مرۆڤ كە بەزەیی نەما، دەبێتە دڕەندەترین بوونەوەر
خێزانێك، بەبیانووی هەژاریی، پێنج ساڵ كچەكەیان لەقەفەسێكدا زیندانیی دەكەن

  2021-01-16 17:00      375 جار بینراوە        کۆمێنت

خێزانێك، هیچ بەزەییان نامێنێ و كچەكەیان كە كێشەی دەروونیی هەیە، بۆ ماوەی پێنج ساڵ لە قەفەسێكدا بەند دەكەن.
بیانووی ئەو خێزانە دڵڕەقە ئەوەیە كە چیتر توانای ئەوەیان نەماوە چارەسەرو چاودێریی بۆ كچەكەیان دابین بكەن كە تووشی كێشەی تێكچوونی مێشكی و دەروونی بووە.
بەگوێرەی راپۆرتێكی رۆژنامەی دەیلی مەیلی بەریتانی، پیپی (تەمەن 29 ساڵ) لەگەڵ خێزانەكەیدا لە فلپین ژیاوەو لە دوكانێك ئیشیكردووەو هیواو ئاواتیشی ئەوە بووە، ببێتە مۆدێل و نمایشكاری جلوبەرگ، بەڵام قەدەر پێچەوانەی هیواكانی وەستایەوەو ساڵی 2014 تووشی نەخۆشی (خەمۆكیی ئاڵتونیی) هات كە نەخۆشیەكی دەروونیی توندەو پێویستیی بەوەیە ببرێتە نەخۆشخانە. ئیتر بەم هۆیەوە لە نەخۆشخانە داخڵكراو ماوەی ساڵێك مایەوە تا باری دەروونیی باشتربوو بەجۆرێك پزیشكەكانیش رێگەیاندا بەیەكجاریی بگەڕێتەوە ماڵەوە، بەڵام ساڵی 2015، تەندروستی دەروونیی تێكدەچێتەوەو خێزانەكەشی، وەكچۆن هاوڕێیەكیان باسی دەكات، توانای خەرجیی چارەسەری كچەكەیان نامێنێ، بۆیە پەنا دەبەنە بەر رێگەیەكی زۆر بێبەزەییانە، ئەویش زیندانییكردنی كچەكە لەنێو قەفەسێكداو دوای ئەوە ئیتر باری تەندروستیی بەیەكجاریی رووخا.
بەقسەی خێزانەكەی، لەگەڵ نەبوونی دەرمانی پێویست، حاڵەتەكانی خەمۆكی و وڕێنە بوون بەبەشێك لەژیانی رۆژانەی و وایلیهێات كچەكەیان لەمامەڵەی لەگەڵ دەوروبەرەكەش توڕەو توندبێت و هەندێجاریش لەماڵەوە دەهاتەدەرەوەو بێئەوەی بزانێت بۆ كوێ دەڕوا، ملی رێگای دەگرتەبەر، بۆیە ناچاربوون پەنا ببەنە بەر زیندانییكردنی كچەكەیان لەقەفەسێكدا.
ئیتر پیپی وەك ئاژەڵ لەناو ئەو قەفەسەدا ژیانی بەڕێكردو جلەكانی بەری دڕاوو بۆگەن بووبوون و لەنێوان شیشەكانی قەفەسەكەوە خواردنی بۆ دادەنرا. خێزانەكەشی بەردەوام بوون لەسەر ئەم رەفتارەیان بەرامبەر بەكچەكەیان بەبیانووی ئەوەی خەرجیی نەخۆشخانەو چارەسەریان نییە.
بەمدواییانەش پیپی لە گرتەیەكی ڤیدیۆیی كورتدا دەركەوت كە ژمارەیەك لەكەناڵەكانی راگەیاندن بڵاویان كردەوەو هاوڕێیەكی ئەو خێزانەش داوا دەكات هاوكاریی پێشكەش بكرێت بۆ چارەسەری كچەكەو رزگاركردنی لە ژیانی ئەو قەفەسە.
سەرچاوە: skynews
ئامادەكردن و داڕشتنی: هاوناز شەوكەت

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو