جێگری سەرۆك وەزیران لەكۆبونەوەیەكدا لەگەڵ جەیمس سۆرنتۆن كونسوڵی گشتی بریتانیا، لە هەولێر پەیوەندییەكانی نێوان هەرێم و بەغدایان لە دوای پەسندكردنی بوودجەی فیدراڵی تاوتوێ كرد. 
بەگوێرەی راگەیەنراوی سەرۆكایەتی حكومەت، لە كۆبونەوەكەدا كە سەرلەئێوارەی چوارشەمە بەڕێوەچوو، كونسوڵی گشتی بریتانیا ستایشی رۆڵی هەرێمی كوردستان و شاندی دانوستانكاری هەرێمی كردووە،  لە هەوڵەكانیان بۆ تێپەڕاندنی یاسای بوودجەی 2021 ی عیراق و هیوای خواست بۆ لەمەودوا پەیوەندییەكانی هەولێر و بەغدا بەرەوپێشچونی باشتر بەخۆیەوە ببینێت. 
لەلای خۆشیەوە جێگری سەرۆكی حكومەتی هەرێمی كوردستان رایگەیاند،  تێپەڕاندنی یاسای بوودجە بە هەوڵ و كۆششی هەموو لایەك بووە و ئەزمونێكی باشیش بوو،  بۆ ئەوەی لەمەودوا هەموو كێشە هەڵپەسێردراوەكان بە رێگای دانوستان و لێك تێگەیشتن چارەسەر بكەین. 
قوباد تاڵەبانی باسی لەوەشكرد، لەدوای پەسندكردنی بوودجە، ئێستا حكومەتی هەرێمیش هەنگاوی باشی ناوە لە ئامادەكردنی پڕۆژە یاسای بوودجە و بەمەش دەستكراوەتر دەبن لە هەنگاونان بەرەو چاكسازی زیاتر و جێبەجێكردنی پڕۆژەی ئابوری و هەمەجۆركردنی سەرچاوەكانی داهات.