گومانەكانی سەر مردنەكەی مارادۆنا بوونە راستی

  2021-05-29 20:20      260 جار بینراوە        کۆمێنت

ماوەیەكی زۆرە لێكۆڵینەوەكان لەسەر چۆنییەتی مردنی مارادۆناو ئەو گومانانەی لەسەر مردنەكەی هەیە بەردەوامەو دواجار گومانەكانی پارێزەرەكەی لەسەر مردنكەی كە مردنێكی ئاسایی نەبووە بوون بەڕاستی.
لێكۆڵینەوەكانی دادگای باڵای ئەرجەنتین 7 پزیشكی راگرتووە بەتۆمەتی تێوەگلان لەمردنی بەئەنقەستی مارادۆناو گومانیش زۆرە لەسەر هەردوو كچەكەی كە ئەوانیش هاوبەشی ئەو تاوانەن و ئەوانیش لەهاوكێشەی تاوانەكەدا ناویان بەئاشكرا هاتووەو بەتێوەگڵاوی تاوانەكە تاوانبار كراون.
(25/11/2020) دییگۆ ئارماندۆ مارادۆنای ئەفسانەی تۆپی پێی جیهانی و ئەرجەنتین لەتەمەنی 60 ساڵیدا كۆچی دوایی كرد، ئەم ئەفسانەیەی تۆپی پێی جیهان و ئەرجەنتین وەك چۆن ژیانی تایبەتی و وەرزشیی هەمیشە جێگەی سەرنج و مایەی مشت و مڕێكی زۆربووە، مردنەكەشی هەروا بووە، ئەوەتا هەر چەند رۆژێكی كەم پاش كۆچی دواییەكەی، دەنگۆی ئەوە بڵاوبۆوە كە مارادۆنا لەئەنجامی كەمتەرخەمی پزیشكەكانی كۆچی دوایی كردووە، تیمی پزیشیكی چارەسەركەرەكەشی لەسەر داوای كەسوكارەكەی و بەتایبەتی كچەكانی جدیی نەبوون لەچارەسەركردنیداو كەمتەرخەم بوون لەچاودێریی كردنیدا بۆئەوەی بەهێواشی و لەسەرخۆ گیان لەدەست بدات.
تاكە كەس كە ئەم گومانەی هەبووەو وازی لەو كەیسە نەهێنا تا گەیشتە ئامانج، ماتیاس مۆرلا-ی پارێزەركەی مارادۆنا بووە، ئەم بەبەردەوامی پەنجەی تاوانی بۆ كچەكانی درێژ دەكردو دەیوت كچەكانی بۆ دەستكەوتنی میراتەكەی باوكیان هەموو شتێكی نەشیاو دەكەن تا دەگاتە كوشتنی باوكیان.
هەرئەو پارێزەرەی مارادۆنا تۆمارێكی دەنگی لە واتس ئەپەوە دەستكەوتووەو تیایدا لیۆ بۆدلۆك-ی پزیشكی نەشتەرگەریی مێشك و دەمار كە نەشتەرگەرییەكەی سەری بۆ مارادۆنا كردبوو، قسە لەگەڵ كەسێك دەكات و دەقی بەشێك لەوەڵامەكانی لیۆ بۆدلۆك بۆ كەسەكە بەمشێوەیەیە:
*بەڵێ بەراز.
*لەوەدەچێت تووشی سەكتەی دڵ و هەناسەدان بووبێت.
*قەڵەو دەمرێت.
*نازانم و ئاگادار نیم چی كردووە.
*گەمژە ئێستا من دەچم بۆ ئەوێ.
*تۆش هەوڵ بدە لەسەرخۆ بیت و ئارام بیت.
*ئیتر ئاوایە.
*ئەو نەخۆشێكی ئاڵۆزە.
*دەباشە با ئەوە ڕووبدات كەدەبێت رووبدات.
*نانا كۆتایی هاتووە.
*من ئێستا لەشەقامێكی خێرا بەڕێوەم.
*لەوەدەچێت مردبێت.
*بێگومانم و روونە.
ئەم بەڵگەیەو چەندین بەڵگەی تر لەلایەن ماتیاس مۆرلای پارێزەركەی مارادۆناوە پێشكەش بەدادگای ئەرجەنتین كراوە بۆ لێكۆڵینەوە لەسەری، هەر لەسەر ئەم بەڵگانەو روونبوونەوەی چۆنییەتی مردنەكەی، حەوت پزیشكی تیمی چارەسەركەری مارادۆنا ئێستا دەستبەسەرن و هەموو هاتن و چوونێكیان لەناو ئەرجەنتین لێ قەدەغەكراوەو رێگەی چوونە دەرەوەی وڵاتیشیان لێ قەدەغە كراوە.
