدات. لەم قۆناغەدا پێویستە ئەڵقەی بڵابوونەوەكە تێك بشكێنین و ئەوەی لەدەستماندایە بەكاری بهێنین بۆ رزگاركردنی گیانی زیاتر.
مایك ریان، بەڕێوەبەری پرۆگرامی دۆخی بەپەلەی رێكخراوی تەندروستی جیهانی، وەڵامی پرسیارێكی پەیوەندیدار بەو لێكۆڵینەوەیەی دایەوە كە لەسەر كارمەندانی تەندروستی بەریتانیا ئەنجامدراوەو تێدا دەركەوتووە كە ئەنجامی ئەم لێكۆڵینەوەیە زۆر دڵخۆشكەرە و زۆریش گرنگە بەوەی كە بزانرێت ئاستی بەرگریی مرۆڤ لە بەرامبەر ئەم ڤایرۆسە چەندە.
ئاماژەی بەوەشكرد، ئەمە جێگەی هیوایە لە رووی بەرهەمهێنانی پێكوتەكە، ئەگەر بەهەمان شێوە كاردانەوەی بەرگریی لە بەرامبەر پێكوتەكە نیشان بدرێت ئەوا دەتوانین هیوای بەدەستهێنانی ماوەیەكی زیاتری پاراستنمان هەبێت.

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو