لە  یادی  سی و چوار ساڵەی  ئەنفالی  دەڤەری  بەهدینان و ناوچە کوردنشینەکانی دەشتی نەینەوادا  ، وێڕای  دانەواندنی  سەری  ڕێز و  نەوازش بۆ   قوریانیانی  ئەو کارەساتەی  کە  تێیدا نزیکەی  پێنج هەزار کەس بونە قوربانیی و بێسەروو شوێن کران و سەدان گوند  لەگەڵ زەویدا تەخت کران .
لە  نێو ئەو کاولکاری و قوربانیانەی دەڤەری بەهدیناندا  ‌چەندین خوێندنگە و مەڵبەند و بنکەی تەندروستی و مزگەوت و کەنیسە  ڕوخان و سوتێنران و هەزاران موسڵمان وکریستیان و ئێزیدیی کەوتنە  بەر پەلامارو گرتن و کۆمەڵکوژکران،  بەڵام  تاکو ئێستا  هەنگاوی پێویست نەنراوە بۆ هێنانەوەی روفاتی قوربانیەکانی ئەودەڤەرە گرنگەی  کوردستان . 
 بۆیە هەر لەم یادە کارەساتبارەدا  پێویست و ئەرکی سەر شانی  حکومەتی هەرێم  و حکومەتی فیدڕاڵی و هەموانە ، هەوڵەکان چڕتربکرێتەوە  بۆ  ئاوڕدانەوەی زیاتر و جدیانە لەسەر قەبارەی ئەم  کارەسات و تاوانەی بەسەر میللەتەکەماندا هاتوە و کاربکرێت بۆ  هێنانەوەی ڕوفاتی شەهیدەکان و قەرەبوی کەس و کاریان بکرێتەوە  ، لە سەر  ئاستی نێودەوڵەتیش ئەم تاوانە بخرێتە نێو ریزی تاوانەکانی تری رژێمی بەعسی ڕوخاو  کە لەناوچەکانی تری کوردستان  بەرامبەر  بە گەلەکەمان ئەنجامی داوە بۆ ناساندنی  وەک جینۆساید  تاکو لە ئازار و مەینەتیەکانی کەس وکاری  ئەو قوربانیانە لە دەڤەری بەهدینان   کەم بکەینەوە .        
   
                  مەکتەبی سیاسی  
       یەکێتیی نیشتمانیی کوردستان