پشتیوانیی تەواوی یەکێتی بۆ چارەسەرکردنی کێشەکانیان دووپاتکردەوە
لاهور شێخ جەنگی: رێگەنادەین کێشەی نەخۆشخانەی هیوا بەسیاسی بکرێت و بدرێت بەکەرتی تایبەت

  2021-06-19 15:51      181 جار بینراوە        کۆمێنت

ئەمڕۆ شەممە ١٩ـی٦ـی٢٠٢١، لاهور شێخ جەنگی هاوسەرۆکی یەکێتیی نیشتمانیی کوردستان لەشاری سلێمانی بەهاوڕێیەتی د.میران محەمەد ئەندامی مەکتەبی سیاسیی یەکێتیی سەردانی نەخۆشخانەی هیوای کردو لەنزیکەوە لەکێشەو گرفتەکانی نەخۆشخانەکەی کۆڵییەوە. لە دیدارێکدا کە هەریەک لە د.هەڤاڵ ئەبوبەکر پارێزگاری سلێمانی و د.سەباح هەورامی بەڕێوەبەری گشتیی تەندروستی و د.یاد نەقشبەندی بەڕێوەبەری نەخۆشخانەی هیوا ئامادەیبوون، لاهور شێخ جەنگی بەوردی گوێی لەکێشەو گرفت و داواکارییەکانیان گرت و پشتیوانیی تەواوی خۆی و یەکێتیی نیشتمانیی کوردستانی بۆ چارەسەرکردنی کێشەکانیان دووپاتکردەوە، وتیشی: هەوڵە سیاسی و ئیدارییەکانمان دەخەینەگەڕ بۆ دابینکردنی پێداویستییەکانیان و هەرچی پێویست بێت بۆ ئەو نەخۆشخانەیە دەیکەین.
لاهور شێخ جەنگی رایگەیاند: رێگەنادەین کێشەی نەخۆشخانەی هیوا بەسیاسی بکرێت و بدرێت بەکەرتی تایبەت، ئەو نەخۆشخانەیە چەپکە گوڵی سەرۆک مام جەلالە بۆ شاری سلێمانی، وتیشی: نیگەرانین لەو هەوڵانەی کە لەم چەند ساڵەی رابردوو درکیان پێدەکرێت بۆ پاشەکشەو پەراوێزخستنی کەرتی گشتی لەبواری تەندروستی و گۆڕینی ئاراستەکەی بەرەو کەرتی تایبەت، ئەمەش دوورە لەبنەماکانی سۆشیال دیموکرات و زیانگەیاندنە بەخەڵکی هەژارو کەمدەرامەت.
جەختیشی کردەوە، کە وەک یەکێتیی نیشتمانیی کوردستان بەهەموو شێوەیەک دژی ئەو هەوڵانە دەوەستینەوە، ناهێڵین نەخۆشخانەی هیوا بکەوێت و بێ هیوا بکرێت و نەخۆشەکان زەرەرمەند ببن.
لاهور شێخ جەنگی بەڵێنی هاوکاری و پاڵپشتی پێدان و راشیگەیاند: جگە لەسەر ئاستی ناوخۆ، پەیوەندی بەلایەنی پەیوەندیدارەوە دەکەین لەحکومەتی عیراقی کە هاوکاری و پاڵپشتی ئەم نەخۆشخانەیە بکات، چونکە بەپێی ئاماری نەخۆشخانەی هیوا زۆرینەی نەخۆشەکان لەپارێزگاکانی تری عیراقەوە سەردانیان کردوون.
جەختیشیکردەوە، کە دەبێت بەشە بودجەی سلێمانی و نەخۆشخانەی هیوا لەو داهاتەی کە لەسندوقی کۆمەک بۆ نەخۆشی شێرپەنجە دیاریکراوە لەهەرێمی کوردستان وەک خۆی لێبکرێتەوەو لەکاتی خۆیدا خەرج بکرێت و هەوڵی زیادکردنیشی بدرێت، هاوکات دەبێت بەهاوسەنگی پارەی کۆمپانیاکانی دابینکردنی دەرمانی شێرپەنجە خەرج بکرێت و جیاوازی لەنێوان پارێزگاکانی هەرێمدا نەکرێت، کۆمپانیاکانیش هاوکارو پشوودرێژتر بن لەگەڵ کەرتی تەندروستی و نەبنە مایەی دروستکردنی ئاستەنگ لەبەردەم نەخۆشخانەکانی چارەسەرکردنی نەخۆشیی شێرپەنجە.
لەکۆتایی سەردانەکەیدا لاهور شێخ جەنگی بەشەکانی نەخۆشخانەکەو نەخۆشەکانی بەسەرکردەوەو هیوای چاکبوونەوەی بۆ خواستن.

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو