ریزبەندیی باشترین هێڵە ئاسمانییەكانی جیهان دیارییكرا

  2021-07-21 10:11      325 جار بینراوە        کۆمێنت

هەرچەندە ساڵی 2020 سەخت بوو بەتایبەتی بۆ پیشەسازیی فڕۆكەوانیی بەهۆی ئەوەی ژمارەیەكی زۆر لە كۆمپانیاكانی هێڵی ئاسمانیی بۆ ماوەیەكی زۆر فڕۆكەكانیان لەكاركردن وەستاندبوو، بەڵام هەر لەگەڵ دەستپێكردنەوەی گەشتی ئاسمانیی لەهەندێك شوێن، بە لەبەرچاوگرتنی پەتای كۆڕۆنا ماڵپەڕی (Airline Rating) راپۆرتی ساڵانەی خۆی لەبارەی باشترین كۆمپانیاكانی هێڵی ئاسمانیی دەركرد.
بەگوێرەی ریزبەندییەكەی ئەمساڵ، هێڵی ئاسمانیی قەتەڕی پێشەنگی ریزبەندییەكەی گرتووەو دوای ئەویش هێڵی ئاسمانیی نیوزلەندی دێت كە پێشتر شەش جار ریزی یەكەمی گرتبوو. جێفری تۆماس سەرنوسەری ماڵپەڕی (Airline Rating) بەدامەزراوەی CNNی راگەیاند كە چۆنیەتی بەدەنگەوەهاتنی هێڵی ئاسمانیی قەتەڕ بۆ پەتای كۆڕۆنا، ریزبەندییەكەی بۆ بەرژەوەندیی خۆی یەكلاییكردەوە. ئاماژەی بەوەشدا كە راگەیاندنی ریزبەندیی ساڵی 2020یان خستە 2021 بەهۆی پەتای كۆڕۆناوە كەجیهانی گرتۆتەوە.
بەگوێرەی راپۆرتەكە، ریزبەندییەكەی 10 باشترین هێڵە ئاسمانییەكانیانی جیهان بەمجۆرەن:
1- هێڵی ئاسمانیی قەتەڕی
2- هێڵی ئاسمانیی نیوزلەندا
3- هێڵی ئاسمانیی سەنگافورە
4- هێڵی ئاسمانیی كانتاس
5- هێڵی ئاسمانیی ئیمارات
6- هێڵی ئاسمانیی كاسای پاسیفیك
7- هێڵی ئاسمانیی ڤێرجن ئەتڵانتیك
8- هێڵی ئاسمانیی یەكگرتوو
9- هێڵی ئاسمانیی ئیڤا
10- هێڵی ئاسمانیی بەریتانیا

ئاژانسی سەلامەتیی فڕۆكەوانی و پۆلێنكردنی بەرهەمەكان كە بارەگاكەی لە ئوسترالیایە، لەسەر بنەمای چەند پێوەرێكی وەك تەمەنی فڕۆكەكان، تێبینیی گەشتیاران، قازانج و خستنەڕووی بەرهەمەكان خەڵات دەبەخشێتە هێڵە ئاسمانیەكان، بەڵام بۆ ئەمساڵ پێوەری مامەڵەكردنی هێڵە ئاسمانییەكان لەگەڵ Covid-19 زیادكرا بۆ پێوەرەكان. هەروەها بەهۆی پەتای كۆڕۆناشەوە، ئەمجارە پێوەری قازانجیان لاداوە، بەو پێیەی زۆربەی كۆمپانیاكانی جیهان زیانیان بەركەوتووە.
لەلایەكی ترەوە، ماڵپەڕەكە خەڵاتیشی داناوە بۆ باشترین كابینەی پلە یەك كە بۆ هێڵی ئاسمانیی سەنگافورە چوو، هەروەها باشترین ستافی فڕۆكە كە درا بە هێڵی ئاسمانیی ڤێرجن-ی ئوسترالی و هەرزانترین هێڵی ئاسمانیی ئەوروپاش درا بە ئیزی جێت. 

سەرچاوە: CNN
ئامادەكردن و داڕشتنەوەی: هاوناز شەوكەت

 

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو