بافڵ جەلال تاڵەبانی، سەرۆكی یەكێتیی نیشتمانیی كوردستان لەگەڵ وەهاب هەڵەبجەیی، بەڕێوەبەری گشتیی دژەتیرۆرو ژمارەیەك لە فەرماندەكانی دژەتیرۆر كۆبووەوە.
‎لە سەرەتای كۆبوونەوەكەدا بەڕێوەبەری گشتیی دژەتیرۆر پلان و ستراتیژی هەواڵگری و سەربازیی داهاتووی بەڕێوەبەرایەتییەكەی بۆ پاراستنی هەرێم، رووبەڕووبوونەوەی تیرۆرو هەماهەنگی لەگەڵ هێزە عیراقییەكان و هاوپەیمانان خستەڕوو و جەختی لە بەردەوامی ئۆپەراسیۆن و هەوڵەكانیان كردەوە بۆ پاراستنی سەقامگیریی ناوچەكە.
‎لە بەرامبەردا سەرۆك بافڵ جەلال تاڵەبانی سوپاس و پێزانینی ئاڕاستەی هێزەكانی دژەتیرۆر كرد، وەك یەكەم هێزی دژەتیرۆر لە كوردستان و هەوڵەكانیان لەپێناو رووبەڕووبوونەوەی تیرۆریستان و شكستپێهێنانی چەندین پیلان بۆ تێكدانی ئاسایشی هەرێم.
ئاماژەی بەوەشکردووە، ئێوە نموونەی فەرماندەی دڵسۆزو بەئەمەكی كوردستانن و مێژوویەكی پڕ لە شانازیتان تۆماركردووە، چالاكییەكانتان لەپێناو پاراستنی سەقامگیریی هەرێم و خەڵكە خۆشەویستەكەی، گەواهیدەری دڵسۆزی و ماندوونەناسیی ئێوەیە.
‎سەرۆك بافڵ ڕاشیگەیاند، لەگەڵ هاوپەیمانەكانمان لە هەوڵی بەردەوامدا دەبین تاوەكو هێزەكانی دژەتیرۆر فراوانترو بەهێزتر بكرێت تاوەكو قەڵغانێكی پتەوتر بن بۆ پاراستنی كوردستان.
‎لەكۆتایی كۆبوونەوەكەدا سەرۆكی یەكێتی خەڵاتی رێزلێنانی پێشكەشی بەڕێوەبەرایەتی دژەتیرۆر كرد لەبەرامبەر هەوڵ و قوربانیدانەكانیان لەپێناو خاكی كوردستان و سەرفرازیی خەڵكەكەید.