ئەمڕۆ یەکشەممە ٢٦ـ٣ـ٢٠٢٣ لە بارەگای مەکتەبی سیاسی لە شاری کەرکوک بە سەرپەرشتی هەڤاڵ ئاسۆ مامەند کارگێڕی مەکتەبی سیاسی یەکێتیی نیشتمانیی کوردستان، هەڤاڵانی لێپرسراوی مەڵبەندەکانی سنوری کەرکوک -سەڵاحەدین و بۆردی پێکهاتەکان و ژمارەیەک لە سەرکردایەتی کەرکوک کۆبوونەوە، لە کۆبونەوەکەدا دۆخی عیراق و هەرێمی کوردستان، کەرکوک و ناوچە جێناکۆکەکان تاوتوێ کران، هەروەک تەئکید لە یەکڕیزی و تەبایی ناو ماڵی کورد کرایەوە.

لە کۆبوونەوەکەدا هەڤاڵ ئاسۆ مامەند جەختی کردەوە؛ کە پرسی کەرکوک و ناوچە جێناکۆکەکان بە لای یەکێتییەوە مەسەلەیەکی ستراتیژی و نیشتمانییە و سازشی لەسەر ناکەین، مێژووش شاهێدە لە پێناو بە کوردستانی مانەوەی ئەو ناوچانە قوربانی زۆرمان بەخشیوە.

تەوەرێکی دیکەی کۆبوونەوەکە تایبەت بوو بە گەنجان و کاری رێکخراوەیی و تیایدا جەخت کرایەوە؛ یەکێک لە خەسڵەتە دیارەکانی یەکێتیی گەڕانەوە بووە بۆ خانووە قوڕەکان، هەروەها بایەخدانی زیاتر بە توێژی گەنجان و رەخساندنی دەرفەتی زیاتر بۆیان، بە جۆرێک لە نێو دام و دەزگاکاندا شوێن و پێگەیان هەبێت.