جگە لەمانە ئەوەی سەرجەم گومانەكان لەسەر مردنی مارادۆنا پشتڕاست دەكاتەوە ئەوەیە دەركەوتووە 12 سەعات بەر لەوادەی راگەیاندنی مردنەكەی، مارادۆنا كۆچی دوایی كردووەو لەكاتی مردنەكەشیدا كەسی بەدیارەوە نەبووە، ئەمە لەكاتێكدا دەبوو تیمی پزیشكی چارەسەركەری مارادۆنا بەهیچ شێوەیەك فەرامۆشی نەكەن و چاودێری بەردەوامی بكەن و نەدەبوو بەتەنیا لەماڵەكەیدا جێی بهێڵن.
لێكۆڵینەوەكان و داواكارییەكانی ماتیاس مۆرلا ی پارێزەركەی مارادۆنا لێرەدا كۆتاییان نەهاتووە، بەڵكو مۆرلا دەڵێت: ماراۆدنا لەدوای خۆی 90 ملیۆن دۆلاری جێهێشتووە، كچەكانی هەمیشە چاویان لەو پارەیە بووە، (جیانینا و دالما)ی كچی هەتا باوكیان لەژیاندا بووە بەبەردەوامی داوای پارەی زۆریان لێدەكرد، هەمیشە رەفتاریان باش نەبووە لەگەڵ باوكیان، زۆر نەزانانەو گەمژانە داوای پارەیان بەدۆلار لێدەكرد، مارادۆناش زۆرجار داواكانیانی جێبەجێ نەدەكرد، بۆیە ماردۆناش زۆر ئەوانی نەدەویست.
مۆرلا زیاتر لەسەر ئەو دوو كچەی مارادۆنا دوواوەو دەڵێت: من ناڵێم ئەوان بانكی باوكیان بڕیوەو دزیوە، نەخێر، بەڵام ئەوان باوكیان دزی، ئەوان زۆر رقیان لەمنە، بەتایبەتی كە من بەئاگاداری مارادۆنا (کارتی بانک)ی هەردووكیانم راگرت و ئەوانیش لەسەر ئەمە لەگەڵ مارادۆنا بووبە دەنگە دەنگیان.
ئەو پارێزەرەی مارادۆنا دەشڵێت: یەك راستی لەئارادایە ئەویش ئەوەیە مارادۆنا مرد، بەڵام مردنێكی بەئەنقەسەت، كچەكانیشی دوو شوقەیان كڕی و ئەویان بەتەنیا لەماڵەكەی خۆی جێهێشت و هیچ ئاگاداری نەبوون، تەنیا خوشكەكانی ئاگاداری بوون.
ئێستا ئەم كەیسە بەڕێژەی 90% یەكلایی بۆتەوە، حەوت پزیشكی ئەرجەنتینی دەستیان لەمردنەكەی ئەودا هەبووە لەسەرو هەموویانەوە لیۆ بۆدلۆك-ی پزیشكی نەشتەرگەریی مێشك و دەمار كە نەشتەرگەرییەكەی سەری بۆ مارادۆنا كردبوو، هەردوو كچەكەشی (جیانینا و دالما) ش لەم تاوانە بێ بەش نین، لەوەدەچێت لەسەر داوای ئەوان بەرامبەر بەبڕە پارەیەكی زۆر ئەو تیمە پزیشكییە ئەم تاوانەیان ئەنجامدابێت.
پێدەچێت لەداهاتوویەكی نزیكدا بەتەواوی گومانەكان نەمێنن و ئاسۆی تاوانەكە روون ببێتەوەو تاوانبارو بێتاوان لەم كەیسەدا دەربكەون و دەربكەوێت كە مارادۆنا چۆن كوژراو كێ كوشتی و بۆچی كوژرا؟.
لەكوردستانی نوێ وەرگیراوە...


لیۆ بۆدلۆك – پزیشکەکەی مارادۆنا

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو