كتێبێك سەبارەت بە ناناوەندییكردنی سیستمی كارگێڕیی هەرێم بڵاوكرایەوە

  2020-06-09 13:31      210 جار بینراوە        کۆمێنت

كتێبی (سیستمی كارگێڕیی هەرێم چۆن بە ناناوەندیی بكرێت؟) لە نوسین و ئامادەكردنی (محەمەد رەسوڵ موڕاد) بڵاوكرایەوە.
نوسەر و ئامادەكاری كتێبەكە، لە پەڕەی تایبەتی خۆی لە (فەیسبوك) دەربارەی چاپكردنی كتێبەكەی نوسیویەتی: "ئەگەرچی ماوەی سەرقاڵبونم بە نوسین و ئامادەكردنی ئەم كتێبە، نزیكەی چوار ساڵی خایاند و زۆر پێیەوە ماندوبوم، بەڵام چاپكردنی لەمڕۆدا، بە تایبەت كە پرسی بایەخ و پێویستیی ناناوەندێتیی بۆ هەرێمی كوردستان بۆتە رۆژەڤ (پرسی رۆژ)، زۆر خۆشحاڵیكردم و هیلاكییەكەی لەبیربردمەوە."

كتێبەكە، لە سێ بەشی سەرەكیی و كۆمەڵێ باس و تەوەر پێكدێت، كە بە پشتبەستن بە (27) سەرچاوەی زانستیی لە بواری یاسا و كارگێڕیی و سودوەرگرتن لە ئەزمونی كەسیی، هەوڵدراوە بە شێوەیەكی میتۆدیی و لە رێگەی تاووتوێكردنی یاسا بەركارەكانی عیراق و هەرێمی كوردستان، وەڵامی پرسیارە سەرەكییەكە بدرێتەوە.
وەكچۆن، لە پێشەكیی كتێبەكەدا هاتوە: هۆكاری سەرەكیی هەوڵەكەمان، بۆ گرنگیی و پێویستیی (سیستمی ناناوەندێتیی) بۆ بارودۆخی ئێستای هەرێم دەگەڕێتەوە، كە هەنگاو بۆ هەڵبژاردنی سیستمێكی كارگێڕیی ئەوتۆ بنرێت، كەوا لەگەڵ واقیعی جوگرافیی و ئیتنیكیی وڵاتەكەدا بگونجێت.
ئەم تەرزە كارگێڕییەش، بریتییە لە "بونیادنانی متمانە لەناو حكومەتدا"، كە ئەنجومەنی گشتیی نەتەوەیەكگرتووەكان، لە حەوتەمین دیداری جیهانیدا (2007 - ڤیەننا) پشتگیری لێكردووە. كەواتە ئەم سیستمە هاوچەرخە، بایەخی زۆری بۆ سەركەوتنی حكومڕانیی هەیە و، كاریگەریی ئەرێنیشی لەسەر تەواوی جومگەكانی ژیانی تاك و كۆمەڵ دەبێت.
هەر لەو پێشەكییەدا، نوسەر رونیكردۆتەوە، "لە دوتوێی بەش و باس و تەوەرەكانی ئەم كتێبەدا، هەوڵدراوە، بە شێوەیەكی میتۆدیی و پاڵپشت بە كۆمەڵێ سەرچاوە، سیستمی كارگێڕیی بە گشتیی رونبكرێتەوە، پاشان تیشكبخرێتەسەر شێوازەكانی، لەمەشەوە، پتر رۆبچینە نێو بابەتی سەرەكیی و، لە رێگەی تاووتوێكردنی یاسا بەركارەكانی عیراق و هەرێمی كوردستانەوە، وەڵامی پرسیارە پێویست و گرنگەكە: (سیستمی كارگێڕیی هەرێم چۆن بە ناناوەندیی بكرێت؟) بدەینەوە."
هەروەك ئاماژەی بەوەش داوە، كەوا بۆ نوسین و ئامادەكردنی ئەم باسە، سەرەڕای سەرچاوە زانستییەكان بە زمانە جیاوازەكان، ئەزمونی 12 ساڵەی خۆیشی لە بواری كارگێڕییدا، لە فەرمانبەرێتیی و بەرپرسیارێتیی بەش و هۆبە و فەرمانگەوە، تا دەگاتە ئەندامێتیی لە ئەنجومەنی پارێزگا و بەریەككەوتنی راستەوخۆی لەگەڵ واقیعەكە و دەرهاویشتەكانی لە ماوەی پێنج ساڵی رابردوودا، كۆمەكی باشیان كردووە، تاكو بابەتییانە و واقیعبینانەتر پرسەكە تاووتوێ بكات و سەرنجی خۆمی لەسەر بخاتەڕوو.
(سیستمی كارگێڕیی هەرێم چۆن بە ناناوەندیی بكرێت؟) لە نوسین و ئامادەكردنی (محەمەد رەسوڵ موڕاد) چاپی یەكەمییەتی و بە تیراژی (1000) دانە و لە چاپخانەی حەمدی لە سلێمانی چاپكراوە و ژمارەی سپاردنی (1531)ـی ساڵی 2020ـی وەزارەتی رۆشنبیریی دراوەتێ.
نوسەر و ئامادەكاری كتێبەكە، لە پەڕەی تایبەتی خۆی لە (فەیسبوك) راشیگەیاندوە، لەپێناو پابەندبون بە رێكارە تەندروستییەكان بۆ خۆپاراستن لە ڤایرۆسی كۆرۆنا، لە ئێستادا هیچ رێوڕەسمێكی واژۆكردن و بڵاوكردنەوە بۆ كتێبەكە ناكەین. بەو هیوایەی لە ئایندەیەكی نزیكدا ئەو خەونەش بهێنینەدیی، لەوەش گرنگتر و پێویستتر خەونی بە ناناوەندییكردنی سیستمی كارگێریی هەرێمەكەمان.
محەمەد رەسوڵ موڕاد
• لەدایكبوی 1969– رانیە
• دبلۆم لە (بەڕێوەبردنی پرۆژەكانی ئاو)- پەیمانگای تەكنەلۆژیی موسەییەب- (1989 – 1990)
• بەكالۆریۆس لە (یاسا)- زانكۆی كۆیە- (2007 – 2008)
• مینی ماستەر لە (كارگێڕیی كار)- زانكۆی (عین شمس) بە هاوكاریی (ئەكادیمیای جیۆری) - (2016).
• ئەزمونی كارگێڕی: 2003 - تاكو ئێستا: فەرمانبەر، لێپرسراوی بەش و هۆبە، بەڕێوەبەری فەرمانگە، ئەندامی ئەنجومەنی پارێزگا (لە فراكسیۆنی یەكێتیی نیشتمانیی  كوردستان).
• سەرۆكی لیژنەی شارەوانی و خزمەتگوزارییەكان، جێگری سەرۆكی لیژنەی كاروباری یاسایی لە ئەنجومەنی پارێزگای سلێمانی.
• كتێبێكی چاپكراوی هەیە: (یۆگای تەمەندرێژی و گەنجبوونەوە).
• چەند راپۆرتێكی پڕ زانیاری و سەرنجی وردی سەبارەت بە: (كێشەی كەمئاوی لە پارێزگای سلێمانی، زیادەڕەویی زەویوزار لە هەرێمی كوردستاندا، سەرچاوەكانی داهات لە هەرێمی كوردستان و پێویستیی پێداچوونەوە بە باج و رسومات، چۆنێتیی پەرەپێدانی كەرتی گەشتوگوزار لە دەڤەری راپەڕین و هەڵبژاردنەوەی ئەنجومەنی شارەوانییەكان. .. تاد) ئامادەكردوە.
• چەندین بابەت و نوسینی دەربارەی: (سامانی ئاو، یاسای ئاو، كارگێڕیی، یاسای كارگێڕیی) لە سایت و رۆژنامەكاندا بڵاوكردۆتەوە.
• چەند توێژینەوە و راپۆرت و نامیلكەیەكی تری ئامادەی چاپن.
• ئەندامی هەریەك لەم سەندیكا و رێكخراوانەیە: كۆمكاری زیندانییانی سیاسیی كوردستان، سەندیكای تەكنیكارانی كوردستان، كۆمەڵەی كوردستانێكی سەوز، یەكێتیی مافپەروەرانی كوردستان.

بابەتی زیاتر

نوێترین هەواڵەکان

بیروڕا

سۆشیال میدیا

گەلەری

کەشو هەوا

زۆرترین سەردانکراو